Emọ—Whai Họ Oghọghọ Mai!
1 Izoge emezae gbe emetẹ, kọ wha riẹ kpahe ujaje Jihova ziezi inọ a ku owhai kugbe oma evaọ iruẹru ukoko na? (Izie. 31:12; Ol. 127:3) O rọ oware oghọghọ inọ wha rrọ kugbe omai nọ ma be gọ Jihova kugbe na! Wha re ru idu mai sasa nọ wha tẹ keria rirẹ evaọ iwuhrẹ na jẹ be gaviezọ ziezi. O rẹ mae were omai eva nọ wha tẹ be daoma k’uyo evaọ eme obọ rai. Eva e rẹ were ukoko na soso okenọ wha te ru eme nọ a k’owhai evaọ Isukulu Odibọgba Ọghẹnẹ na, okenọ wha te kuomagbe omai avọ osegboja evaọ usiuwoma ota, gbe okenọ ma te yo nọ wha rọ aruọwha se isẹri kẹ ibe isukulu gbe iticha rai.—Ol. 148:12, 13.
2 Ma gwọlọ re wha riẹ nnọ eva e rẹ were omai nọ ma tẹ ruẹ uruemu ezi rai, ẹkpatiẹ rai, uruemu ofuafo rai, gbe adhẹẹ rai kẹ ekpako. Oghọghọ mai o rẹ mae rro evaọ okenọ wha te dhesẹ nọ wha be ‘kareghẹhọ Ọnọma owhai’ ẹkwoma ute uvie nọ wha re fihọ k’omobọ rai.—Ọtausi. 12:1; Ol. 110:3.
3 Vuẹ Omai Ute Rai: Ọmọzae ikpe eree jọ ọ vuẹ ọsẹro ubrotọ jọ nọ: ‘Orọ ọsosuọ, mẹ gwọlọ họ-ame, u je no ere no mẹ gwọlọ fiobọhọ evaọ ukoko na ẹkwoma ẹruorote ekwakwa ẹmeọta gbe egba na, mẹ vẹ jọ ọruẹrẹahwohọ, fiobọhọ rẹro te ebe na, isase eva obọ iwuhrẹ obe ukoko gbe Uwou-Eroro na. Mẹ gwọlọ nọ mẹ rẹ jọ odibo oruiruo, mẹ vẹ te jọ ọkpako. Mẹ tẹ jẹ gwọlọ jọ ọkobaro je kpohọ isukulu ekobaro. Mẹ gwọlọ nọ me re kpohọ obọ Ebẹtẹle, jọ ọsẹro okogho hayo ọsẹro ubrotọ.’ Ovuhumuo nọ o dhesẹ kẹ uvẹ Ọghẹnẹ ọgọ o woma kẹhẹ!
4 Nọ wha be rro haro evaọ ugboma gbe abọ-ẹzi na, eva e were omai nọ ma rọ ruẹ nọ wha be nya te ute rai. (Wawo Luk 2:52.) Kukpe kukpe, idu buobu rai i bi zihe ruọ iwhowho-uvie nọ e te họ-ame he a ve je te kẹ ame-ọhọ wọhọ idibo omorọkẹ Jihova. Oghọghọ mai o rẹ rro nọ ma tẹ ruẹ nọ wha te kẹ ọkobaro ubroke no jẹ tubẹ ruọ iruo odibọgba oke-kpobi na. Ghinọ uzẹme, emọ, whai họ oghọghọ mai gbe ehri igbunu ọrọ ujiro kẹ Ọsẹ obọ odhiwu mai. Jọ Jihova ọ ghale owhai gaga!—Itẹ 23:24, 25.