Fi Itee họ kẹ Omobọ Ra Rọkẹ Ukpe Iruo Okpokpọ Na
1 Kọ ẹnyaharo abọ-ẹzi nọ who ru no ọ be k’owhẹ evawere? U woma re whọ hae nyaharo evaọ abọ-ẹzi, rekọ onana o gwọlọ omodawọ. Itee nọ ma re fihọ kẹ omobọ mai gbe iviuwou mai u re fi obọ họ. Ute yọ omaa nọ ohwo ọ maa fihọ kẹ obaro na nọ ọ gwọlọ daoma le. Re ma sai ru Jihova eva were, itee mai e rẹ rọwo kugbe oreva riẹ hrọ. Fikiere, ma re nwene iroro mai lele erọ Jihova je le itee Uvie na wọhọ epanọ Jesu o ru na. (Jọn 17:4) Ma te ruẹ oghọghọ buobu avọ evevọwẹ evaọ uzuazọ mai nọ ma bi ro ruiruo kẹ Jihova na.—Jọn 15:10, 11.
2 Didi itee whọ sai le t’obọ evaọ ẹwhaharo isiuru Uvie na evaọ ukpe iruo n’ukpo na? Ma rẹ sae jọ unu ahwo nọ e họ-ame ruẹ nnọ ibuobu e nyate itee nọ a fihọ kẹ omobọ rai. Ofariẹ, idu buobu a fi obe họ wọhọ ekobaro obufihọ gbe erọ oke-kpobi. Ibuobu a bi ruiruo evaọ oria nọ ẹgwọlọ ọ mae jọ rro. Inievo jọ a nyate ute nọ a fihọ kẹ omobọ rai nọ a zizie ai kpohọ Ebẹtẹle hayo kpohọ Isukulu Ewuhrẹ Odibọgba na.
3 Itee nọ Whọ Rẹ Sai Roro Kpahe: Kọ emamọ itee jọ e riẹ nọ whọ rẹ sai le t’obọ? Re ahwo ọkpokpọ a sai ru emamọ ẹnyaharo abọ-ẹzi, ekpohọ iwuhrẹ ẹsikpobi gbe odẹ ufihọ otọ evaọ Isukulu Odibọgba Esuo-Ọghẹnẹ na yọ emamọ itee nọ a re fihọ kẹ omarai. Otẹrọnọ whọ be hae kpahe ẹme kẹse kẹse eva iwuhrẹ anwẹdẹ hẹ, kọ who gbe fi oyena họ wọhọ ute? Amọfa a sai wo erere no uwuhrẹ gbe ekiakiẹ ra ze, yọ otoriẹ ra kpahe uzẹme na o vẹ te rro viere.—Hib. 10:24, 25.
4 Kọ who te kẹ usiuwoma ota no? Kọ who bi ru ere ẹsikpobi? Kọ who bi se ebe ekpokpọ nọ e be lahwe na re whọ riẹ kpahe emamọ ithubro nọ i bi no obọ ọrigbo ẹrọwọ na ze? Otẹrọnọ whọ nyate itee eyena no, who gbe roro kpahe omarọkẹ gbe ame-ọhọ wọhọ emamọ itee nọ who re le?
5 Kọ who bi ru uwuhrẹ Ebaibol kugbe ahwo? Kọ whọ lẹ no kẹ obufihọ nọ who re ro mu ojọ họ? Kọ whọ be roma totọ kpohọ izihebro, dhesẹ nnọ whọ gwọlọ wuhrẹ obe kugbe enọ i wo isiuru nọ whọ nya ku? Otẹrọnọ ohwo jọ nọ who bi wuhrẹ obe kugbe o te kẹ usiuwoma ota, kọ who bi wuhrẹ iẹe kẹ odibọgba na?
6 Kọ who fi ute euwa họ no kẹ amara kpobi? Hayo kọ whọ dawo iruo ọkobaro obufihọ na no? Ẹsejọhọ whọ sai tube mu iruo họ wọhọ ọkobaro oke-kpobi, rehọ euwa 70 rọ vuẹ amọfa emamọ usi na k’amara k’amara. Nọ oke o be nyaharo na, whọ sae ruẹ oghọghọ orọ erere owo no ewuhrẹ obọdẹ Isukulu Iruo Ekobaro na ze. Inievo-emezae a rẹ daoma re a nyate ọkwa-iruo idibo oruiruo hayo ekpako.—1 Tim. 3:1.
7 U fo re itee omobọ mai nọ ma fihọ i si omai kẹle Jihova viere jẹ k’omai uvẹ w’obọ vọvọ viere evaọ eruo oreva riẹ. Pọl ọ ta nnọ ‘eware obọ emu e thọrọ e riẹ ẹro, re ọ rẹriẹ ovao dhe enọ e rrọ obaro.’ Ọ ta udu họ omai awọ re ma wo uvi eriwo kpahe itee Uvie na re “epanọ ma nyaharo te no kẹhẹ,” ma gbẹ “ruabọhọ ẹnya kpatiẹ evaọ edhere ọvo nana.”—Fil. 3:13, 16, NW.