Epanọ Whọ Rẹ rọ Nyate Itee Abọ-Ẹzi Ra
1 Wọhọ uzoge Oleleikristi, ababọ avro, uyoyou nọ who wo kẹ Jihova gbe eme ọ Jesu nọ ọ ta kẹ Ileleikristi kpobi inọ a “kake guọlọ uvie” na i bi kpomahọ itee nọ whọ gwọlọ le evaọ uzuazọ. (Mat. 6:33) Ẹsejọhọ utee ra họ re who ru odibọgba ra kẹre ẹkwoma ọkobaro nọ whọ rẹ jọ hayo re who kpohọ oria nọ ẹgwọlọ kẹ iwhowho-uvie ọ jẹ mae rro. Ahwo jọ a sai woi họ iroro inọ a rẹ fialoma via kẹ iruo ebabọ nọ a be jọ abọ sa-sa akpọ na ru, fialoma via re a ruiruo evaọ uwou-ogha, hayo re a ruiruo wọhọ imishọnare. Itee nana e rẹ kẹ evevọwẹ yọ i gine fo ejiri!
2 Oware jọ nọ u re fiobọhọ kẹ owhẹ nyate itee abọ-ẹzi ra họ ekere nọ who re kere ai fihotọ. Uwou-Eroro ọ July 15, 2004 (ọrọ Oyibo), o ta nọ: Oware nọ o rrọ owhẹ iroro o rẹ sai mu owhẹ ẹro je vẹ ziezi nọ who te kere iei fihotọ. Fikiere [whọ] sae gwọlọ kere itee [ra] gbe epanọ [whọ] sae rọ nyate ai fihọ obe.” Fibae, itee esese nọ who re fihọ nọ whọ rẹ sai le tobọ evaọ umutho oke e rẹ sai fiobọhọ kẹ owhẹ kiẹ ẹnyaharo ra riwi, jẹ rọ ere mu ẹro hotọ nọ who bi le itee obaro ra na.
3 Itee Ubroke nọ Who re Fihọ: Otẹrọnọ whọ re họ-ame he, roro kpahe oware nọ u fo nọ who re ru re whọ sae nyate utee yena. O sae gwọlọ nọ who wo otoriẹ igogo iwuhrẹ Ebaibol ziezi. O tẹ rrọ ere, ru ei fihọ utee ra re who wuhrẹ obe Ebaibol Wuhrẹ na ziezi, se ikere nọ a jariẹ fodẹ na kpobi. (1 Tim. 4:15) Fi utee họ re nọ who re ro se Ebaibol na kpobi no obe Emuhọ rite Eviavia, wọhọ epanọ ahwo uviuwou Ebẹtẹle gbe ahwo nọ a kpohọ isukulu Giliad a re ru na. Whọ tẹ sai ru ere no, wo omaa nọ who re ro se Ebaibol na kẹdẹ kẹdẹ, re whọ jẹ nya lele omaa na. (Ol. 1:2, 3) Oyena u ti gine fiobọhọ k’owhẹ wo ẹnyaharo abọ-ẹzi ziezi! Rehọ olẹ mu isase Ebaibol gbe uwuhrẹ omobọ ra họ jẹ rọ olẹ ku ei họ, jẹ daoma fi oware nọ who wuhrẹ họ iruo evaọ ẹsikpobi.—Jem. 1:25.
4 Otẹrọnọ whọ họ-ame no, itee efa vẹ whọ rẹ sai le? Kọ o gwọlọ nọ who wo ẹnyaharo evaọ ona usiuwoma ota ra? Wọhọ oriruo, kọ whọ sai ru ei fihọ utee ra re whọ rọ Ebaibol na ruiruo ziezi evaọ odibọgba na? (2 Tim. 2:15) Ẹvẹ whọ sai ro ru odibọgba ra kẹre? Fi ugogo itee ubroke jọ họ nọ uyero ra o kuvẹ riẹ nọ ọhwa ra ọ rẹ sai le tobọ, nọ e rẹ sai fiobọhọ k’owhẹ nyate itee obaro ra.
5 Iku Obokparọ: Nọ Tony nọ ọ kpako te ikpe 19 o weze kpohọ uwou ogha Isẹri Jihova, isiuru nọ ọ rẹ rọ jọ Ebẹtẹle ruiruo e tẹ ruẹe udu. Rekọ, uzuazọ owhọwhọhọ o je yeri, yọ ọ re tubẹ rọ oma riẹ mudhe kẹ Ọghẹnẹ hẹ. Tony ọ tẹ jiroro nọ o re yeri uzuazọ riẹ re o rọwo kugbe idhere Jihova, re ọ jẹ nyate utee ame-ọhọ. Nọ o le utee yena tobọ no, o te mu utee ọkobaro obufihọ gbe ọkobaro oke-kpobi họ ele, o te kere edẹ nọ ọ gwọlọ ro muhọ fihọ ukeledẹ riẹ. Nọ o ru ọkobaro te oria jọ no, dai roro epanọ eva e were riẹ te nọ a zizie ei inọ o kpohọ Ebẹtẹle nyai ruiruo!
6 Whọ sae nyate itee abọ-ẹzi ra re nọ whọ be rọ isiuru Uvie na karo na. Lẹ se Jihova kpahe “iruo ra” re whọ daoma epanọ who re ro le ai tobọ.—Itẹ 16:3; 21:5.
[Study Questions]
1. Itee abọ-ẹzi vẹ izoge Ileleikristi buobu a wo?
2. Eme ọ rẹ sai fiobọhọ k’owhẹ nyate itee abọ-ẹzi ra?
3. Fodẹ itee ubroke jọ nọ e rẹ sai fiobọhọ kẹ ohwo te kẹ ame-ọhọ.
4. Itee ubroke vẹ Oleleikristi nọ o wo utee orọ ekpohọ Ebẹtẹle hayo iruo imishọnare ọ rẹ sai fihọ?
5. Ẹvẹ itee ubroke nọ a re fihọ i ro fiobọhọ kẹ oniọvo-ọmọzae jọ nyate utee nọ ọ gwọlọ ro ruiruo eva Ebẹtẹle?
6. Eme ọ rẹ sai fiobọhọ k’owhẹ nyate itee abọ-ẹzi ra?