Izoge—Eme họ Ute Ẹzi Rai?
1 Jihova ọ riẹ epanọ emamọ iruo gbe ute nọ a rẹ sai le t’obọ e roja te evaọ ẹwhaze evawere. (Rri Emuhọ 1:28; 2:15, 19.) Nẹnẹ, Jihova ọ rehọ iruo usiuwoma ota gbe ewuhrẹ amọfa rọ kẹ ahwo riẹ no. Ma te je wo obọdẹ ute ọrọ ẹnyate uzuazọ ebẹdẹ bẹdẹ evaọ Aparadase. Obọnana, u fo re ma fi ute ẹnyaharo ẹzi họ otẹrọnọ ma gwọlọ whaha ogaga gbe ekwakwa mai nọ ma re ro ruiruo thọthọ.—1 Kọr. 9:26.
2 Ute Areghẹ kẹ Emoha: U fo re emoha a wo ute uvie nọ a rẹ sai le t’obọ. (1 Tim. 4:15) Emaha jọ a wuhrẹ epanọ a rẹ rọ rehọ uzuzou se edẹ Ebaibol na no taure a te ti wuhrẹ ẹriẹse dede. Ẹkwoma uwuhrẹ uviuwou na, emọ a re wuhrẹ epanọ a rẹ ruẹrẹ oma họ kẹ iwuhrẹ na re a ruẹse nyate ute emamọ uyo nọ a rẹ kẹ a ve je kere edẹ rai fihọ otọ evaọ Isukulu Odibọgba Ọghẹnẹ. Okenọ emọ a bi lele ọsẹ gbe oni rai kpohọ usiuwoma ota, a ve wuhrẹ epanọ a re ro w’abọ evaọ isẹri ise nọ a be nyaharo kpohọ ute iwhowho-uvie nọ e te họ-ame he na. Esẹ gbe ini a re fi ute omarọkẹ gbe ame-ọhọ họ aro emọ rai.
3 Whọ tẹ rọ ọmọ-uzoge, eme who fihọ wọhọ ute ẹzi ra? “Kareghẹhọ ọnọ ọ ma owhẹ” ẹkwoma omarọkẹ ute nọ o ghine wuzou evaọ uzuazọ. (Ọtausi. 12:1; Ol. 71:17) Eme jabọ who gbe ru iruo ọkobaro ubroke he evaọ oke ehọlide? Kọ who roro kpahe iruo odibọgba oke-kpobi no wọhọ ọkobaro oke-kpobi? Kọ ẹvẹ kpahe ewuhrẹ ẹvẹrẹ kpokpọ re evaọ obaro whọ sai fiobọhọ kẹ ẹko ahwo hayo ukoko nọ o kẹle owhẹ nọ e be ta ẹvẹrẹ ọfa hayo kpohọ oria ọfa? Ahwo buobu nọ e be jọ Ebẹtẹle ruiruo obọnana hayo wọhọ esẹro ọnyawariẹ hayo ekobaro obọdẹ hayo imishọnare a fi iruo obọdẹ oke-kpobi họ wọhọ ute rai okenọ a gbẹ jọ isukulu. Kọ eme jabọ who gbe ru epọvo na re he?
4 Nọ whọ gbẹ rọ ọmaha na, daoma raro kele oriruo Jesu. Makọ nọ ọ jọ ikpe 12, ọ jẹ t’ẹme vevẹ kpahe eware ẹzi. (Luk 2:42-49, 52) Who te fi emamọ ute họ k’omobọ ra re who ru uwuhrẹ omobọ ra, se Ebaibol na kẹdẹ kẹdẹ, re whọ jẹ nyusu ẹsikpobi kugbe Ileleikristi nọ e kpako eva iwuhrẹ gbe usiuwoma ota, i re fiobọhọ k’owhẹ wo ona nọ who re ro wuhrẹ amọfa kpahe Uvie Ọghẹnẹ wọhọ epanọ Jesu o ru.