O Gwọlọ Omai Kpobi re Ma Ru Iruo na Gba
1 Olele Jesu Kristi kpobi ọ rẹ riẹ nnọ omodawọ riẹ re ọ kẹ uketha je wo obọ evaọ iruo ewhowho Uvie na u w’uzou gaga. Jesu o vuhumu nnọ ilele riẹ e te mọ ibi Uvie sa-sa. (Mat. 13:23) Dede nọ ekobaro ajọwha buobu a bi ru abọ ologbo ọrọ iruẹru usiuwoma ota na, a re jiri ahwo kpobi nọ a be kẹ Ọghẹnẹ orro avọ osegboja ẹkwoma ibi buobu nọ a be mọ.—Jọn 15:8.
2 Omodawọ Mai Kpobi U re Ruiruo Buobu: Jesu ọ ruẹaro nọ omodawọ ilele riẹ kpobi u ti ru iruo nọ i vi eriẹ. (Jọn 14:12) Makinọ iyero mai i fi awhaha họ onọ ma sai ru hayo e k’omai uvẹ re ma raha oke buobu kẹ ovuẹ Uvie na, a gwọlọ omai kpobi re ma ru iruo na gba. O nwane wọhọ epanọ Pọl ọ ta: “Oma na kpobi, o whẹgbe je ko kugbe eva ọwhẹgbe kpobi nọ a rọ ze, okenọ kabọ kabọ o te bi ru iruo ziezi ovẹ kẹ oma na oro.”—Ẹf. 4:16.
3 Otujọ a sai roro nọ omodawọ rai u tuluho. Dede na, evaọ ibiaro Jihova oware nọ o mai w’uzou họ re iruo mai i no ẹwẹ-kpobi ze. Oware kpobi nọ ma ru kẹe o rẹ ghaghae yọ ọ rẹ jẹe rehọ.—Wawo Luk 21:1-4.
4 Gbẹ hae Tha Iruo na Uke: Mai kpobi ma wo uvẹ-ọghọ nọ ma rẹ rọ zọhọ fihọ iruo akpọ-soso na evaọ abọ-iwo. Ejọ e sai fiobọhọ evaọ iruo ugbobọ evaọ uketha iruo Uvie na. Omomọvo ọ rẹ sae daoma re ọ kẹ iyo nọ a dabe ruẹrẹ họ ziezi eva iwuhrẹ je w’obọ evaọ Isukulu Odibọgba Ọghẹnẹ. Ẹkwoma uvẹ uduotahawọ amọfa nọ ma re ro ruiruo, ma rẹ zọhọ buobu fihọ abọ-ẹzi ukoko na, yọ onana u re fiba ẹgba ukoko na re u ru iruo nọ a mu họ iẹe obọ na gba.
5 Ẹhẹ, o gwọlọ omai kpobi re a ruiruo na gba. Jọ ohwo ọvo o roro nọ a gwọlọ e riẹ hẹ hẹ. Omodawọ mai kugbe, te ulogbo te osese, evaọ egagọ Jihova o hẹriẹ omai wọhọ egegagọ uzẹme ovuọvo ọ Ọghẹnẹ. (Mal. 3:18) Omomọvo ọ rẹ sai wo abọ ologbo evaọ orro nọ a rẹ rọ kẹ Jihova gbe evaọ obufihọ kẹ amọfa re a riẹe jẹ gọe.