Esẹro nọ E be k’Obaro—Ọsẹro Ukoko Na
1 Re a ruiruo wọhọ ọsẹro evaọ ukoko na yọ owha-iruo ulogbo. (Iruẹru 20:28; 1 Tim. 3:1) Onana họ orọ ọsosuọ evaọ uhie izoẹme nọ i ti dhesẹ iruo ekpako Ileleikristi kpobi re mai kpobi ma sai wo ovuhumuo kẹ obọdẹ iruo nọ a bi ru k’omai na.
2 Society ọ rẹ rehọ ọsẹro ukoko na mu re o ruiruo evaọ etoke nọ u w’umuo ho. Nọ ọsẹro ukoko na ọ be rẹrote iruo na, onana u re fiobọhọ kẹ ekpako na re a muẹrohọ iruo nọ a kẹ rae. (Our Ministry, ẹwẹ. 42) Kọ eme onana o gwọlọ?
3 A re vi ileta ukoko na se ọsẹro ukoko na o ve kpeze ai se okere-obe na re ọ rẹrote ai. Evaọ oma oruẹrẹhọ kẹ egwa ekpako, ekpako na a rẹ zọhọ iroro rai se ọsẹro ukoko na kpahe eme nọ i fo iroro-ejẹ kugbe o ve koko eme ẹgwa na họ. Ọ rẹ jẹ jọ ohwo-agbara eva egwae ekpako na. Okenọ a tẹ jiroro no, ọ rẹ ruẹ nọ a bi fi ei họ iruo. Ọ rẹ rẹrote ọruẹrẹhọ Ewuhrẹ Odibọgba na gbe omaa ọ evuẹ ogbotu. Ọ rẹ whobọhọ iwhowhovia kpobi nọ a re ru kẹ ukoko na, ọ rẹ k’udu osaowha araha iruẹru kpobi, je muẹrohọ nnọ a ru ekiakiẹ igho isiane ẹgbukpe ọrọ igho ukoko na.
4 Wọhọ ohwo-agbara, ọsẹro ukoko na ọ rẹ sẹro iruo Ogbẹgwae Iruo Ukoko na. Okenọ ọmọ-uwuhrẹ Ebaibol ọ tẹ yare nọ ọ rẹ jọ owhowho-uvie nọ ọ te họ-ame he hayo okenọ owhowho-uvie nọ ọ te họ-ame he ọ tẹ gwọlọ họ-ame, ọsẹro ukoko na o re ru ọruẹrẹfihọ re ekpako e kiẹe riwi. Ọsẹro ukoko na ọ rẹ jẹ k’obaro evaọ oma ọruẹrẹkpahe kẹ iweze ọsẹro okogho na re ukoko na o sai wo erere vọvọ no obọdẹ oka iruẹru na ze.
5 Ewha-iruo ọsẹro ukoko na e rọ buobu jẹ rọ oghoghẹrẹ. Nọ ọ be rọ oma kpotọ rẹrote ewha-iruo riẹ “avọ oriori” na, mai kpobi ma sai ru ẹkẹ-abọ mai ẹkwoma ẹmeoyo kẹ ekpako na. (Rom 12:8) Nọ ma te “yo ẹme” jẹ “rehọ oma kpotọ” kẹ enọ e be k’obaro evaọ udevie mai na, a rẹ sai ruiruo rai avọ oghọghọ ulogbo.—Hib. 13:17.