Ma rẹ Sai Ru Iruo nọ I Vi Enana
1 Iruo ilogbo i kpoka họ odibọgba Jesu Kristi. Ọ rọ edhere igbunu ko idu ahwo, siwi ibuobu, jẹ kpare ejọ no iwhuowhu ze. (Mat. 8:1-17; 14:14-21; Jọn 11:38-44) Iruo riẹ i nuhu orẹwho jọ soso. Ghele na, evaọ owọwọ urere taure o te ti whu, ọ ta kẹ ilele ẹrọwọ riẹ nọ: “[Ọnọ ọ rọwo] omẹ, iruo nọ me ru o re ti ruẹ re; o re ti ru iruo ilogbo nọ i [vi] enana.” (Jọn 14:12) Ẹvẹ ma sai ro ru iruo nọ ‘i vi enana’?
2 Ẹkwoma Eruo Ekwotọ Buobu: Iruẹru Jesu e nya mu umuo ẹkwotọ Palẹstain, whaọ yọ a ta kẹ ilele ọsosuọ riẹ nọ a se isẹri “rite ọnyaba akpọ na,” thabọ gaga vi oria nọ Jesu omariẹ ọ jọ ta usiuwoma. (Iruẹru 1:8) Enẹna iruo usiuwoma ota nọ o muhọ na o kẹre te akpọ-soso no, jẹ kẹre te ekwotọ 232 no. (Mat. 24:14) Kọ who bi wo abọ vọvọ evaọ eruo ẹkwotọ nọ a ghale kẹ ukoko ra?
3 Ẹkwoma Ẹnyate Ahwo Buobu: Jesu ọ nya siọ umutho ilele jọ ba re a ru iruo usiuwoma ota na haro. Fiki isẹri-ise ọwhọ rai eva Pẹntikọst ọrọ 33 C.E., enọ i dede uzẹme na rehọ jẹ họ-ame evaọ ẹdẹ ọyena a bu te ahwo idu esa. (Iruẹru 2:1-11, 37-41) Ekokohọ ahwo nọ “a ro mu kẹ uzuazọ ebẹdẹ bẹdẹ” o nyaharo rite edẹ mai na no, nọ ma be jọ họ ahwo nọ a bu vi 1,000 ame okpẹdẹ. (Iruẹru 13:48) Kọ whọ be dao ẹgba ra kpobi re whọ nyate ahwo udu oruọzewọ oma evaọ oria kpobi nọ a je duku ai re who je lele isiuru na ababọ okioraha?
4 Ẹkwoma Usiuwoma Ota Oke Thethei: Odibọgba otọakpọ Jesu o nya mu umuo ikpe esa gbe ubro. Ibuobu mai e ta usiuwoma na lehie viere no. Makọ epanọ a te k’omai uvẹ ru iruo nana lehie te, eva e rẹ were omai re ma fiobọhọ kẹ ilele ekpokpọ re a muọ onya họ evaọ edhere uzuazọ na. (Mat. 7:14) Kọ who bi ru iruo buobu k’amara k’amara evaọ iruo Olori na?—1 Kọr. 15:58.
5 Ma rẹ gbẹ sai wo udu inọ ẹkwoma Jesu nọ ọ be tha omai uke, ma ti gbe ru iruo nọ e mae rro wọhọ ilele uzẹme riẹ.—Mat. 28:19, 20.