Daoma Riẹ Inievo Ra
1 Ebaibol na o dhesẹ ogbẹnyusu uzẹme wọhọ ohwo nọ o re bi kẹle ohwo vi oniọvo, ọnọ uyoyou gbe omarokpotọ riẹ u re serihọ họ, gbe ọnọ ọ rẹ dhogbo bru ogbẹnyusu riẹ evaọ etoke uye. (Itẹ 17:17; 18:24) Egbẹnyusu itieye e rẹ kare omai evaọ ukoko na ha otẹrọnọ ma daoma re ma riẹ je you ohwohwo.—Jọn 13:35.
2 Obọdẹ uvẹ nọ ma rẹ rọ riẹ inievo mai o rẹ roma via taure iwuhrẹ i te ti muhọ gbe okenọ i te kuhọ no. Kọ eme whọ gbẹ kaki t’obei jẹ dina hẹrẹ omojọ evaọ okenọ iwuhrẹ e tẹ fa no re whọ sae reawere usu owhẹwhẹtiẹ hẹ? Gwọlọ inievo sa-sa nọ whọ rẹ t’ẹme kugbe, te enọ e kpako no nọ i wo eriariẹ gbe emaha hayo enọ e rẹ vuoma.
3 Mu Ẹmeọta Họ: Who yere inievo ra eyere ọvo ho. Whọ sai muọ ẹmeọta họ ẹkwoma iku eware nọ whọ nyaku evaọ usiuwoma ota nọ who re gbe, ẹme jọ nọ o si owhẹ urru evaọ emagazini ọkpokpọ, hayo ẹme jọ kpahe ewuhrẹ nọ o kuhọ obọnana. Whọ rẹ sai wuhrẹ eware buobu kpahe inievo ra ẹkwoma emamọ ezọgaviẹ, tudu họ ae awọ re a t’ẹme kpahe eware nọ a nyaku gbe eware nọ a bi wuhrẹ. Nọ whọ tẹ nọ ohwo kpahe epanọ ọ rọ riẹ Jihova ọvo o rẹ sae fere eware buobu via. Eware nọ a nyaku nọ e rẹ bọ ẹrọwọ ga e via kẹ ahwo jọ no, yọ amọfa a bi thihakọ iyero jọ enẹna nọ e rẹ sai gbe ahwo buobu unu. Nọ ma te vuhu onana mu u re fiobọhọ k’omai, wọhọ egbẹnyusu uzẹme, re ma muẹro h’otọ jẹ j’owọ kẹ ẹgwọlọ amọfa.
4 Mu Ogbẹnyusu Kugbe Ohwohwo: Nọ ọmọ riẹ o whu no, o tẹ jọ bẹbẹ kẹ isista jọ re ọ so ile Uvie nọ e fodẹ ẹkparomatha na. Ọ kareghẹhọ nọ: “Okejọ, isista jọ nọ ọ keria rofẹkọ omẹ ọ tẹ ruẹ nọ mẹ be viẹ. Ọ tẹ nya bru omẹ ze, ọ tẹ gbalọ omẹ, je lele omẹ so abọ ole na nọ o kiọkọ reno. Mẹ tẹ vọ avọ uyoyou kẹ inievo na jẹ vọ avọ evawere inọ ma kpohọ iwuhrẹ na, vuhumu nọ etẹ obufihọ mai o rọ, obọ Ọgwa Uvie na.” Ma re mu ogbẹnyusu kugbe inievo mai ẹkwoma omosasọ nọ ma rẹ kẹ ae evaọ okenọ a tẹ gwọlọ iẹ gbe uduotahawọ evaọ oke kpobi.—Hib. 10:24, 25.
5 Nọ akpọ anwae ọnana ọ be vọ avọ okienyẹ viere na, joma gbae mu re ma riẹ inievo mai viere. Obọdẹ uduotahawọ ohwohwo onana o te jọ oghale kẹ ahwo kpobi.—Rom 1:11, 12.