W’obọ Evaọ Usi-Ovravra ọ Ọkparedẹ Obokparọ
1 Dede nọ ahwo buobu a wo ababọ-isiuru kpahe ovuẹ Uvie na je wo omawere kpahe iruẹru akpọ rai na, eware nọ a rọ ẹro ruẹ i dhesẹ no inọ ma rẹ sae rehọ ovuẹ Ebaibol nọ a kere via na ro kporo ugbẹhẹ ọ ababọ-isiuru na. Edhere jọ họ ẹkwoma efihọ ada ọkparedẹ evaọ uvẹ nọ u rovie kpobi. Dede na, re a ru ei evaọ edhere nọ o re ruiruo, o gwọlọ re ohwo o wo irẹro ewoma, re o fi ute obọ riẹ jọ họ, re ọ t’eme nọ i re w’iruo, re ọ rehọ uvẹ kpobi ro ruiruo, je wo ewẹ-obe ọkparedẹ.
2 Wo Irẹro Ewoma: “Ọnọ o re riwi ofou, ọ sae kọ ibi fihọ otọ họ, gbe ọnọ ọ rẹ kezọ ehru, ọ sae vu ivuẹvu hu,” ere Ebaibol na ọ ta eva Ọtausiuwoma Na 11:4. U fo ho re ma ku ei họ nnọ ma sai fi ọkparedẹ họ ada ha. Irẹro ewoma gbe ẹnya lele iroro-ejẹ nọ i re w’iruo nọ utu ọrigbo na o kẹ no ọvo họ oware nọ o g̣wọlọ. (Wawo Luk 5:4-6; Matiu 24:45-47.) Oniọvo-ọmọzae jọ nọ o yo uduotahawọ ekpako ukoko kpahe iruo ọkobaro o fi obe họ kẹe. Ọ reawere riẹ ga te epanọ o ro ru ei haro evaọ amara nọ o lele i rie. Evaọ emerae ivẹ na o fi ọkparedẹ 79 họ ada.
3 Fi Ute nọ U w’Iroro Họ k’Oma Ra: Ahwo buobu nọ a wo obokparọ ulogbo no evaọ efihọ ada ọ ọkparedẹ a ta nnọ ute nọ u w’iroro nọ a re fihọ u ru abọ jọ evaọ obokparọ rai. Ma tuduhọ ahwo kpobi awọ re a fi ute omobọ ohwo jọ họ jẹ daoma nya tei.
4 Ta Eme jọ nọ I re w’Iruo: U te he re a ta kẹ ahwo nnọ a rẹ sai vi emagazini na ziọ obọ iwou rai ẹkwoma ipostọfisi ọvo. Kpare isiuru rai kpahe oware nọ a re rẹro riẹ. Ru ẹmeọta na re o kie kpahe ae. Iroro-ejẹ jọ ena:
5 Evaọ etoke isẹri-ise n’uwou ruọ uwou, whọ sai mu ẹmeọta ra họ enẹ:
◼ “Doo, odẹ mẹ _________________________ . Me bi weze bru erivẹ mẹ nẹnẹ na keme mẹ riẹ nọ ahwo buobu a wo isiuru ọ eyo usi. Ẹsejọhọ re a sae ruẹsi wuhrẹ no ai ze hayo re a muẹrohotọ kẹ enwoma nọ e be te tha kpobi. Kọ ere who rri rie re? [Kuvẹ kẹ uyo.] Eme ọ usi buobu no akpọ na wariẹ họ ze e rrọ emagazini enana yọ i re fiobọhọ k’omai wuhrẹ uvi eware jọ no ai ze. [Kpọ iroro ọ ọnọ o wo uwou na rri ẹme isiuru jọ nọ o fo whọ vẹ ta haro.] O tẹ ruowhẹ, o te were omẹ re me ru ọruẹrẹfihotọ kẹ ẹrọze ọ uvitha ekpokpọ emagazini enana rri te ukpe soso.” Otẹrẹnọ ọ kpahe emamọ uyo, fi ọkparedẹ na họ ada eva unuigho riẹ na.
6 Otẹrọnọ whọ nyaku ohwo jọ evaọ orọ ọsosuọ, whọ sae ta nọ:
◼ “Eva e were omẹ nọ me ro di owhẹ họ. Odẹ mẹ _________________________ . Me muẹrohọ nọ uye o rrọ evaọ ẹkwotọ mai na gbe eria efa wariẹ akpọ na họ. Onana o lẹliẹ ahwo buobu roro no sọ ifue jọ e sae jọ kẹ ebẹbẹ mai. Kọ who roro kpahe onana no ẹdẹjọ? [Kuvẹ kẹ uyo.] Emagazini enana i dhesẹ edhere nọ ọ mai woma evaọ ekuhọ ebẹbẹ nọ ohwo-akpọ ọ be sai kuhọ họ anwọ ikpe udhusoi buobu nọ e vrẹ no na. O te were omẹ re me ru ọruẹrẹfihotọ kẹ ẹrọze uvitha ekpokpọ rri te ukpe soso eva azọhọ ₦320.00. Hayo, otẹrọnọ whọ gwọlọ nọ a vi ai s’owhẹ evaọ ipostọfisi, o vẹ jọ azọhọ ₦450.00.” Ru ọruẹrẹfihọ kẹ ozihebro.
7 Otẹrọnọ whọ riẹ kpahe otọhotọ-uyerakpọ ohwo jọ, whọ sae rehọ areghẹ nwene ovuẹ ra re u fiobọhọ kẹe ruẹ uvi aghare ọ emagazini na. Whọ sai dhesẹ eme nọ e rẹ kpare isiuru riẹ kẹ emagazini na rọ kẹe. Whọ vẹ ta kẹe kpahe epanọ ọye omariẹ gbe iyoyou riẹ a sae rọ reawere eghale igbunu n’obọ Ọghẹnẹ ze. Otẹrọnọ ọnọ o wo uwou na o gu unoma ọ ababọ ugho, whọ sai fi ibi emagazini họ ada kẹe.
8 Rehọ Uvẹ Kpobi Ruiruo: Rehọ uvẹ ọ efihada ọkparedẹ nọ u rovie ro ruiruo vọvọ. Ruẹ nọ who w’obọ evaọ usi ovravra ọ ọkparedẹ na wọhọ abọjọ ọrọ iruo ukoko na evaọ amara ọnana. Kareghẹhọ nya lele ọjọriẹ ọ erukpokpọ nọ a vi lele ekparedẹ nọ i bi re no. Whọ sae ru ọruẹrẹfihotọ re whọ k’okẹ ọ ọkparedẹ. Onana u wo aghare okrẹkri vi ekẹ ọ ekwakwa-iwo. Ovuẹ nọ o riẹ u re siwi uzuazọ. Ru efihada na kẹre te ejẹ emagazini ra gbe emọ-uwuhrẹ Ebaibol ra. Ru ei fihọ ute re whọ tha ọruẹrẹfihotọ ukoko ọrọ Ẹdẹ Emagazini (Ẹdẹ-Ọmaha kpobi) na uke.
9 Who rri uvẹ nọ who re ro fi ọkparedẹ họ ada eva etoke isẹri-ise ọnyakuo vo ho. (Ọtausi. 11:6) Uviuwou ọ ọmọtẹ ikpe ene jọ u wo ọrara jọ. Evaọ ẹdẹ jọ, ọrara na ọ tẹ gwọlọ nọ o re se obe ọ tẹ ta via nọ, “Uvumọ obe nọ a re se o rrọ uwou onana?” Osẹri ọmaha na, avọ abọ nọ ọ rọ tha eku, ọ tẹ kuyo nọ, “Koyehọ uvumọ obe nọ a re se o rrọ uwou onana? Hẹrẹ omojọ.” Ọ tẹ dhẹ kpohọ obọ ukpẹ oni riẹ, ọ tẹ gadiẹ agbara, ọ jẹ kwa ekru emagazini oni riẹ ze, Uwou-Eroro Na gbe Awake! Ọ tẹ rehọ ae kẹ ọrara na anọ, “Whaọ who rri sọ uvumọ obe nọ a re se o riẹ hẹ!” Ọrara na ọ reawere emagazini na te epanọ ọmaha na ọ rọ ta nọ: “Whọ tẹ gwọlọ, a sai vi ai s’owhẹ evaọ obọ uwou ra.” Eme o no rie ze? Ọ rehọ ekparedẹ ivẹ!
10 Vi Ọkparedẹ na Evaọ Ẹruoke: O rẹ sae jọ ababọ uduotahawọ kẹ ahwo nọ a rehọ ọkparedẹ otẹrọnọ ebe nọ a kparedẹ na i gbe te ae obọ họ evaọ etoke krẹkri. Epanọ o rẹ jọ vẹre ọkparedẹ ọkpokpọ nọ a vi se Society i re lehie vi umutho emerae jọ taure ọnọ o vi ọkparedẹ na o te muọ uvitha na họ ewo ho. Rekọ etoke na ọ rẹ jọ thethei gaga otẹrọnọ a gbẹ kaki vi ekparedẹ na se Society hi. Onana o soriẹ nọ u je fo re a siobọno ewẹ-obe ọkparedẹ nọ a kere gbagba no na kẹ ukoko na evaọ ewuhrẹ ukoko nọ o lele i rie. Oniọvo nọ ọ be rẹrote ekparedẹ na o re kere efọmo ọ Weekly Subscriptions na evaọ ẹruoke jẹ rehọ iẹ kẹ okere-obe na ọnọ ọ rẹ roma t’otọ kiẹ, whobọhọ, je vi ei se Society evaọ oka ovo oyena.
11 Nọ mai omomọvo o te ru ẹkẹ-abọ riẹ evaọ usi-ovravra ọ ọkparedẹ onana, u re mu omai ẹro nnọ Jihova ọ te ghale omodawọ mai.