Usiuwoma Ota U Ru Omai Wo Ohẹriẹ
1 Ahwo buobu a rẹ nọ inọ, “Eme o ru Isẹri Jihova wo ohẹriẹ no egagọ efa?” Kọ ẹvẹ whọ rẹ k’uyo? Whọ rẹ sai dhesẹ orọwọ Ebaibol mai jọ. Rekọ whọ sai roro kpahe epanọ odibọgba ẹgbẹde mai o ru omai wo ohẹriẹ te no?—Mat. 24:14; 28:19, 20.
2 Nẹnẹ na, umutho ahwo egagọ jọ ọvo a wo ọwhọ nọ a rẹ rọ ghale orọwọ rai kugbe amọfa. A rẹ sai roro nọ a te yoẹme kẹ izi Siza, yeri uzuazọ uruemu okpakpatiẹ, hayo re a ru ewoma kẹ ahwo ọvo, yọ u te no. Dede na, a wo uvumọ iroro owha-iruo nọ a re ro fiobọhọ kẹ amọfa wuhrẹ oware nọ Ebaibol ọ ta kpahe ewo usiwo ho. Kọ ẹvẹ ma ro wo ohẹriẹ?
3 Odibọgba ọwhọ mai u wo ohẹriẹ ulogbo rono iruẹru egagọ efa. Bu vi etoke ikpe 100 no na, Isẹri ọgbọna a whowho emamọ usi na avọ osegboja rite oka akpọ na no, evaọ aruorokele Ileleikristi ọsosuọ. Ẹjiroro mai evaọ ere oruo họ re ma fiobọhọ kẹ ahwo buobu re a yeri izuazọ rai rọwokugbe oreva Ọghẹnẹ.—1 Tim. 2:4; 2 Pita 3:9.
4 Didi Odẹ Who Wo? Kọ a riẹ owhẹ wọhọ ohwo nọ ọ rẹ vuẹ Ẹme Ọghẹnẹ avọ ọwhọ? (Iruẹru 17:2, 3; 18:25) Kọ fiki iruo ovuẹ ra, erivẹ ra a be ruẹ ohẹriẹ evaọ egagọ rai avọ ora? A riẹ owhẹ wọhọ ohwo nọ o re dhesẹ ẹruore riẹ kẹ amọfa avọ ọwhọ? Kọ who wo omaa ọ ẹsikpobi nọ who re ro w’obọ evaọ odibọgba na? Kareghẹhọ nnọ a re vuhu omai orọnikọ ẹkwoma odẹ mai ọvo ho rekọ kugbe eruo oware nọ odẹ na u dhesẹ—isẹri-ise kpahe Jihova.—Aiz. 43:10.
5 Uyoyou kẹ Ọghẹnẹ gbe ọrivẹ o rẹ wọ omai re ma w’obọ evaọ iruo ovuẹ na. (Mat. 22:37-39) Oye o soriẹ nọ mai, wọhọ Jesu gbe ikọ na, ma jẹ gwọlọ rehọ uvẹ nọ u rovie kpobi rọ ghale ovuẹ Uvie na kugbe amọfa na. Jọ ma ruabọhọ ewhowho emamọ usi na kẹ ahwo nọ a gwọlọ gaviezọ. Ere oruo o re fiobọhọ kẹ ahwo udu oruọzewọ re a ‘vuhu ohẹriẹ nọ o rrọ . . . ọnọ ọ be gọ Ọghẹnẹ gbe ọnọ ọ be gọ e he.’—Mal. 3:18.