Ono Ọ Sae Jẹ Uwuhrẹ Ebaibol Rehọ?
1 Emọs ọruẹaro na o whowho nnọ ohọo o te jọ ẹkwotọ Izrẹl, “orọnọ ohọo emuore, hayo o rọ uru-ame he, rekọ o rọ ẹme ỌNOWO na o yo.” (Emọs 8:11) Rọkẹ erere ọ ahwo nọ ohọo gbe uruame abọ-ẹzi u bi kpe, ukoko Jihova o be ghale ebe Ebaibol buobu wariẹ akpọ họ.
2 Enẹna, ma kporo obe Eriariẹ na bu te ima 70 no gbe ibroshọ Gwọlọ na nọ i bu te ima 91 no. Rọkẹ ewuhrẹ uzẹme na, ma wo ovuhumuo kẹ ẹlọhọ gbe ewoma ọrọ ebe enana. Dede na, ogbotu ahwo buobu nọ a rehọ ebe mai no a ri ti wuhrẹ Ebaibol na kugbe omai hi. Kọ eme ma rẹ sai ru kpahe onana?
3 Onọ A Fihọ Ada Kpobi Yọ Onọ O Sai Su Kpohọ Uwuhrẹ! Roro kpahe oware nọ o via kẹ owhowho-uvie jọ nọ ọ kẹ aye jọ uwuhrẹ evaọ oke ọsosuọ nọ ọ rọ t’ẹme kẹe evaọ unuẹthẹ. Aye na ọ nwane jẹe rehọ. Okiofa ọ tẹ ta kẹ owhowho-uvie na nọ, “Whẹ họ ohwo ọsosuọ nọ ọ ta nọ o re wuhrẹ Ebaibol kugbe omẹ.” Evaọ ẹkwotọ ra, bro ahwo nọ a wo ebe mai no a rẹ sae t’ẹme ọvo na? Onọ a fihọ ada kpobi o rẹ wha uvẹ ọ ozihebro gbe obe uwuhrẹ Ebaibol ze.
4 Nọ ma rẹ nyaku ahwo nọ a wo ebe mai no ẹsibuobu na, ẹvẹ ma sae rọ kpare isiuru rai re a riẹ eme nọ e rrọ evaọ ebe mai na? Osẹri jọ ọ nọ ohwo nọ o wo uwou jọ ovavo sọ o wo enọ Ebaibol jọ, rekọ o yo kẹe nọ, “Ijo.” Oniọvo-ọmọtẹ na ọ tẹ gbẹ ruabọhọ ẹme na inọ, “Ababọ avro who wo ejọ.” Aye na o wo, uwuhrẹ u te muhọ. Kọ eme whọ gbẹ nọ ọnọ o wo uwou na sọ ọ gwọlọ re o wuhrẹ kpahe eriwo Ebaibol na kpahe onọ hayo ẹme jọ nọ ọ rrọ ọdawẹ kẹe he? Ruẹrẹ oma kpahe re whọ nọ onọ isiuru jọ otẹrọnọ ọ gbẹ sai roro kpahe oware jọ họ. Ẹmeọta otiọye na ọ rẹ sai rovie edhere fihọ kẹ uwuhrẹ ọ ẹsikpobi orọ ehri izẹme Ebaibol na.
5 Iruo uwuhrẹ Ebaibol họ ehri odibọgba mai na. Nọ ma riẹ ohwo nọ ọ sae te jẹ uwuhrẹ rehọ họ na, who sioma h’emu hu re whọ rọ uwuhrẹ jọ kẹ ohwo kpobi nọ whọ nyaku. Rehọ ẹme na se Jihova evaọ olẹ, je ruiruo rọwokugbe elẹ ra. Whọ te ruẹ obọnana inọ ohwo jọ nọ whọ kẹ uwuhrẹ ọ te jẹe rehọ!—1 Jọn 5:14, 15.