U Fo Re Ma Jọ Iwuhrẹ, Orọnikọ Etausiuwoma Ọvo Ho
1 A muẹrohọ iẹe no nnọ “Isẹri Jihova a rehọ isẹri-ise rai nya otọakpọ na soso duwu no.” Ẹvẹ onana o sae rọ lọhọ? Orọnikọ fiki ẹgba hayo ogaga ohwo-akpọ họ, rekọ ẹzi Ọghẹnẹ nọ ọ be jọ oma idibo riẹ ruiruo nọ a be rehọ idhere sa-sa ro ru iruo usiuwoma ota gbe ewuhrẹ rai gba na.—Zek. 4:6; Iruẹru 1:8.
2 Ebe nọ a kporo na yọ abọ owoma jọ nọ ma bi ro ru iruo usiuwoma ota mai na gba. Evaọ ikpe na soso, Isẹri Jihova a kporo jẹ vaha ima-idu ebe, emebe, ibroshọ, emagazini, gbe ebe-evẹvẹ no re i fiobọhọ vuẹ emamọ usi Uvie na. Iyẹrẹ evaọ 1997 Yearbook u dhesẹ nnọ unu ebe nọ ma bi kporo i bu thesiwa no. Rite enẹna, a kporo New World Translation na bu vi ima 91 no. Evaọ ukpe ọvo, unu emagazini ọ Uwou-Eroro Na gbe Awake! nọ a kporo evaọ United States u wo ẹvi ọ 7.1 evaọ udhusoi. Evaọ Germany, ekporo emagazini i wo ẹvi ọ 35 evaọ udhusoi. Bu vi abọvo abasa emagazini nọ a jọ etẹe kporo, ẹkwotọ Russia a kporo i rai kẹ.
3 Fikieme a jẹ gwọlọ ebe bu tere? Evaọ akpọ na soso, ahwo a be kuyo gaga kẹ uduotahawọ nọ a be rọ k’omai inọ ma se isẹri evaọ oria kpobi nọ a re jo duku ahwo. Nọ ibuobu mai i bi ru iruo isẹri mai kẹre na—evaọ eria ẹgbede, evaọ iyẹrẹ, gbe evaọ ẹkwotọ eki-ọthuọ na—a bi fi ebe họ ada viere kẹ ahwo nọ a dhesẹ isiuru. Ibuobu rai a ti wo uvẹ nọ a re ro yo ovuẹ Uvie na vẹre he. Re a nyate ẹgwọlọ ọnana, ikoko a wo oghoghẹrẹ ebe nọ a re ro ruiruo evaọ kabọ kabọ odibọgba na.
4 Ute Vẹ Ma Wo Evaọ Ẹvaha Ebe? Ute mai orọnikọ re ma fi ebe họ ada ọvo ho. Uwou nọ a vi omai inọ ma ru ilele u wo abava—ẹta usiuwoma gbe ewuhrẹ. Orọ ọsosuọ, ma wo uvẹ nọ ma rẹ rọ ta usiuwoma Uvie na, re ma ru ahwo riẹ nnọ oye ọvo họ ẹruore nọ ahwo-akpọ a wo. (Mat. 10:7; 24:14) Ebe mai nọ a kporo no Ebaibol ze na yọ oware nọ o be hae kparobọ gbe obọdẹ edhere nọ a rẹ rọ bọ isiuru jẹ kẹ amọfa eriariẹ kpahe Uvie na.
5 Orọ avivẹ, ma tẹ gwọlọ ru ilele, ma re wuhrẹ eware nọ Jesu o j’uzi rai na kpobi hrọ. (Mat. 11:1; 28:19, 20) Ofariẹ, ebe na i wo abọ ologbo nọ i bi ro ru uzẹme na nyate ibiudu emọ-iwuhrẹ, bi fiobọhọ kẹ ai ziọ ilele.
6 Ẹsejọhọ, ahwo nọ e be rehọ ebe mai na yọ ‘enọ i bi yo ẹme’ na ọvo, rekọ o wọhọ nọ a sae te jọ iru ẹme na ha a te vu ai wa. (Jem. 1:22-25) Enọ i ti zihe ruọ ilele e te jọ kakao gheghe otẹrọnọ ohwo ọvo ọ kpọ rai họ họ. (Iruẹru 8:30, 31) A gwọlọ owuhrẹ nọ o re fiobọhọ kẹ ai dhesẹ uzẹme nọ o rọ Ikereakere na kẹ ai. (Iruẹru 17:2, 3) Ute mai họ re ma fiobọhọ kẹ ai nyaharo te omarọkẹ gbe ame-ọhọ re ma je wuhrẹ ai te ziezi re a wuhrẹ amọfa.—2 Tim. 2:2.
7 Ẹgwọlọ nọ O Mae Rro họ Iwuhrẹ Efa: Nọ ma tẹ ta usiuwoma, yọ ma be jọ ẹgbede whowho emamọ usi na. Rekọ ewuhrẹ o gwọlọ nnọ a re wuhrẹ ohwo othotha. Nọ ẹta usiuwoma o re ru amọfa riẹ kpahe ovuẹ Uvie na, ewuhrẹ o re fiobọhọ kẹ omomọvo jẹ emamọ usi na rehọ jẹ j’owọ kpahe iẹe. (Luk 8:15) Owuhrẹ o re ru vi ewhowho ọvo; o re dhesẹ eware vevẹ, jiroro avọ emamọ avro, kẹ imuẹro, jẹ ta ohwo kurẹriẹ.
8 U fo re ibuobu mai e jọ iwuhrẹ, orọnikọ etausiuwoma ọvo ho. (Hib. 5:12a) Ẹghale ebe yọ abọ ologbo iruo mai, rekọ ẹnyate ẹjiroro avivẹ odibọgba mai na o roma hwa oware nọ ma bi ru wọhọ iwuhrẹ. Dede nọ eva e rẹ were omai okenọ ma tẹ sai fi obe họ ada, re ma ru odibọgba mai vọvọ, ma re rri obe nọ ma fihọ ada na wọhọ ute urere mai hi. (2 Tim. 4:5) Ebe nọ a fihọ ada e rọ edhere nọ u wo ẹgba nọ a rẹ rọ rehọ uvẹ wuhrẹ amọfa uzẹme na.
9 Ru Izihebro re Who Mu Iwuhrẹ Ebaibol Họ: Ẹsejọhọ mai kpobi ma fi unu ebe jọ, ibroshọ, gbe emagazini họ ada no, ma tẹ jẹ niyẹrẹ unu izihebro jọ no. Ma re fi oke họ kẹse kẹse nọ ma re ro zihe nyae bọ isiuru na. Ugogo ẹjiroro nọ ma bi ro zihe họ orọnikọ re ma fi ebe efa họ ada ha rekọ re ma tudu họ ahwo awọ re a se je wo erere no oware nọ a wo no ze. Ẹvẹ ma hai wo ẹnyaharo te o gbẹ rọ ohwo jọ nọ o zihe ze ẹsibuobu re o fiobọhọ k’omai wo eriariẹ egbagba ha?—Jọn 17:3.
10 Nya lele isiuru kpobi avọ ẹjiroro emuhọ uwuhrẹ Ebaibol evaọ ibroshọ Eme Ọghẹnẹ Ọ Gwọlọ Mi Omai? na hayo evaọ obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Ebe ivẹ enana e kẹ ovuẹ Uvie na evaọ edhere ọlọlọhọ. Ibroshọ Gwọlọ na u wo eria iwuhrẹ nọ a gwọlọ kpobi, nọ u duobọ te ugogo iwuhrẹ Ebaibol na. Obe Eriariẹ na u re fiobọhọ k’ohwo wuhrẹ uzẹme na diwi viere, ghele na obe na o rọ lọlọhọ, vevẹ, jẹ rọ kpẹkpẹe.
11 Ọruẹrẹfihotọ ọlọlọhọ ewuhrẹ, onọ a ru vẹ evaọ uko-obeva ọ Odibọgba Uvie Mai ọrọ June 1996 na, u ru rie lọhọ kẹ owuhrẹ na re o wuhrẹ gbe ọmọ-uwuhrẹ na re o wo otoriẹ. Fi uko-obeva oyena kẹle otọ re whọ kiẹ ona uwuhrẹ riwi gbe idhere nọ i ruiruo no. Usu ẹjiroro jọ nọ o kẹ u kpomahọ epanọ a re ro dhesẹ isiuru omobọ ohwo kẹ ọmọ-uwuhrẹ na, unu eria nọ a re wuhrẹ evaọ ẹkeria ọvo, oghẹrẹ nọ a rẹ rọ kiyo enọ nọ i w’abọ kpahe uzoẹme na ha, epanọ te owuhrẹ te ọmọ-uwuhrẹ na a rẹ ruẹrẹ oma họ kẹ uwuhrẹ na, gbe epanọ a rẹ rọ kpọ ọmọ-uwuhrẹ na kpohọ ukoko Jihova. Ẹkwoma elele ẹjiroro enana, ibuobu mai, kugbe ahwo kpokpọ na, a ti ru iwuhrẹ nọ e rẹ nyaharo viere.
12 Iyẹrẹ Emamọ Obokparọ no Obọ Otafe Ze: Ibroshọ Gwọlọ gbe obe Eriariẹ na i fiobọhọ gaga no evaọ e ru kpata ọ eruo ilele na. Nọ ibroshọ Gwọlọ na u tei obọ no, oniọvo jọ evaọ Bolivia ọ tẹ nwane rehọ iẹe mu uwuhrẹ họ kugbe ọzae jọ. Emerae ene nọ i lele i rie evaọ okokohọ ubrotọ jọ, ọmọ-uwuhrẹ ọnana ọ tẹ jọ usu ahwo evawere nọ e họ-ame!
13 Oma o be wọ ahwo buobu re a rọ izuazọ rai mudhe kẹ Jihova nọ a te wuhrẹ obe Eriariẹ na re no. Evaọ ukoko jọ evaọ Angola, unu iwuhrẹ Ebaibol nọ iwhowho-uvie na a bi ru i vihọ no 190 kpohọ 260 yọ ahwo nọ e be ziọ ewuhrẹ i vihọ no 180 kpohọ 360 evaọ emerae ene ọvo nọ a muọ obe Eriariẹ na họ ero ruiruo no evaọ oria oyena. U kri hi, u te fo nọ a rọ ukoko ọfa mu.
14 Nọ o muọ uwuhrẹ ọsosuọ riẹ họ no evaọ obe Eriariẹ na, oniọvo jọ ọ tẹ ta nọ re a rehọ iẹe wuhrẹ o “lọhọ otẹrọnọ owuhrẹ na ọ rẹ n’enọ na ọvo, se ikereakere jọ nọ i fo, u ve je muei ẹro nnọ ọmọ-uwuhrẹ na o wo otoriẹ rai.” Dede nọ ọ jẹ hai roro nọ iwhowho-uvie nọ i te ọvo a rẹ sai ru emamọ iwuhrẹ Ebaibol jegbe nọ ọ sai ru ei vievie he, uwhremu na o te ti vuhumu nọ ọ sai ru ei, ọ tẹ ta nọ: “Otẹrọnọ mẹ sai ruei, ohwo kpobi ọ sai ruei.”
15 Okenọ ma bi ru iwuhrẹ Ebaibol wọhọ abọ odibọgba mai họ okenọ ma je ru iruo aru ilele mai gba. Ahwo nọ a wo ẹgba nọ a re ro w’abọ evaọ ofẹ odibọgba ọnana a ruẹ no nnọ o rẹ v’eva ziezi jẹ kẹ erere gaga. Jọ a tae kpahe omai inọ ma be ‘vuẹ ovuẹ uvie Ọghẹnẹ . . . je bi wuhrẹ eware kpahe Olori na Jesu Kristi avọ udu kpobi.’—Iruẹru 28:31.