Ekareghẹhọ Uwhu Kristi Evaọ Akpọ-Soso
1 Jihova o ku eghale buobu ku omai no. A dhesẹ iyẹrẹ ọ ewoma gbe uyoyou-ẹwo riẹ vevẹ wọhọ “okẹ riẹ nọ a sae ruẹ unu ta ha!” Ẹhẹ, fiki epanọ ‘aruoriwo Ọghẹnẹ’ o gbunu te, ma wo ẹgba nọ ma sai ro dhesẹ iẹ hẹ.—2 Kọr. 9:14, 15.
2 Okẹ Riẹ nọ O Mae Rro: Jesu Kristi, wọhọ Ọnọtahwonigbo, ọye họ okẹ nọ o mae rro kpobi. Evaọ edhesẹ uyoyou riẹ kẹ akpọ ahwo-akpọ, Jihova o siobọno Ọmọ oyoyou riẹ nọ ọye ọvo ọ mae. (Jọn 3:16) Oghale aruoriwo otiọye nọ o no obọ Ọghẹnẹ ze na o gwọlọ ekareghẹhọ akpọ-soso. Okevẹ gbe oghẹrẹ vẹ? Eva owọwọ orọ Edene-Oka, April 1, 1999, Ileleikristi akpọ na soso a ti ru ekareghẹhọ Emu Owọwọ Olori na, ekoko Ekareghẹhọ idheidhe nọ e mae rro kpobi na.—1 Kọr. 11:20, 23-26.
3 Kristi o whu k’omai makọ “okenọ ma gbẹ jọ erahaizi,” yọ ma rẹ sai dhesẹ uyere mai ẹkwoma Ekareghẹhọ uwhu riẹ nọ ma re ru gbe ẹkwoma ọ amọfa nọ ma re zizie re a jariẹ kugbe omai evaọ ehaa yena nọ e mai w’uzou kpobi na.—Rom 5:8.
4 Ehaa nọ E Mai w’Uzou: Ekoko ehaa uwhu Kristi na o mai dhesẹ nnọ ọ kpare esuo-okpehru Ọghẹnẹ kpehru ababọ epe. O tẹ jẹ kareghẹhọ omai nnọ ma rẹ sae reawere edikihẹ ọfuafo eva aro Jihova ẹkwoma ẹrọwọ fihọ idhe ọ Jesu, ma vẹ rehọ ere wo imuẹro esiwo. (Iruẹru 4:12) Uzẹme, onana họ ehaa nọ e mai w’uzou evaọ ẹgbukpe na!
5 Uyoyou kẹ erivẹ mai u re dhesẹ oma via evaọ uzizie nọ ma re zizie ai re a lele omai koko Emu Owọwọ Olori na. Irere ẹtanigbo na e gbẹ rrọ kẹ ima ahwo nọ a wuhrẹ kpahe aghare obọdẹ riẹ. (Fil. 3:8) Ahwo nọ a fi ẹrọwọ họ idhe Kristi a rẹ sai wo ẹruore ọgaga ọrọ uzuazọ ebẹdẹ bẹdẹ.—Jọn 17:3.
6 Ezi Ekareghẹhọ na o k’omai uvẹ nọ ma re ro dhesẹ ovuhumuo kẹ aruoriwo ologbo Ọghẹnẹ. Onana yọ obọdẹ oke nọ a rẹ jọ w’obọ evaọ ẹvuẹ emamọ usi Uvie Ọghẹnẹ avọ ọwhọ. Irere ilogbo e be hẹrẹ ahwo kpobi nọ a rehọ oma olẹ roro kpahe okẹ ọvọvẹ Jihova nọ a rẹ sai gbiku riẹ hẹ na je ru ọruẹrẹfihotọ re a jariẹ eva ehaa Emu Owọwọ Olori na evaọ enukpe ọnana!