Whọ Thomakpahe No Re Whọ Riobe?
1 Ẹme Ọghẹnẹ, Ebaibol na, o fi ẹgwọlọ na họ Ileleikristi oma re a “thomavẹre kẹ iruo iwoma i ruo kpobi” ẹkwoma eriariẹ nọ o rẹ kẹ. (2 Tim. 3:17) Idibo Jihova kpobi a be rehọ ere thomakpahe ziezi ẹkwoma iwuhrẹ na. Ekpako nọ e sai se je kere uvumọ ẹvẹrẹ hẹ a wo erere ọdawẹ ọ ukoko Jihova no. Ere a muẹro họ iẹe okejọ evaọ emagazini na U.S. Catholic inọ “ewuhrẹ nọ Ọgwa Uvie ọvo ọ rẹ kẹ ekpako evaọ amara o vi onọ okogho ọ Katọlik ọ rẹ kẹ evaọ ukpe soso.”
2 Ewuhrẹ ekpako otiọye na o kpomahọ ewuhrẹ ọriẹse-gbe-ekere kẹ ekpako nọ e sai se je kere he, kugbe ithubro buobu erọ Ebaibol nọ a ruẹrẹ họ re e kẹ ekwakwa nọ e r’oja kẹ uzuazọ Oleleikristi, kugbe emamọ ẹruọsa emọ. Rekọ eme u dhesẹ re a thomakpahe? Ofeme jọ o fa thomakpahe wọhọ ‘re a kẹ ohwo oware nọ u fo, rọkẹ ẹjiroro hayo iruo jọ.’
3 Nọ o ta no inọ udevie ọ 1962 avọ 1976, evaọ Nigeria ọvo, a wuhrẹ ahwo 15,156 re a riẹ se je kere no, Awake! ọrọ February 22, 1978, o te fibae nnọ: “Ibuobu rai a no eria nọ i riaro ho ze—ewhẹrẹ, izuẹ, ikuori, eyae uwou-orọo. Osegboja rai re a wo eriariẹ Ebaibol re a jẹ sae kẹ ithubro Ikereakere o wariẹ kpare isiuru rai kẹ ewuhrẹ ze.” Ẹvẹ onana o rrọ obọdẹ ẹjiroro kẹ ese gbe ekere te! Kọ osegboja otiọye na ọ gbẹ were Jihova? Didi ekwakwa i fo rokẹ obokparọ ewuhrẹ ekpako ẹkwoma omaa ọriẹse-gbe-ekere?
4 Ekwakwa nọ E r’Oja: Jihova ọ ta kẹ ọruẹaro na Aizaya inọ: “Rehọ ẹwẹ utho ọgbagbada re whọ rehọ ugbẹ kere fihọ iẹ.” (Aiz. 8:1, NW ) Ababọ avro, ọruẹaro na ọ thomakpahe kẹ iruo nọ e jọ kẹe na. Fikiere, nọ u te no ohwo eva ze o te je ru uvẹ fihọ no, o re wo ekwakwa omobọ ohwo nọ o re ro wuhrẹ hrọ: obe-ewuhrẹ na (How to Read and Write), obe nọ a re kere fihọ, uvoro, gbe opẹsoro hayo ugbẹ nọ a re ro kere eware evaọ eklase. O rẹ mai fo re a wo ekwakwa nana fihọ ẹkpa nọ a dabe ruẹrẹhọ kẹ ewuhrẹ na.
5 Nwanọ epanọ uketha ọsẹ gbe oni o rrọ usiavẹ kẹ emamọ ewuhrẹ emọ na, ere uketha uviuwou o rrọ evaọ ewuhrẹ ekpako na. Uketha utioye na u re kugbe adhẹẹ ọ rọ kẹ ekwakwa isukulu ọkpako na, isiuru kẹ iruo isukulu riẹ, gbe ọrọwokugbe re u fiobọhọ kẹ ọkpako na wo oware nọ ọ gwọlọ na t’obọ.
6 Roro oware nọ ọwhẹrẹ o re ru otẹrọnọ ọ gwọlọ muọ udhu elẹ họ. Ọ rẹ kaki fiotọ na je kporo udhu na. Onana u dhesẹ nọ ọ rẹ dẹ ẹwhẹ gbe ọpia. Kẹsena ọ vẹ gwọlọ emamọ elẹ. Ẹvẹ ọwhẹrẹ na ọ rẹ kparobọ te ababọ ekwakwa itieye na nọ e r’oja na? Ọ rẹ sai wo ẹbẹbẹ evaọ iruo na, rekọ o rẹ jọ lọlọhọ kẹ ọwhẹrẹ nọ ọ thomakpahe re o thihakọ ebẹbẹ itieye na rite oke ivuẹvu. Wọhọ epanọ o rrọ kẹ ọwhẹrẹ, ere o rrọ kẹ ohwo nọ o bi wuhrẹ ẹriẹ se gbe ekere—o re wo ekwakwa nọ e r’oja hrọ. Ẹvẹ ọwhẹrẹ o re wo evevọwẹ te otẹrọnọ, o ru iruo gaga no, eware nọ ọ kọ i te woma! Otẹrọnọ who fiodẹ h’otọ kẹ ewuhrẹ ọriẹse-gbe-ekere na, kọ whọ thomakpahe no re whọ riobe?