Ru Uzizie Kẹre te Ohwo Kpobi nọ Uruame U Bi Kpe
1 Wọhọ epanọ ọruẹaro na Emọs ọ ruẹaro, uviuwou ohwo-akpọ o be ruẹ uye orọ “uru-ame he, rekọ o rọ [eyo] ẹme ỌNOWO na.” (Emọs 8:11) Re u fiobọhọ kẹ ahwo nọ a rrọ uyero uruame abọ-ẹzi na, ma be ta kẹ ae kpahe eruẹrẹfihotọ Ọghẹnẹ kẹ esiwo ahwo ro no uzioraha gbe uwhu, onọ a jọ uzou urere Eviavia na dhesẹ wọhọ “ethẹ ame uzuazọ.” Ma wo uvẹ nọ ma re ro ru uzizie kẹre te ohwo kpobi nọ uru-ame ẹrẹreokie u bi kpe re o ‘mi ame uzuazọ ọvọvẹ na.’ (Evia. 22:1, 17) Ẹvẹ ma sai ro ru onana evaọ August? Ẹkwoma efihada ibroshọ sa-sa rọkẹ ahwo nọ a wo uvi isiuru. Whọ sae gwọlọ dawo idhere ẹmeọta enana:
2 Nọ ahwo buobu a wo ọdawẹ kpahe ẹme ọ omokpokpọ na, edhere emuhọ ọnana o sai woma k’owhẹ ẹkwoma ibroshọ na “Kọ Ọghẹnẹ Ọ Be Ghinẹ Daezọ Mai?”:
◼ “Ahwo buobu a wo ọdawẹ kpahe unuigho oma-usiwo nọ u bi dhe ẹghẹghare na. Ẹsejọhọ who roro kpahe ẹme ọnana no. [Kuvẹ kẹ uyo.] Kọ ifue oke kpobi jọ e rrọ kẹ ẹbẹbẹ ọnana? [Hẹrẹ uyo.] Ẹruore ogbunu jọ ọ rrọ etenẹ.” Se Eviavia 22:1, 2. Who ve rovie ibroshọ na kpohọ uwoho nọ o rrọ ẹwẹ-obe avọ 24, whọ vẹ rehọ edhe-ẹme avọ 11 ro dhesẹ ẹme na vevẹ. Ta enẹ ro kuhọ: “Obe onana o ta kpahe owọ nọ whọ rẹ jẹ nọ o rẹ lẹliẹ owhẹ rri kparo avọ udufihọ kpohọ ẹrria evaọ akpọ ọkpokpọ ogbunu Ọghẹnẹ.” Fi ibroshọ na họ ada evaọ ₦15. Ru ọruẹrẹfihotọ kẹ ozihebro.
3 Okenọ who te bi ru ozihebro na, whọ sae wariẹ mu ẹmeọta ra họ enẹ:
◼ “Ẹdẹ nọ mẹ nyaze, ma ta kpahe ifue ebẹdẹ bẹdẹ kẹ ẹbẹbẹ ẹyao. Kọ who roro nọ oke jọ o te tha nọ ohwo ọvo ọ gbẹ te mọ họ? [Kuvẹ kẹ uyo.] Muẹrohọ ẹme isiuru nana.” Se Aizaya 33:24. Who ve rovie kpohọ Uwuhrẹ avọ 5 evaọ ibroshọ Gwọlọ na, jẹ t’ẹme kpahe edhe-ẹme avọ 5-6, jẹ nọ enọ nọ i kie kpahe ae eva emuhọ uwuhrẹ na je se umutho ikereakere jọ nọ a fodẹ na. Fodẹ nnọ esino ẹyao gbe uwhu yọ abọjọ orugba ọ ẹjiroro ọsosuọ Ọghẹnẹ kẹ otọakpọ na. Ru ọruẹrẹfihotọ re who zihe re wha wuhrẹ edhe-ẹme 1-4 gbe 7 evaọ uwuhrẹ ovo na.
4 Otẹrọnọ usi kpahe uwhu idudhe jọ o rrọ iroro ahwo, whọ sae dawo edhere ẹmeọta ọnana ẹkwoma ibroshọ “Okenọ Ohwo nọ Who You O te Whu” na:
◼ “Ẹsejọhọ who yo kpahe [fodẹ usi] na no. Evaọ okenọ iwhu idudhe e tẹ via, u re gbe ahwo buobu unu kpahe omosasọ nọ a sae kẹ iviuwou ọ ahwo nọ a whu na. Kọ ẹvẹ who roro?” Kuvẹ kẹ uyo. Who ve rovie kpohọ ẹwẹ-obe avọ 30 je dhesẹ ughe ọ ẹkparomatha nọ uwoho riẹ o rrọ etẹ na. Ta haro nọ: “U re gbe ahwo buobu unu nọ a te wuhrẹ nọ a ti zihe ahwo nọ a kiẹrẹe gbe enọ i kiẹrẹe he ziọ uzuazọ evaọ Aparadase eva otọakpọ. [Se Iruẹru 24:15 je dhesẹ iẹ vevẹ.] Ibroshọ nana o ta eme efa kpahe ẹjiroro Ọghẹnẹ kẹ obaro. Otẹrọnọ o were owhẹ re who gbe wuhrẹ kpahe iẹ, whọ sae rehọ onana evaọ azọhọ ₦15.” Ru ọruẹrẹfihotọ re who zihe, muẹrohọ ugogo isiuru gbe ọdawẹ ohwo na.
5 Okenọ who te zihe, nwene ẹmeọta ra lele ọnọ o wo uwou na. Ẹsejọhọ whọ sae ta nọ:
◼ “Oke ẹdẹ nọ ma t’ẹme, ẹme jọ nọ whọ ta kpahe ẹjiroro Ọghẹnẹ kẹ otọakpọ na ọ were omẹ gaga. [Wariẹ ẹme na.] Mẹ ruẹ eme obe jọ nọ me roro nọ u ti siowhẹ urru.” Rovie ibroshọ Gwọlọ na kpohọ Uwuhrẹ avọ 5. Se jẹ t’ẹme kpahe idhe-eme buobu evaọ uwuhrẹ oyena te epanọ ohwo nọ o wo uwou na ọ rẹ kezọ te. Nọ who te fi oke họ nọ who ti ro zihe re wha ru uwuhrẹ na haro no, rehọ obe-uzizie kẹ ọnọ o wo uwou na nọ u dhesẹ oke ewuhrẹ ukoko na. Ta kpahe Ovuẹ Ogbotu na, je zizie ei re ọ nya ze.
6 Otẹrọnọ ẹmeọta ọlọlọhọ nọ a rẹ rehọ omobe-ovẹvẹ ru whọ mae gwọlọ, whọ sae ta nọ:
◼ “Mẹ gwọlọ re who wo omobe-ovẹvẹ onana nọ uzoẹme riẹ o ta nọ What Hope for Dead Loved Ones?” Rehọ iẹ kẹ ọnọ o wo uwou na, je zizie ei re o rri lele owhẹ nọ who bi se edhe-ẹme ọsosuo na. Kẹe uvẹ re ọ kuyo kẹ onọ nọ o rrọ uhie-ẹme urere na. Se edhe-ẹme avọ ivẹ na, je rovie kpohọ uwoho nọ o rrọ ẹwẹ-obe avọ 31 na evaọ ibroshọ Eme Họ Ẹjiroro Uzuazọ? na. Ta haro nọ: “Obe onana o ta eme efa buobu kpahe ẹkparomatha na gbe eyaa igbunu Ebaibol rọkẹ obaro na. Onana o rẹ sae jọ ora evaọ azọhọ ₦15.” Ru ọruẹrẹfihotọ kẹ ozihebro.
7 Uzizie isiuru nọ ma rẹ kẹre te amọfa o rẹ sae lẹliẹ ae nya ziọ ame uzuazọ na, onọ Jihova o bi ru via enẹna. Fikiere, joma ta kẹ ohwo kpobi nọ uru-ame u bi kpe inọ, “Nyaze”!—Evia. 22:17.