Ẹkpẹti Onọ
◼ Fikieme o jẹ kẹ ogbotu na erere re a rri ikereakere evaọ okenọ oruẹme o te zizie ae re a ru ere eva etoke ẹme riẹ?
Eware wọhọ uzoẹme nọ a be t’ẹme kpahe na jegbe sọ ẹme na ọ gwọlọ ẹkiẹriwo n’owọ t’owọ ọrọ abọjọ Ẹme Ọghẹnẹ i re dhesẹ unu ikereakere nọ a re zizie ogbotu na re a rovie.
O r’oja re a woi họ iroro nọ ẹjiroro ọvo jọ nọ a re ro se ikereakere họ re a dhesẹ nọ oware nọ a be ta na u no Ebaibol ze. (Iruẹru 17:11) Ẹjiroro ọfa họ re a kiẹ imuẹro Ikereakere nọ e tha oware nọ a be t’ẹme kpahe na uke re o sae bọ ẹrọwọ ahwo na kpobi ga. Nọ a tẹ ruẹ oware nọ Ebaibol na ọ ghinẹ ta evaọ okenọ a te bi se ugogo ikere jọ o rẹ lẹliẹ ẹme na daruọ iroro na viere. Fiba eriwi ikereakere, eme nọ a re kere fih’otọ gbe ẹnya lele ẹjiroro ẹme nọ a be ta na e rẹ k’erere.
Nọ omaa-ẹmeọta Society o rẹ fodẹ oria Ikereakere buobu evaọ orukẹre uzoẹme na, a ruẹrẹ enana họ rọkẹ erere oruẹme na, re i fiobọhọ kẹe evaọ omaruẹrẹhọ riẹ. Enana e rẹ sae kẹe ehri otofa ovuẹ na je fiobọhọ kẹe re o wo ehri-izi Ikereakere na họ iroro ziezi re o wo otoriẹ nọ o re ro ru uzoẹme na kẹre. Oruẹme na o re vuhu ikere nọ i wuzou kẹ orukẹre ẹme na o ve je zizie ogbotu na re a rri lele ei nọ o te bi se je ru ikere na vẹ. A rẹ sae fodẹ hayo dina dh’unu te ikere edekọ na nọ e tha ẹme na uke na, rekọ evaọ oke utioye na u du fo re ogbotu na a rovie kpohọ ikereakere na ha.
Okenọ oruẹme na o te bi se ikereakere nọ ọ salọ, o re se no Ebaibol na ze dẹẹ, orọnikọ no obe nọ a rehọ ekọmputa kere ze he. Okenọ oruẹme na o te zizie ogbotu na re a se lele iei, ọ rẹ fodẹ obe Ebaibol na, uzou na, gbe owọ na vevẹ. Re a dhizu omojọ rọ nọ onọ jọ hayo t’ẹme kpẹkpẹe kpahe ẹjiroro nọ a bi ro se ikere na, o rẹ kẹ ogbotu na oke nọ a rẹ rọ ruẹ oria ikereakere na. Ẹwariẹ-fodẹ oria ikereakere na u re fiobọhọ kẹ ogbotu na kareghẹhọ oria na. Dede na, uwoma tere he re a fodẹ inọmba ẹwẹ-obe na, keme inọmba ẹwẹ-obe ọ oghẹrẹ Ebaibol nọ ahwo nọ a rọ ogbotu na a kru e rẹ sai wo ohẹriẹ. Eriwi ikereakere na evaọ okenọ a te zizie ogbotu na re a ru ere u re fiobọhọ kẹ ai wo erere no ogaga Ẹme Ọghẹnẹ ze nọ a bi ru ei vevẹ evaọ etoke ẹmeọta na.—Hib. 4:12.