Eyewọ—Wha Bọ Iruemu Ezi Fihọ Emọ Rai
1 A re yẹ ohwo avọ uruemu ezi hi, yọ a re woi kpregede he. Ofariẹ, re a bọ iruemu ezi fihọ emọ o rẹ rehọ oke. “Bọ” u dhesẹ “re a kẹ ẹmẹrera” hayo “re a fihọ ẹmẹrera.” O gwọlọ ọrọwokugbe mi eyewọ re a sai “ru [emọ rai] re a yo ẹme je wuhrẹ ai orọ Ọnowo na.”—Ẹf. 6:4.
2 Muhọ no Emaha Ze: Ẹgba emaha na nọ a re ro wuhrẹ je ru eware ekpokpọ o gbunu. Dede nọ o rẹ jọ bẹbẹ kẹ ekpako na re a wuhrẹ ẹvẹrẹ ọkpokpọ, emọ nọ i ri mu isukulu họ họ a rẹ sai wuhrẹ evẹrẹ ivẹ hayo esa evaọ okiọvo na. Who roro vievie he inọ ọmọ ra ọ kawo hrọ re o wuhrẹ emamọ iruemu. Otẹrọnọ a kaki muọ uthubro kpahe uzẹme Ebaibol họ jẹ ruabọhọ iẹe, bọo okenọ ọmọ na ọ te kpako te umutho ikpe jọ no, iroro riẹ e te vọ avọ eriariẹ nọ i ti ru ei “wha ẹro te usiwo.”—2 Tim. 3:15.
3 Ru Usiuwoma Ota Fihọ Uruemu: Uruemu ezi jọ nọ a rẹ bọ evaọ etoke ikpe orro ọmọ họ onọ a re ro whowho emamọ usi Uvie Ọghẹnẹ na ẹsikpobi. Eyewọ buobu a re muọ onana họ ẹkwoma emọ rai nọ a re kru lele oma evaọ odibọgba ọ n’uwou ruọ uwou na evaọ okenọ emọ na e gbẹ rọ emaha na. Abọ-owo ẹsikpobi ọrọ esẹ gbe ini evaọ iruo isẹri-ise na o re fiobọhọ kẹ emọ rai bọ ovuhumuo gbe ọwhọ kẹ odibọgba na. Esẹ gbe ini a sai dhesẹ ke emọ epanọ a re ro w’obọ evaọ isẹri ise evaọ k’abọ k’abọ usiuwoma ota na.
4 Re a kere odẹ fihotọ evaọ Isukulu Odibọgba Ọghẹnẹ na u re je fiobọhọ kẹ emọ. U re wuhrẹ ae emamọ iruemu ọ uwuhrẹ gbe epanọ a re ro se avọ otoriẹ. A re wuhrẹ re a t’ẹme-kugbe kpahe Ebaibol na, ru izihebro, je ru iwuhrẹ Ebaibol. Ewuhrẹ otiọye na ọ rẹ sae kẹ ae ọwhọ re a ru iruo ọkobaro je te kẹ uvẹ iruo obọdẹ. Ahwo Ebẹtẹle gbe imishọnare buobu a rẹ kareghẹhọ edẹ emaha rai evaọ isukulu na avọ evawere je rri rie wọhọ ọruẹrẹfihotọ nọ o fiobọhọ kẹ ae bọ iruemu ezi.
5 Mai kpobi ma wọhọ ọviẹẹ evaọ obọ Ọmebẹ Ologbo na, Jihova. (Aiz. 64:8) Epanọ ọviẹẹ na ọ kpokpọ te, ere ọ rẹ lọhọ ẹma te. Epanọ ọ ya te, ere ọ rẹ ga te. Ere o rọ kugbe ahwo re. Okenọ a tẹ rọ emaha, a rẹ sae kpọ ae—yọ epanọ a maha te, ere iyẹrẹ na i re woma te. Ikpe ọmaha rai na yọ ikpe orro, okenọ ẹma rai ọ te rọ romavia kẹ ewoma hayo kẹ eyoma. Wọhọ ọyewọ ẹruọsa, rehọ ẹruoke muhọ re whọ bọ iruemu ezi evaọ odibọgba Oleleikristi na fihọ emọ ra.