Uyoyou O be w’Omai Ta Usiuwoma Na
1 Wọhọ Isẹri Jihova, a riẹ omai ziezi fikinọ ma rrọ etausiuwoma ọwhọ erọ ovuẹ Uvie na. (Mat. 24:14) Evaọ akpọ-soso ma bu vi ima ezeza; ahwo ọkpokpọ a bi fiba unu na evaọ okenọ a te kuomagbe omai evaọ usiuwoma ota na. Unu ahwo nọ i w’obọ evaọ iruo nana a re ro ru ikeleakele na.
2 Eme ọ be w’omai fialoma ze kẹ iruo use-abọ utioye na? A be gba omai họ họ, a be rehọ ekwakwa efe rọ tae họ omai oma ha, hayo kọ a be k’omai ọghọ obọdẹ jọ. Oke ọsosuọ, ibuobu mai e jẹ dhozọ keme ma roro nọ ma te he, yọ ahwo otafe na a jẹ hai gbolo ovao k’omai ẹsibuobu. (Mat. 24:9) Ibuobu nọ i bi muẹrohọ omai a be sai wo otoriẹ oware nọ o be w’omai hi. Ẹjiroro ọgbahọ jọ ọ rẹ jariẹ hrọ nọ ma bi ro thihakọ.
3 Ogaga Uyoyou: Jesu o dhesẹ ujaje nọ o mae rro kpobi evaọ okenọ ọ ta nọ ma ‘rẹ rehọ udu, ẹwẹ, iroro, gbe ogaga mai kpobi ro you Ọnowo na.’ (Mak 12:30) Uyoyou mai kẹ Jihova u no iroro ikokodo erọ ovuhumuo kẹ oghẹrẹ ohwo nọ ọ rọ ze—Osu nọ Ọ Mai Kpehru, Ọnọma eware kpobi, ọnọ o ‘te kẹ orro, ọghọ, gbe ogaga.’ (Evia. 4:11) A rẹ sae rehọ oware ovo wawọ ekwakwa igbunu riẹ hẹ.—Ọny. 34:6, 7.
4 Ẹriẹ gbe eyou Jihova o rẹ w’omai re ma ru elo mai lo kẹ ahwo. (Mat. 5:16) Elo mai o re lo evaọ okenọ ma te jiri ei evaọ ẹgbede, ta kpahe iruo igbunu riẹ, jẹ vaha ovuẹ kpahe Uvie riẹ. Wọhọ enjẹle nọ ọ rrọ idadeghe na, ma wo “usiuwoma ebẹdẹ bẹdẹ na nọ [ma] re woro . . . rọkẹ erẹwho gbe erua gbe evẹrẹ gbe ahwo kpobi.” (Evia. 14:6) Uyoyou mai họ ẹgba nọ ọ rọ emu iruo usiuwoma ota akpọ-soso na.
5 Akpọ na o bi rri usiuwoma ota mai wọhọ oware “ugheghẹ” nọ a rẹ gaviezọ kẹ hẹ. (1 Kọr. 1:18) A ru omodawọ sa-sa no re a nyẹ iruo mai nyaotọ. Uyoyou omarokpotọ mai o k’omai ẹgba no re ma whowho, wọhọ ikọ na inọ: “Ma rẹ sae siọ oware nọ ma ruẹ je yo ba ẹta ha . . . Ma re yo ẹme Ọghẹnẹ vi o rọ ahwo.” (Iruẹru 4:20; 5:29) Iruo usiuwoma ota na e gbẹ be rro haro evaọ otọakpọ na kpobi ghelọ ọwọsuọ.
6 Uyoyou mai kẹ Jihova o wọhọ erae nọ e rẹ tua nọ o rẹ w’omai re ma whowho oruaro riẹ kẹre. (Jeri. 20:9; 1 Pita 2:9) Ma ti gbe “dhesẹ iruo riẹ vevẹ eva erẹwho na . . . keme o ru eware urirẹ”!—Aiz. 12:4, 5.