Muẹrohọ Iruo Igbunu Ọghẹnẹ
1 Evaọ edẹ esa obọdẹ, ma kokohọ evaọ Okokohọ Ubrotọ “Enọ I Bi Ru Ẹme Ọghẹnẹ” na. Ma si iroro mai no awaọruọ ikẹdẹ kẹdẹ uzuazọ, ma tẹ tẹrovi iruo igbunu Jihova. A ru ọruẹrẹfihotọ na re o ru ẹrọwọ mai fihọ Ọghẹnẹ gbe Ẹme riẹ rro haro, re o bọ usu mai kugbei ga, je ru ọwhọ mai kẹ odibọgba na ga viere. Ẹvẹ ma bi wo erere no eware nọ a wuhrẹ omai na ze?—Jọn 13:17.
2 Iviuwou A re Yoẹme kẹ Ẹme Ọghẹnẹ: Ọzọhọkugbe-eriariẹ na “Yoẹme kẹ Ẹme Ọghẹnẹ” o fiobọhọ k’omai kiẹ eyero abọ-ẹzi iviuwou mai. O rẹ were emọ re a wuhrẹ. Fikiere, a tuduhọ esẹ gbe ini eg’Ọghẹnẹ awọ re a ru uwuhrẹ Ebaibol uviuwou fihọ otọhotọ orọ ebabọ uviuwou ogaga abọ-ẹzi. Ibuobu enọ i w’uzou uviuwou a be rehọ ibroshọ ọkpokpọ na Whọ Rẹ Sae Jọ Ogbẹnyusu Ọghẹnẹ! ro wuhrẹ emọ rai. Onana u ti fiobọhọ kẹ ae bọ usu evawere gbe orọ ufuoma kugbe Jihova. Eyewọ, wha wuhrẹ emọ rai epanọ a rẹ rọ tẹrovi iroro Ọghẹnẹ. Hae ta uyoyou nọ who wo kẹe gbe iruẹru riẹ via. (Ol. 103:2) Wha ruiruo kugbe re wha ru jẹ nyate itee abọ-ẹzi nọ i wo obọ kpahe abọ-owo vọvọ evaọ egagọ Jihova.
3 Ẹme Ọghẹnẹ O re Fi Elo Họ Edhere Mai: Eva e were omai nọ ma wo obe okpokpọ na Isaiah’s Prophecy—Light for All Mankind I. Ẹvẹ who se uko ọsosuọ na thabọ te no? Obe Aizaya o ruẹaro ẹdhoguo idudu rọkẹ erẹwho nọ e riẹ Ọghẹnẹ hẹ na, ọ tẹ jẹ ruẹaro eghale Uvie iwoma rọkẹ ahwo Ọghẹnẹ. (Aiz. 34:2; 35:10) O rẹ jẹ bọ ẹrọwọ gbe evaifihọ kpahe Jihova gbe edhere nọ o re ru eware riẹ.—Aiz. 12:2-5.
4 Who te bi se Isaiah’s Prophecy I na, whọ rẹ sai wo otoriẹ vẹrẹ kpahe epanọ Aizaya ọ rọ yọrọ ẹgbakiete riẹ kẹ Jihova dede nọ emuemu ọ wariẹ e riẹ họ. Okenọ a zizie ei re ọ jọ ọwhovuẹ Ọghẹnẹ, Aizaya ọ kuyo nọ: “Mẹ na! Vi omẹ.” (Aiz. 6:8) Eroro kpahe ẹzi unevaze riẹ o te tuduhọ owhẹ awọ re whọ gbẹ hai whowho emamọ usi na, w’obọ vọvọ evaọ ese “isẹi kẹ erẹwho akpọ na kpobi.”—Mat. 24:14.
5 Ma te bi muẹrohọ iruo igbunu Jihova u re ru oruaro riẹ kpehru. Fikiere riwi uvẹ-ọghọ nọ a rẹ rọ jọ enọ i bi ru ẹme Ọghẹnẹ ghaghae!