Jọ Iru—Orọnikọ Iyo Ọvo Ho
1 Ileleikristi uzẹme inẹnẹ a re si ohrẹ Ebaibol na tudu re a jọ iru ẹme na, orọnikọ iyo ọvo ho. (Jem. 1:22) Onana o tẹ hẹriẹ ai gaga no ahwo nọ a ta nọ ae yọ Ileleikristi, yọ a be rọ igbenu gheghe gọ Ọghẹnẹ. (Aiz. 29:13) Jesu ọ ta vevẹ inọ enọ i bi ru oreva Ọghẹnẹ ọvo a re ti siwi.—Mat. 7:21.
2 Egagọ nọ e kare iruẹru Ọghẹnẹ yọ ifofe. (Jem. 2:26) Fikiere ma rẹ nọ omobọ mai nọ: ‘Ẹvẹ iruo mẹ i ro dhesẹ nọ ẹrọwọ mẹ yọ omamọ? Eme u dhesẹ nọ mẹ be ghinẹ rria lele oware nọ mẹ rọwo? Ẹvẹ mẹ sae rọ rehọ aro kele Jesu vọvọ viere?’ Iyo oruọzewọ kẹ enọ nana i re ti fiobọhọ k’omai ruẹ ẹnyaharo nọ ma ru no hayo onọ u fo nọ ma re gbe ru evaọ eruo oreva Ọghẹnẹ.
3 Wọhọ ilele Jesu, ma re wo ute ọsosuọ ọvo na evaọ uzuazọ wọhọ onọ ọ so ilezi na ọ ta: “Eva Ọghẹnẹ ma je seha kẹse kẹse, ma vẹ te kpẹwẹ odẹ ra kẹse kẹse.” (Ol. 44:8) Ọghẹnẹ-ọgọ yọ edhere uzuazọ nọ u re dhesẹ oma riẹ via kẹdẹ kẹdẹ jegbe eva oware kpobi nọ ma bi ru. Ẹvẹ eva e rẹ vọ omai te nọ ma tẹ be jọ iruẹru mai kpobi dhesẹ isiuru udu mai re ma jiri Jihova!—Fil. 1:11.
4 Ujiro rọ kẹ Jihova U viọ Ẹria Uzuazọ nọ U Kiete: Otẹrọnọ uruemu uwoma ọvo họ oware nọ Ọghẹnẹ ọ gwọlọ, koyehọ ma rẹ rẹriẹ ova ku ẹkpọhọ uruemu mai ọvo. Ghele na, egagọ mai i kugbe ewhowho oruaro Jihova jegbe ewhowho odẹ riẹ evaọ ẹgbede!—Hib. 13:15; 1 Pita 2:9.
5 Iruo usiuwoma ota evaọ ẹgbede na o rọ usu iruo obọdẹ nọ ma bi ru. Jesu ọ rehọ oma riẹ kpobi kẹ iruo enana keme ọ riẹ nọ ọ te jọ uzuazọ ebẹdẹ bẹdẹ kẹ ahwo nọ a te gaviezọ. (Jọn 17:3) Nẹnẹ, ‘odibọgba ẹme na’ ọ r’oja gaga re; ọye ọvo họ edhere nọ a re ro siwi ahwo. (Iruẹru 6:4; Rom 10:13) Ma te roro kpahe irere buobu riẹ, ma re wo ovuhumuo oware nọ o soriẹ nọ Pọl ọ jẹ tudu họ omai awọ nọ ma “vuẹ ovuẹ ẹme na” je “mu ọwhọ riẹ.”—2 Tim. 4:2.
6 Ẹvẹ ejiro Jihova ọ rẹ vọ izuazọ mai te? Ọnọ ọ so ilezi na ọ ta nọ o jọ iroro riẹ bẹsenọ oke u ro kpo. Kọ ogbẹrọnọ epavo na o rẹ j’omai oma re? E, yọ ma re riwi ohwo kpobi nọ ma nyaku wọhọ uvẹ nọ ma rẹ rọ t’ẹme kpahe odẹ Jihova. Ma rẹ gwọlọ uvẹ nọ u fo re ma kpọ ẹmeọta mai kpohọ eware ẹzi. Ma rẹ jẹ daoma re ma wo abọ ẹsikpobi evaọ iruẹru usiuwoma ota ẹsikpobi nọ ukoko na o ruẹrẹ fihọ. Ahwo nọ oma o kẹ uvẹ a sai roro kpahe iruo ọkobaro na ziezi, keme onana u re fiobọhọ k’omai fi iruo usiuwoma na họ obaro evaọ uzuazọ ekẹdẹ kẹdẹ mai. Ẹme Ọghẹnẹ ọ k’omai imuẹro nọ ẹkwoma oreva Ọghẹnẹ nọ ma rẹ ruabọhọ, eva e rẹ te were omai.—Jem. 1:25.