“Wha Jọ Enọ I re Ru Lele Ẹme Na”

1-2. Eme o be lẹliẹ eva were idibo Ọghẹnẹ? (Jemis 1:22-25)

JIHOVA avọ Ọmọ riẹ a gwọlọ nọ eva e were omai. Ohwo nọ o kere Olezi 119:2 na ọ ta nọ: “Jọ eva e were enọ i bi ru lele ekareghẹhọ riẹ, enọ e be rọ udu rai kpobi gwọlọ iẹe.” Jesu omariẹ ọ tẹ jẹ ta nọ: “Eva e were enọ i bi yo ẹme Ọghẹnẹ je bi koko iei!”—Luk 11:28.

² Eva e be were omai idibo Jihova. Kọ eme o be whae ze? Eware buobu e riẹ nọ e be lẹliẹ eva were omai. Rekọ ọjọ nọ o wuzou gaga họ, fikinọ ma bi se Ẹme Ọghẹnẹ ẹsikpobi, ma tẹ be jẹ daoma ru oware nọ ma wuhrẹ.—Se Jemis 1:22-25.

3. Irere vẹ i re te omai nọ ma te bi ru eware nọ ma jọ Ẹme Ọghẹnẹ wuhrẹ?

³ Irere buobu i re te omai nọ ma tẹ rrọ “enọ i re ru lele ẹme na.” Erere jọ họ, o rẹ lẹliẹ omai ru oware nọ o rẹ were Jihova. Yọ ma tẹ riẹ nọ ma bi ru eva were Jihova, eva e rẹ were omai. (Ọtausi. 12:13) Ma te bi ru eware nọ ma jọ Ebaibol wuhrẹ, ma re lele ahwo uwou mai rria dhedhẹ. U re je ru nọ ma re ro lele inievo ukoko na riẹ yeri. Ẹsejọhọ irere itieye na i te owhẹ no. U te no ere no, ma te bi lele Ẹme Ọghẹnẹ, ebẹbẹ buobu nọ i bi te ahwo nọ a bi lele Ẹme Ọghẹnẹ hẹ, i re te omai hi. Ma rọwo fihọ ẹme nọ Devidi ovie na ọ ta. Nọ ọ ta ẹme te uzi Jihova, ijaje riẹ, gbe iziẹibro riẹ no, ọ tẹ ta nọ: “Ekoko rai o rẹ wha osohwa ulogbo ze.”—Ol. 19:7-11.

4. Fikieme o gbẹ lọhọ tere he re ma se Ebaibol ma ve ru eware nọ ma wuhrẹ?

⁴ Re a ta uzẹme, o nwane lọhọ tere he re ma wo uvẹ nọ ma re ro se Ẹme Ọghẹnẹ, ma ve je ru eware nọ ma wuhrẹ. Eware e vọ omai abọ nọ ma bi ru. Rekọ u fo re ma ru uvẹ fihọ nọ ma re ro se Ebaibol je wuhrẹ iẹe, re ma riẹ oware nọ Jihova ọ gwọlọ nọ ma ru. Ma te jọ uzoẹme nana ruẹ epanọ ma sai ro ru uvẹ fihọ sei ẹsikpobi. Ma ti je wuhrẹ epanọ ma sai ro roro kpahe eware nọ ma se, ma ve je ru ai.

RU UVẸ FIHỌ NỌ WHO RE RO SE ẸME ỌGHẸNẸ

5. Eware vẹ e rrọ otọ kẹ idibo Jihova nọ a bi ru nẹnẹ?

⁵ Mai idibo Jihova buobu ma wo uvẹ tere he. Eware e vọ riẹ nọ ma bi ru. Eware yena yọ eware nọ Ebaibol ọ ta nọ ma re ru. Mai ibuobu ma wo iruo nọ ma bi ru re ma sae rẹrote omamai gbe uviuwou mai. (1 Tim. 5:8) Inievo buobu a be rẹrote ahwo rai nọ a be mọ hayo enọ e kpako no. Ere ọvo ho, mai kpobi ma rẹ jẹ daoma ru uvẹ fihọ nọ ma re ro ru eware nọ i re ru oma mai jaja, ma vẹ jẹ rẹrote oma mai. U te no eware yena no, ma wo iruo nọ ma bi ru evaọ ukoko na. Iruo jọ nọ e roja gaga họ, usi uwoma na nọ ma rẹ rọ ajọwha ta. Kọ edele eware nọ e vọ otọ kẹ owhẹ na, ẹvẹ whọ sai ro ru uvẹ fihọ nọ who re ro se Ebaibol ẹsikpobi, roro kpahe eware nọ who se, who ve je ru ai?

6. Eme who re ru re isase Ebaibol i gbe vo owhẹ hẹ? (Rri uwoho na re.)

⁶ Ebaibol nọ ma re se ọ rrọ usu “eware nọ e mae roja” nọ u fo nọ mai Ileleikristi ma re ru. (Fil. 1:10) Fikiere u fo re Ebaibol nọ who re se o jọ usu eware nọ e mae roja kẹ owhẹ. Nọ olezi ọsosuọ o jẹ fodẹ oware nọ ohwo o re ru re eva e sae were iẹe, o ta nọ: “Uzi Jihova o rẹ were iẹe gaga, yọ ọ rẹ rọ unu kpotọ se uzi Riẹ te aso te uvo.” (Ol. 1:1, 2) Ẹme yena o dhesẹ nọ ma re fi oke họ nọ ma rẹ hai ro se Ebaibol. Kọ oke vẹ o mai kiehọ nọ ma re ro se Ebaibol? Ohwo kpobi o wo ọvuọ oke riẹ nọ u re kiehọ iẹe oma. Rekọ u fo re who fi ei họ oke nọ whọ te hai ro wo uvẹ kẹdẹ kẹdẹ, re isase na i gbe vo owhẹ hẹ. Oniọvo-ọmọzae jọ nọ a re se Victor ọ ta nọ: “O rẹ were omẹ re me se Ebaibol evaọ ohiohiẹ. Re a kake kpama evaọ ohiohiẹ, o rẹ were omẹ tere he. Rekọ oke yena mẹ rẹ rọ kpama se keme ẹsiẹe oma u re dhẹ omẹ, ababọ edo. Yọ oke yena iroro mẹ e mae rọ jọ oware nọ me bi se.” Kọ ohiohiẹ oye o te mai kiehọ kẹ owhẹ re? Nọ omara nọ, ‘Oke vẹ o mai kiehọ kẹ omẹ nọ me re ro se Ebaibol?’

RORO DIDI KPAHE EWARE NỌ WHO SE

7-8. Oghẹrẹ vẹ ma re se Ebaibol nọ eware nọ ma bi se na i gbe ro fiobọhọ kẹ omai hi? Kẹ oriruo.

⁷ Ẹsejọhọ eria nọ ma be hai se ẹsiẹvo u re theri gaga, fikiere ma be sai roro kpahe iẹe ziezi hi. Ẹsejọ ohwo o re se obe, rekọ ọ re nya no etenẹ te etẹe hẹ na, oware nọ o se na o thọrọ e riẹ ẹro no, hayo oware nọ ọ jariẹ kareghẹhọ u tulo ho. Kọ oware utioye u ru owhẹ no? U ru omai kpobi no. Oware utioye na o sai ru omai nọ ma te bi se Ebaibol. Ẹsejọhọ u wo unu izou nọ ma fihọ inọ ma re se evaọ Ebaibol kẹdẹ kẹdẹ. Ma te ru ere, kiyọ ma daoma. U gine fo re ma fi utee jọ họ, ma vẹ jẹ daoma lei te obọ. (1 Kọr. 9:26) Ma tẹ be sai se Ebaibol, yọ emamọ oware. Rekọ joma riẹ nọ ohwo o te se Ebaibol no, yọ u re no ho. Ma tẹ gwọlọ nọ eware nọ ma bi se na i re fiobọhọ kẹ omai ziezi, u wo eware efa nọ ma re ru.

⁸ Ma rọ oriruo jọ dhesẹ ẹme nọ ma be ta na. Oso o re fiobọhọ kẹ ekakọ nọ e rẹ rọ zọ. Rekọ nọ okposo ọ tẹ rrọ, ame ọ vẹ te da otọ na fia. Kọ oso ọfa ọ tẹ jẹ rrọ fihọ ehru ọyena, ẹvẹ o rẹ jọ? U re fiobọhọ kẹ ekakọ na ha keme ọnọ ọ rrọ fihọ otọ na no vẹre na, otọ na o re sai sei rehọ họ. O re sei rehọ tao re o te ti fiobọhọ kẹ ekakọ na. Ere ọvona re, nọ ma te bi se Ebaibol, u fo re ma se kuku otọ họ. Ma te bi se Ebaibol na gidi gidi, ma te sai roro kpahe eware nọ ma bi se na ziezi hi. Yọ ma te sae kareghẹhọ ae he re ma ru eware nọ ma se.—Jem. 1:24.

9. Ma tẹ ruẹ nọ ma be rọ ugidi se Ebaibol gaga, eme ma re ru?

⁹ Kọ who muẹrohọ nọ ẹsejọ who te bi se Ebaibol, ese vrẹ ọvo who bi se? O tẹ rrọ ere, eme who re ru? Se umutho. Who te se te oria jọ, daoma roro didi kpahe oware nọ who se. Nọ a ta nọ ma roro didi na, orọnikọ okpoware jọ nọ ma sai ru hu a be ta na ha. Who te bi rri rie ruaro, rehọ iẹe nọ ẹme nọ a be ta na ọvo họ, who te se oria jọ no, who ve roro kpahe iẹe. Whọ sai ru re oke nọ whọ be hai ro se Ebaibol u theri vi epaọ ọsosuọ, re who wo uvẹ roro kpahe eware nọ who se. Whọ sai je se umutho, whọ vẹ rọ oke nọ u kiọkọ roro kpahe oware nọ who se. Brọda Victor nọ ma fodẹ ẹsiẹ na ọ ta nọ: “Oria nọ me re se evaọ Ebaibol u re bu hu, ẹsejọ uzou ọvuọvo. Fikinọ ohiohiẹ me re ro se na, nọ me te se no, me re roro kpahe eware nọ me se na evaọ okpẹdoke na soso.” Oghẹrẹ kpobi nọ whọ gwọlọ se bu te kẹhẹ nọ who te bi se Ebaibol, o roja inọ who re sei ẹrera, re whọ sai roro kpahe eware nọ who bi se, i ve fiobọhọ kẹ owhẹ.—Ol. 119:97; rri ẹkpẹti na “Enọ jọ nọ Whọ rẹ Nọ Omara.”

10. Kẹ oriruo jọ nọ u dhesẹ oghẹrẹ nọ ma sai ro roro ku epanọ ma re ro ru eware nọ ma wuhrẹ. (1 Ahwo Tẹsalonika 5:17, 18)

¹⁰ Epa kpobi nọ who re se Ebaibol kri te kẹhẹ hayo oke kpobi nọ who fihọ nọ who re ro sei kẹhẹ, daoma gwọlọ epanọ who re ro ru eware nọ who wuhrẹ. Who te bi se oria jọ Ebaibol, nọ omara nọ, ‘Ẹvẹ mẹ sai ro ru oware nọ mẹ jọ etenẹ na wuhrẹ evaọ enẹna hayo ẹdẹfa?’ Ma rehọ iẹe nọ who se obe 1 Ahwo Tẹsalonika 5:17, 18. (Se 1 Ahwo Tẹsalonika 5:17, 18.) Who te se oria Ebaibol yena no, whọ sai dhizu who ve roro kpahe epanọ whọ be hae lẹ kiti te, je roro sọ whọ be hae ginẹ lẹ no eva ra ze. Whọ sai je roro kpahe eware jọ nọ whọ rẹ rọ fiki rai yere Ọghẹnẹ. Ẹsejọhọ whọ vẹ te vuẹ omobọ ra nọ who ti yere Jihova fiki eware esa jọ. O tẹ make rọnọ umutho iminiti jọ ọvo who ro roro kpahe oria nọ who se ere, u ti ru nọ whọ te rọ jọ ọnọ o bi ru lele ẹme Ọghẹnẹ, orọnọ ọnọ o bi yo ọvo ho. Who ti wo irere buobu nọ whọ tẹ be hai ru ere kẹdẹ kẹdẹ nọ who te bi se Ebaibol. Who te bi ru ere, whọ te ginẹ jọ ohwo nọ o bi lele ẹme Ọghẹnẹ vi epaọ anwẹdẹ. Kọ otẹrọnọ who se no, whọ jẹ ruẹ nọ eware nọ whọ te daoma ru e rrọ buobu, eme who re ru?

RU EWARE JỌ ỌVO TAO

11. Fikieme ma re ro roro nọ ma te sai ru eware nọ ma wuhrẹ hẹ ẹsejọ? Kẹ oriruo.

¹¹ Nọ who te bi se Ebaibol, nọ whọ jẹ ruẹ nọ eware e vọ riẹ nọ whọ te daoma ru, ẹsejọ whọ sae ta nọ, kinọ eweware nọ me ti ru? Ma rehọ iẹe nọ nẹnẹ who se Ebaibol, who te wuhrẹ nọ o thọ re ma hai rri ahwo ovao ru eware iwoma kẹ. (Jem. 2:1-8) Whọ tẹ ruẹ nọ whọ te gbẹ daoma re whọ hai ru eware iwoma kẹ ahwo kpobi, orọnọ ahwo jọ ọvo ho. Whọ daoma! Odẹnotha u je te, who te se oria Ebaibol ọfa nọ o ta nọ u fo re ma hae ma ẹme mai te. (Jem. 3:1-12) Who muẹrohọ nọ ẹsejọ eme nọ i re no owhẹ unu ze, i re kiehọ tere he. Fikiere whọ tẹ ta nọ whọ te daoma re ẹmeunu ra o jọ ziezi, o vẹ jẹ tuduhọ ahwo awọ. Okiokiọ riẹ nọ who je se Ebaibol, who te wuhrẹ nọ u fo re odibo Jihova ọ jọ ogbẹnyusu akpọ na ha. (Jem. 4:4-12) Whọ ruẹ nọ ifimu, ile, igemu, gbe ebe nọ e rẹ were owhẹ e nwani kiehọ tere he, fikiere whọ te daoma fihọ ofẹ yena re. Okiokiọ riẹ nọ who te rorote eware nọ who wuhrẹ inọ who ti ru na kpobi, whọ sae ta nọ, ‘Kọ ẹvẹ mẹ te sai ro ru eware nana kpobi?’

12. Fikieme o gbẹ kẹ owhẹ uye he nọ whọ tẹ jọ isase Ebaibol ra ruẹ eware jọ nọ whọ be riẹ ru tere he? (Je rri ẹme-obotọ na re.)

¹² Whọ tẹ ruẹ nọ eware buobu e vọ riẹ nọ u fo nọ whọ rẹ gbẹ daoma ru ziezi, o kẹ owhẹ uye he. Eware na kpobi nọ who muẹrohọ na u dhesẹ nọ whọ ginẹ gwọlọ nwene. Ohwo nọ o wo omaurokpotọ nọ ọ rẹ rọwo nọ o bi ruthọ, o te bi se Ebaibol, o re muẹrohọ oria nọ u fo nọ o re jo nwene.a Rekọ kareghẹhọ nọ re ma whẹ “uruemu okpokpọ na” họ oma, o rrọ oware ẹdẹ ọvo ho. (Kọl. 3:10) Kọ eme who ti ru re whọ jọ ohwo nọ o bi lele Ẹme Ọghẹnẹ ẹsikpobi?

13. Eme who re ru nọ whọ tẹ ruẹ nọ eware e vọ riẹ nọ whọ gwọlọ ru? (Rri uwoho na re.)

¹³ Who du ta nọ whọ rẹ nwani ru eware kpobi nọ who wuhrẹ na ẹsiẹvo ho. Ru ejọ ọvo tao. (Itẹ 11:2) Whọ sai kere eware nọ who wuhrẹ inọ whọ te hai ru na fihotọ. Who ve kru ọvo hayo ivẹ jọ họ obọ nọ whọ te hai ru tao. Nọ oke o be nya na, who ve ti ru enọ i kiọkọ. Kọ evẹ whọ te kaki ru na?

14. Eware vẹ whọ sae kaki muhọ eru tao?

¹⁴ Whọ sae kaki mu ọnọ ọ te bẹ owhẹ eru tere he họ eru tao. Hayo whọ sae kaki ru ọnọ whọ riẹ nọ o mai wuzou. Nọ whọ tẹ riẹ oware nọ whọ gwọlọ ru no, whọ vẹ jọ ebe ukoko na kiẹ re whọ riẹ eware nọ a kere kpahe iẹe no. Whọ sai rri Watch Tower Publications Index hayo Obe Ekiakiẹ Rọkẹ Isẹri Jihova. Lẹ se Jihova kpahe oware nọ whọ gwọlọ ru na. Lẹe nọ jọ ọ kẹ owhẹ “isiuru na gbe ogaga nọ [who] re ro ru” oware na. (Fil. 2:13) Who ve mu oware nọ who wuhrẹ na họ eru. Nọ whọ tẹ daoma fihọ ọrọ ọsosuọ na ziezi no, ẹsiẹe whọ te mae gwọlọ nọ who re ru ọrọ avọ ivẹ. Nọ whọ tẹ daoma wo emamọ uruemu jọ nọ who se kpahe no, o te gbẹ nwane bẹ owhẹ tere he re whọ daoma wo uruemu ọfa nọ Oleleikristi o re wo.

JỌ ẸME ỌGHẸNẸ Ọ HAI “RU IRUO EVAỌ” OMARA

15. Ohẹriẹ jọ vẹ o rrọ udevie idibo Jihova gbe amọfa buobu nọ a bi se Ebaibol na? (1 Ahwo Tẹsalonika 2:13)

¹⁵ Ahwo jọ a rẹ ta nọ a se Ebaibol na no oka te oka unuẹse buobu no. Kọ onọ na họ, a rọwo ẹme Ebaibol? Kọ a bi ru eware nọ a se je bi yeri uzuazọ rai wọhọ epanọ Ebaibol ọ ta? Ibuobu rai a bi ru ere he. Rekọ mai idibo Jihova ma wọhọ ahwo yena ha. Ma wọhọ Ileleikristi ọsosuọ nọ e rehọ ẹme Ebaibol “wọhọ epanọ o ginẹ rrọ, ẹme Ọghẹnẹ.” Ere ọvo ho, ma be daoma yeri uzuazọ nọ u dhesẹ nọ ẹme Ọghẹnẹ o bi ru iruo evaọ omamai.—Se 1 Ahwo Tẹsalonika 2:13.

16. Ẹvẹ ma sae rọ jọ ahwo nọ i bi ru lele Ẹme na?

¹⁶ O ginẹ lọhọ tere he re ma hai se Ẹme Ọghẹnẹ je ru eware nọ ma wuhrẹ. Ẹsejọ uvẹ nọ ma re ro se o rẹ jariẹ hẹ. Ẹsejọ nọ ma te bi se, ovariẹ ma bi ro se, fikiere eware na e rẹ gbẹ ruọ omai uzou tere he. O sae jọ nọ eware buobu e riẹ nọ ma wuhrẹ inọ ma ti ru. Oghẹrẹ kpobi nọ o rrọ kẹhẹ, ma du rri rie fihọ oware nọ ma te sai ru hu hu. Jihova o ti fiobọhọ kẹ owhẹ re whọ sai ru ei. Joma ru eware nọ Jihova o re ro fiobọhọ kẹ omai, re ma gbẹ jọ ahwo nọ i re yo fihọ ezọ ọvo ho, rekọ enọ i bi lele Ẹme Ọghẹnẹ. Ma tẹ be hai se Ẹme Ọghẹnẹ jẹ daoma ru eware nọ ma wuhrẹ, ẹsiẹe eva e te mae were omai.—Jem. 1:25.