Ta Usiuwoma avọ Ẹjiroro
1 Wọhọ idibo Ọghẹnẹ, o gba omai họ re ma you rie gbe erivẹ mai. (Mat. 22:37-39) Ewhowho emamọ usi na yọ edhere jọ nọ ma re ro dhesẹ uyoyou onana. Omodawọ orọ ẹsikpobi mai evaọ iruo na u fo ejiro.
2 Ẹjiroro Usiuwoma Ota: Usiuwoma ota avọ ẹjiroro u re ru nọ odibọgba mai o gbẹ jọ o rọ thakpinọ ma ru ọvo ho. Ẹjiroro usiuwoma ota jọ họ re ma wuhrẹ ahwo je ru ilele. (Mat. 28:19, 20) Ẹvẹ oghọghọ riẹ o rẹ rro te re ma fiobọhọ kẹ ohwo jọ zihe ruọ odibo Jihova evaọ aruorokele Jesu Kristi!
3 Dede na, orọnikọ ahwo kpobi a rẹ j’owọ avọ ovuhumuo ho. Rekọ onana u re du whrehe ọwhọ mai kẹ oware uwoma uruo ho. (Gal. 6:9) Fiba eruo ilele, ẹjiroro ọfa ọrọ usiuwoma ota họ re ma se isẹri. (Mat. 24:14) Fikiere, makọ ahwo a gaviezọ hayo a gaviezọ họ, usiuwoma ota mai o r’oja. Ahwo nọ ma be t’ẹme kẹ a ti wo unoma nọ a re gu hu nọ a gbẹ rọ gọ Jihova ha. (Wawo Izik. 2:3-5; 3:19.) Mai wuzou kpobi họ usiuwoma ota mai o rẹ kẹ Jihova orro.—Ol. 50:23.
4 N’Iyẹrẹ Iruo Ra: Uzẹme o rrọ inọ Jihova ọ riẹ oware nọ omomọvo o bi ru, yọ ọ rẹ sae riẹ sọ egagọ mai yọ erọ udu kpobi hayo kọ abọjọ gheghe ọrọ oware nọ ma rẹ sai ghine ru. Rekọ uvi ẹjiroro e riẹ nọ ma rọ n’iyẹrẹ usiuwoma ota mai. (Izik. 9:11; Mak 6:30) Iyẹrẹ i re fiobọhọ k’omai riẹ oware nọ a bi rugba evaọ iruo usiuwoma ota akpọ-soso na, yọ i re fiobọhọ k’omai kiẹ iruo mai riwi wọhọ omomọvo.
5 Fiki epanọ iyẹrẹ i w’iruo te na, u fo re ma kareghẹhọ n’iyẹrẹ usiuwoma ota mai isiava k’amara k’amara, eva udevie amara na gbe eva ekuhọ riẹ. Ma te wo ẹjiroro nọ ma be rọ ta usiuwoma fihọ iroro, ma ti wo ọdawẹ kpahe oke mai nọ ma re ro ruiruo ziezi orọnikọ kpahe ekele oke gheghe he. O rọ oware areghẹ hẹ re ma raha oke rọ vro-avro kugbe ahwo nọ a wo adhẹẹ kẹ ovuẹ Uvie na ha. Jẹ kareghẹhọ nọ “oke usiuwoma ota ra u re muhọ evaọ okenọ who te muọ iruo isẹri ra họ yọ u re kuhọ evaọ okenọ who ro ku iweze urere na họ evaọ etoke isẹri-ise ọvuọvo.”—om-E ẹwẹ. 104.
6 Nọ ma be ta usiuwoma avọ ẹjiroro na, avọ ẹrorọsuọ Jihova vọvọ, ma ti wo evevọwẹ eva nọ ma re ru were iẹe enẹna, yọ evaọ obaro kẹle na ma ve vu uzuazọ ebẹdẹ bẹdẹ.—Itẹ 27:11; 1 Tim. 4:16.