Omaa Ewuhrẹ Odibọgba

Oka nọ O rọ November 12 Muhọ

Ole avọ 43

8 min: Iwhowhovia obonẹ. Iwhowhovia nọ a salọ no Odibọgba Uvie Mai ze.

15 min: “Rẹroso Jihova kẹ Ẹgba.”a Ku ẹme ọkpẹkpẹe kugbe ei no Uwou-Eroro ọ October 1, 1999, ẹwẹ-obe avọ 28-29, edhe-ẹme avọ 6-8 ze.

22 min: “Jọ Odibọgba Ra Nyaharo Evaọ Abọ-Ẹzi.” Ẹmeọta-kugbe ogbotu nọ ọkpako o re ru. Ku odhesẹvia jọ nọ a ruẹrẹhọ ziezi nọ owhowho-uvie ọkpokpọ o re ru kugbei, onọ a re ro fi Awake! ọ November 22 na họ ada, ẹkwoma iroro-ejẹ nọ e rrọ ẹkpẹti na “Eme nọ Whọ rẹ Ta Kpahe Emagazini Na.”

Ole avọ 191 gbe olẹ ekuhọ.

Oka nọ O rọ November 19 Muhọ

Ole avọ 172

8 min: Iwhowhovia obonẹ. Iyẹrẹ epanọ igho e nya.

15 min: Ẹgwọlọ ukoko.

22 min: Ẹme nọ ọkpako o re ru no Uwou-Eroro Na ze ọrọ August 15, 1995 (ọrọ Oyibo), ẹwẹ-obe avọ 28-30. Fiẹgbahọ iruemu odode nọ e rọwo-kugbe edhere Ọghẹnẹ hẹ nọ e rrọ ẹkwotọ rai. Rehọ ikereakere nọ i fo ro dhesẹ oware nọ o soriẹ nọ i gbe kiehọ kẹ Ileleikristi hi.

Ole avọ 195 gbe olẹ ekuhọ.

Oka nọ O rọ November 26 Muhọ

Ole avọ 177

15 min: Iwhowhovia obonẹ. Kareghẹhọ iwhowho-uvie re a n’iyẹrẹ usiuwoma ota ọ November. Ẹkwoma iroro-ejẹ nọ e rrọ “Eme nọ Whọ rẹ Ta Kpahe Emagazini Na,” ru idhesẹvia ivẹ nọ a ruẹrẹhọ ziezi—a rẹ rehọ Uwou-Eroro ọ December 1 na ru ọjọ a vẹ rehọ Awake! ọ December 8 na ro ru ọrọ avivẹ. Kẹsena who ve dhesẹ epanọ a sai ro duku edhere-ẹmeọta nọ a re ro fi obe Ọzae nọ Ọ Mae Rro na hayo ovojọ evaọ enọ a sai ro nwene iei na họ ada evaọ December. Ta kpahe oriruo ọvo hayo ivẹ jọ. (Rri Odibọgba Uvie Mai ọrọ December 1995, ẹwẹ-obe avọ 8; June 1993, ẹwẹ-obe avọ 4, (erọ Oyibo.)

15 min: “Diẹse Me re je Duku Oke?” Ẹme gbe iroro-ejẹ ogbotu. Ku owọ-eme nọ i w’uzou kugbe ei ro no Uwou-Eroro ọ October 1, 2000, ẹwẹ-obe avọ 28-29, edhe-ẹme avọ 9-10, ze, evaọ otọ uzoẹme-osese na “Epanọ Otujọ A ro Ru Uvẹ kẹ Ewuhrẹ.” Zizie ogbotu na re a gbiku idhere nọ i w’iruo nọ a ro ru uvẹ kẹ eware nọ e mae r’oja no ẹkwoma eware nọ e r’oja ha nọ a siobọno. Fiẹgbahọ ẹgwọlọ nọ ohwo ọ rẹ rọ ghale oke rọkẹ uwuhrẹ omobọ ohwo gbe orọ uviuwou, iwuhrẹ ukoko, usiuwoma ota, gbe isase Ebaibol ikẹdẹ kẹdẹ.

15 min: Izoge I bi Jiri Jihova. Ẹmeọta ogbotu. Ikoko buobu i wo izoge buobu nọ i bi w’obọ evaọ iruo usiuwoma na. U kiehọ re a ru ere, o tẹ make rọnọ ahwo nọ a kpako no a rẹ mai se isẹri kẹ. (Ol. 148:12, 13; Mat. 21:15, 16) Okenọ eyewọ gbe iwhowho-uvie efa i te dhesẹ isiuru kpahe ae, bi wuhrẹ jẹ kẹ ae uduotahawọ, izoge e rẹ ruẹ oghọghọ buobu evaọ usiuwoma ota na. Zizie ogbotu na re a jiroro idhere nọ a re ro ku izoge kugbe oma evaọ iruo n’ẹthẹ t’ẹthẹ gbe izihebro. Ta kẹ eyewọ re a gbiku oware nọ a ru ro fiobọhọ kẹ emọ rai no re a wuhrẹ oghẹrẹ nọ a re ro fi emagazini họ ada, re a rehọ Ebaibol na ruiruo evaọ usiuwoma ota rai, jẹ t’ẹme avọ udu evaọ unuẹthẹ. Fiẹgbahọ erere nọ ọ rrọ ujiro nọ a rẹ kẹ emọ. Kiẹ owhowho-uvie uzoge ọvo hayo ivẹ jọ riwi, re a ta oware nọ a be reawere riẹ evaọ iruo ewhowho usiuwoma na gbe oware nọ o soriẹ.

Ole avọ 198 gbe olẹ ekuhọ.

Oka nọ O rọ December 3 Muhọ

Ole avọ 179

8 min: Iwhowhovia obonẹ.

17 min: Eware nọ e rrọ omobe ọ Epanọ A ro Muhọ Jẹ Ruabọhọ Ebaibol E rọ Jiroro na. Ẹmeọta ogbotu. Ta kpahe epanọ a sae rọ rehọ eware sa-sa nọ e rrọ omobe na ro muọ ẹmeọta họ je yeri kugbe awhaha ahwo. Wọhọ oriruo, “Ebaibol/Ọghẹnẹ” (ẹwẹ-obe avọ 2); “Uvie” (ẹwẹ-obe avọ 5); “Uwuhrẹ Ebaibol Uviuwou” (ẹwẹ-obe avọ 6). Rehọ iriruo esa hayo ene ro dhesẹ epanọ a sae rọ rehọ ẹwẹ-obe avọ 7 rite 16 rọ kẹ iyo enọ awhaha nọ a rẹ nya ku gaga evaọ ẹkwotọ usiuwoma ota rai. Tuduhọ iwhowho-uvie awọ re a rehọ obufihọ ewuhrẹ nana ruiruo evaọ oke kpobi nọ uvẹ na o tẹ roma via evaọ iruo usiuwoma ota na.

20 min: “Eghale nọ I Re No Ovuhumuo Odhesẹ kẹ Uyoyou Jihova Ze—Abọ 1.” Okenọ whọ tẹ be ta kpahe edhe-ẹme avọ 3-6, zizie ukoko na re a ta eware uduotahawọ nọ a rọ ẹro ruẹ evaọ iruo n’uwou ruọ uwou, isẹri-ise iyẹrẹ, gbe izihebro avọ iruo obe uwuhrẹ Ebaibol.

Ole avọ 200 gbe olẹ ekuhọ.

[Footnote]