Jọ Oware nọ Who Wo O d’Owhẹ Ẹro
1 Ikereakere na e ta udu họ omai awọ nọ ma ru ẹgwọlọ iwo uviuwou mai kẹe, rekọ onana o rẹ jọ ute ọsosuọ mai evaọ uzuazọ họ. Eware abọ-ẹzi e rẹ karo hrọ. (Mat. 6:33; 1 Tim. 5:8) Re a fi enana họ ọvuọvo oria rai ziezi o rrọ use-abọ evaọ “oke ẹbẹbẹ” nana. (2 Tim. 3:1) Eme o re fi obọ họ k’omai ru ere?
2 Lele Eriwo Ebaibol Na: Ẹme Ọghẹnẹ ọ vẹvẹ omai unu nnọ ilale efe e rẹ sae wha ọraha abọ-ẹzi ze. (Ọtausi. 5:10; Mat. 13:22; 1 Tim. 6:9, 10) Evaọ etoke obẹbẹ nana, o rẹ jọ yoyoma k’omai re ma rehọ oke mai kpobi kẹ iruo okọ hayo dhẹ ọgbohrẹ igho te epanọ ma re ro gele iruẹru abọ-ẹzi—iwuhrẹ ukoko, ewuhrẹ omobọ ohwo, gbe usiuwoma ota—fihọ oria avivẹ evaọ izuazọ mai. (Luk 21:34-36) Wo ohẹriẹ, Ebaibol na ọ kẹ ohrẹ nnọ: “Otẹrọnọ ma wo emuore gbe emuẹgọ jọ enana e da omai ẹro.”—1 Tim. 6:7, 8.
3 Orọnikọ onana u dhesẹ nnọ Ileleikristi e rẹ rria uzuazọ uvuhu nọ a re fi omobọ rai họ họ. Rekọ ohrẹ nana u re fi obọ họ k’omai vuhu eware nọ e ghinẹ rrọ ẹgwọlọ iwo mai—emuore, emuẹgọ, gbe uwou nọ u fo kẹ ẹrria evaọ okegbe mai. Otẹrọnọ ma wo ugogo ẹgwọlọ uzuazọ, u du fo re ma le uzuazọ okpohwo kitikiti hi. Nọ ma te bi roro kpahe oware jọ nọ ma gwọlọ dẹ hayo iruo efa nọ ma gwọlọ ro, o gwọlọ re ma nọ oma mai inọ, ‘Kọ onana o ghinẹ r’oja?’ Ere oruo u ti fi obọ họ k’omai kezọ kẹ uthubro na: “Si omano uyoyou igho, [onọ] wha wo o da owhai ẹro.”—Hib. 13:5.
4 Otẹrọnọ ma fi eva họ Jihova, ọ te ghale omai. (Itẹ 3:5, 6) Dede nọ ma re ruiruo gaga re ma wo ẹgwọlọ okpẹdẹ na, ma re fi iroro mai kpobi họ eware eyena ha. Makọ ma wo umutho hayo ma wo buobu, ma rẹ rọ ẹro so Jihova re o ru ẹgwọlọ mai gba. (Fil. 4:11-13) Fikiere, ma rẹ reawere edẹro Ọghẹnẹ kugbe eghale efa buobu.
5 Raro Kele Ẹrọwọ Amọfa: Ọyewọ ọvo jọ nọ ọ jẹ yọrọ ọmọtẹ riẹ evaọ edhere uzẹme na o ru uzuazọ riẹ lọhọ ẹmẹrera. Dede nọ ọ jẹ reawere ikpeware nọ e rrọ uwou riẹ, ọ kua kpohọ uwou okakao jọ, kẹsena ọ tẹ te kua kpohọ ubruwou ovo. Onana u fi obọ họ kẹe go euwa iruo okọ riẹ kpotọ re ọ sae raha oke fihọ odibọgba na viere. Nọ ọmọtẹ riẹ ọ rro jẹ rọo no, oni na ọ tẹ kaki siobọno-iruo, dede nọ onana u dhesẹ nnọ o gbe ti wo ugho tere he. Enẹna oniọvo-ọmọtẹ mai na ọ rrọ ọkobaro oke-kpobi te ikpe ihrẹ no yọ o wo uvumọ enuobro ho fiki ekwakwa iwo nọ ọ nya seba re ọ rọ isiuru Uvie na karo evaọ uzuazọ riẹ.
6 Ọkpako ukoko jọ avọ aye riẹ a ru iruo ọkobaro na evaọ ikpe buobu yọ a be yọrọ emọ esa. Wọhọ uviuwou, a wuhrẹ epanọ a re ro wo edẹro evaọ ẹnyate eware nọ e ghinẹ rrọ ẹgwọlọ rai viukpọ eware nọ e rrọ isiuru rai gheghe nọ a re le. Oniọvo-ọmọzae na ọ ta nọ: “Ma ru uzuazọ mai lọlọ viere. Dede nọ ẹsejọ ma wo etoke obẹbẹ jọ no, Jihova ọ be hai ru ẹgwọlọ mai k’omai ẹsikpobi. . . . Nọ mẹ tẹ ruẹ epanọ uviuwou mẹ o be rọ isiuru abọ-ẹzi karo, me re fi uzou nnọ eware kpobi e be nya kiehọ, yọ onana o rẹ kẹ omẹ iroro evevọwẹ.” Aye riẹ o fibae nnọ: “Nọ mẹ tẹ ruẹ [ọzae mẹ] nọ ọ rrọ owhreze eware abọ-ẹzi, me re wo iroro edẹro.” Emọ na oma rai a wo evawere inọ ọsẹgboni rai a jiroro nọ a rẹ gọ Jihova oke vọvọ.
7 Rọkẹ enọ e salọ edhere omorọkẹ Ọghẹnẹ otiọye siọ ilale ekwakwa efe ba, Ebaibol na ọ y’eyaa eghale buobu enẹna gbe evaọ uzuazọ nọ o be tha na.—1 Tim. 4:8.