Whọ rẹ Sai Fe!
1. Fikieme u je fo re who roro kpahe iruo ọkobaro oke-kpobi?
1 Kọ whọ gwọlọ wo oghọghọ ulogbo gbe evevọwẹ evaọ uzuazọ ra? Kọ o rẹ were owhẹ re who fi obọ họ kẹ amọfa? Kọ whọ gwọlọ ru iruo ra evaọ egagọ Jihova kẹre? Who te yo Ee kẹ onọ jọ evaọ usu enana, kiyọ whọ te sai ru ọkobaro oke-kpobi. Rekọ, ewha-iruo uviuwou gbe ewha-iruo efa nọ Ikereakere na i dhesẹ nọ i te omai, jegbe epanọ oma ohwo o ga te, yọ eware jọ nọ a roro kpahe evaọ ẹme nana.
2. Fodẹ eghale abọ-ẹzi jọ nọ i bi te ekobaro oke-kpobi.
2 Solomọn ọ jọ obe nọ ọ rọ ẹgba ẹzi Ọghẹnẹ kere dhesẹ inọ eghale Jihova i re ru ohwo fe. (Itẹ 10:22) Nẹnẹ, efe abọ-ẹzi eghale Jihova e rẹ mae wha ze. Ekobaro oke-kpobi a bi wo eghale itieye na kpọhọhwẹ. Wọhọ oriruo, fikinọ a be rọ obọ nẹ eware obọrai jọ re a sai fi obọ họ kẹ amọfa, a bi wo evawere nọ e mae rro kpaobọ. (Kọl. 4:5; Iruẹru 20:35) Jihova o bi muẹrohọ iruo rai nọ a bi ro dhesẹ uyoyou, yọ o be dae ẹro fia. Efe yena nọ a wo na o rẹ raha vievie he. (Mat. 6:20; Hib. 6:10) Ofariẹ, nọ ekobaro a bi wo ‘ẹro ọlọlọhọ’ jẹ be rọ ẹro so Jihova kẹ ugogo eware nọ a gwọlọ evaọ uzuazọ na, usu nọ a wo kugbei u re dhe ẹgẹga.—Mat. 6:22, 25, 32; Hib. 13:5, 6.
3. Ohẹriẹ vẹ o rrọ ilale efe abọ-ẹzi avọ ilale efe abọ-iwo?
3 Evaọ ẹsibuobu, ilale efe akpọ na e rẹ wha “urusio eware igheghẹ avọ oma-onhwa buobu” ze. (1 Tim. 6:9, 10; Jem. 5:1-3) Eghale Jihova e rrọ ere vievie he. Nọ ekobaro oke-kpobi a be hae raha oke ziezi evaọ usiuwoma na, onana u bi fi obọ họ kẹ ae yọrọ edikihẹ abọ-ẹzi rai, jẹ be tẹrovi eware nọ e mai wuzou. (Fil. 1:10) Oniọvo-ọmọzae jọ o no iruo ọwena nọ ọ jọ nọ e jẹ hae rehọ oke riẹ kpobi re ọ sai ru iruo ọkobaro. Ọ ta nọ: “Iruo mẹ e jẹ lẹliẹ oma rrọ omẹ. Iruo ọkobaro e rrọ ere he. Enẹna mẹ be sai fi obọ họ kẹ ahwo je wuhrẹ ai uzẹme na. Iruo ọkobaro e be kẹ omẹ evevọwẹ nọ me je wo vẹre he.”
4. Nọ ekobaro oke-kpobi a be wha eghale se amọfa na, ẹvẹ ae omarai a bi ro wo oghale?
4 Eghale kẹ Amọfa: Nẹnẹ, ahwo kpobi a rẹriẹ ovao dhe ‘oke obẹbẹ.’ (2 Tim. 3:1) Ahwo kpobi a gwọlọ ẹruore. O rẹ kẹ iwhowho-uvie oghọghọ nọ a tẹ ruẹ ahwo nọ eva e jẹ were vẹre he nọ a bi wo evawere enẹna fiki emamọ usi na nọ a jẹrehọ. Dai roro epanọ oghọghọ ekobaro oke-kpobi nọ e be raha vrẹ ehwa 800 kukpe kukpe evaọ iruo esiwo nana o rẹ rro te!—1 Tim. 4:16.
5, 6. Eme ọ rẹ sai fi obọ họ kẹ owhẹ jọ ọkobaro oke-kpobi?
5 Kọ whọ be hai roro sọ whọ sai ru ọkobaro oke-kpobi? O sae gwọlọ nọ whọ dẹ oke no ilale eware efa nọ i wuzou tere he ze. (Ẹf. 5:15, 16) Ahwo buobu a ru ere no, je ru uzuazọ rai lọhọ no, onọ u fi obọ họ kẹ ai siobọ kpẹe evaọ oke nọ a be raha evaọ okọ rai re a sai wo uvẹ ziezi kẹ ilale eware abọ-ẹzi. Kọ whọ sai ru inwene itieye na re who ku oma gbe ai re?
6 Lẹ se Jihova kẹ areghẹ nọ whọ sae rọ ma emamọ omaa nọ u re fi obọ họ k’owhẹ. (Jem. 1:5) Eghale vẹ whọ rẹ sai rẹro rai? Efe abọ-ẹzi nọ o wo oba ha! Jihova ọ te jẹ rehọ eware abọ-iwo nọ e r’oja evaọ uzuazọ ghale owhẹ. (Mat. 6:33) Ahwo nọ a dawo Jihova riwi evaọ abọ nana a ti wo “oghale” bẹsenọ a gbe ti ro wo ẹgwọlọ họ.—Mal. 3:10.