Ẹkpẹti Onọ
◼ Eme ma re wo họ iroro otẹrọnọ ma wo ifonu nọ a re fihọ ẹkpa gbe ipeja?
Ekwakwa eyena e rẹ sai fi obọ họ k’omai ta ẹme kugbe amọfa evaọ enwene oria kpobi nọ ma rrọ. Dedenọ onana o rẹ kẹ erere, ma rẹ yọrọ oma gaga re ma siọ ifonu nọ a re fihọ ẹkpa gbe ipeja ba eroruiruo evaọ okenọ u fo ho, nọ o rẹ kpọ iroro no odibọgba hayo iwuhrẹ Ileleikristi mai. Ẹvẹ onana o sae rọ via.
Roro kpahe oware nọ o rẹ sae via otẹrọnọ ohwo jọ o se omai evaọ ifonu hayo nọ ipeja mai i te do evaọ okenọ ma bi se isẹri evaọ odibọgba na. Ẹvẹ ọnọ o wo uwou na o re roro? Ẹvẹ o re rri rie otẹrọnọ ma d’obọ ẹmeọta mai ji re ma za use na? Ma rẹ gwọlọ ru uvumọ oware nọ o rẹ whaha amọfa ezọgaviẹ kẹ ovuẹ Uvie na ha. (2 Kọr. 6:3) Fikiere, otẹrọnọ ma wha ifonu hayo ipeja, ma re ru ei epanọ u gbe ro bru ẹme dhe omai hayo amọfa unu hu evaọ okenọ ma rrọ odibọgba na.
Kọ ẹvẹ kpahe okenọ ma be hẹrẹ nọ amọfa a tẹ be ta usiuwoma? Otẹrọnọ ma ruẹrẹ okejọ fihọ rọkẹ usiuwoma ota, kọ ma gbe fi iroro mai họ iruo yena? Fiki adhẹẹ rọkẹ iruo efuafo mai na, iviena rẹrote iruo iruẹru okọ obọra hayo omakugbe-amọfa evaọ oke ofa. (Rom 12:7) Orọnikọ onana u dhesẹ nnọ a rẹ rehọ ifonu ta usiuwoma hayo ro ru ọruẹrẹfihọ usiuwoma ha ha.
Ma rẹ yọrọ oma viere kpahe eroruiruo ifonu nọ a re fihọ ẹkpa evaọ okenọ ma tẹ be dhẹ omoto, keme otokiẹ u dhesẹ via no inọ ere oruo o rẹ sae wha asidẹte ze. Ma rẹ roma-totọ koko izi kpobi nọ e whaha eroruiruo ifonu evaọ okenọ a tẹ be dhẹ omoto.
Ma rẹ ziọ iwuhrẹ Ileleikristi, ikokohọ esese, gbe ikokohọ ilogbo re ma gọ Jihova re o je wuhrẹ omai. Kọ ovuhumuo kẹ ẹfuọ etoke otiọye na o gbẹ w’omai re ma ru ifonu gbe ipeja mai fihọ epanọ e gbẹ rọ kpọ iroro mai gbe erọ amọfa no iwuhrẹ na ha? Otẹrọnọ ẹme ovẹrẹ jọ nọ o gwọlọ nọ ma rẹ rẹrote ọ riẹ, otafe oria ewuhrẹ na ma je ru ei. Hayo, ma re ru ọruẹrẹfihotọ re ma rẹrote eme omobọ mai gbe eme efa gheghe evaọ oke ofa nọ o rrọ onọ a ruẹrẹhọ kẹ egagọ họ.—1 Kọr. 10:24.
Joma rọ ifonu hayo ekwakwa ẹlẹtroniki efa mai ro ruiruo evaọ edhere nọ o re dhesẹ ororokẹ kẹ amọfa gbe ovuhumuo odidi kẹ eware abọ-ẹzi.