Ẹkpẹti Onọ

◼ Eria Ebaibol na vẹ e rẹ sai fi obọ họ kẹ omai riẹ oghẹrẹ nọ ma rẹ rọ ifonu ruiruo nọ ma tẹ rọ ewuhrẹ hayo usiuwoma?

“Koware Koware Kpobi Ọvuọ Ezi Riẹ” (Ọtausi. 3:1): Ifonu i ru rie lọhọ nọ ma sai ro lele ahwo ta ẹme hayo vi uwou se ahwo evaọ oke kpobi nọ ma gwọlọ. Rekọ, u wo oke jọ nọ Oleleikristi ọ rẹ kuvẹ hẹ re ifonu i si iroro riẹ no oware nọ o bi ru. Wọhọ oriruo, oke ewuhrẹ mai yọ oke nọ ma rẹ rọ gọ Jihova, wuhrẹ ẹme riẹ, jẹ reawere omakugbe inievo ukoko na. (Izie. 31:12; Ol. 22:22; Rom 1:11, 12) Kọ u gbe fo re ma furie ifonu mai no nọ ma tẹ rọ ewuhrẹ? Otẹrọnọ ma bi rẹro use jọ nọ u wuzou gaga, ma sai fi ifonu mai họ oghẹrẹ nọ o re ro kporo lahwe he.

‘Ru Eware Kpobi Fiki Usiuwoma Na’ (1 Kọr. 9:23): Ifonu i re wo iruo kẹ omai evaọ usiuwoma ota na ẹsejọ. Wọhọ oriruo, oniọvo nọ ọ be ghale ahwo fihọ ẹkwotọ usiuwoma ota ọ sae rọ ifonu se ahwo nọ ọ ghale fihọ abọjọ ẹkwotọ na. Ẹsejọ iwhowho-uvie a rẹ rọ ifonu se ahwo nọ a bi wuhrẹ Ebaibol kugbe re a tẹ nya bru rai, maero nọ oria nọ ohwo na ọ be rria u te thabọ. Otẹrọnọ ifonu e rrọ omai obọ evaọ usiuwoma, ma rẹ yọroma re ifonu na e whaha usiuwoma nọ ma be ta kẹ ahwo. (2 Kọr. 6:3) Nọ ma tẹ be hẹrẹ inievo nọ e gbẹ rrọ ẹkwotọ usiuwoma ota, ukpenọ ma rẹ rọ ifonu se amọfa hayo rọ ifonu vi uwou se egbẹnyusu mai, kọ o gbẹ mai woma re ma tẹrovi usiuwoma ota na gbe inievo nọ ma gbẹ rrọ usiuwoma?

Dhesẹ Ororokẹ Rọkẹ Amọfa (1 Kọr. 10:24; Fil. 2:4): U fo ho re ma hae nya leti kpohọ usiuwoma, bi roro nọ ma te rọ ifonu se oniọvo jọ hayo vi uwou sei re ma riẹ oria nọ a rrọ. Nọ ma tẹ nya leti, u re ru nọ a rẹ rọ wariẹ ghale ahwo na. Uzẹme, ẹsejọ oware jọ nọ ma rẹro riẹ hẹ o rẹ sae whae ze nọ ma re ro leti. Rekọ ma tẹ be hae kake ziọ usiuwoma, u re dhesẹ nọ ma bi ru lele ọruẹrẹfihotọ Jihova, bi dhesẹ ororokẹ rọkẹ oniọvo nọ ọ be ghale ahwo na, gbe inievo nọ e ziọ usiuwoma.