Emamọ Isẹri-Ise Ifonu

¹ Ute mai wọhọ Isẹri Jihova họ orọnikọ re ma w’obọ evaọ ewhowho emamọ usi na ọvo ho rekọ re ma jẹ rọ ovuẹ Uvie na nyate ahwo kpobi oma. (Iruẹru 10:42; 20:24) Nọ iruo n’uwou ruọ uwou na e gbẹ rọ ugogo edhere nọ ma rẹ rọ nyate ahwo oma na, ma vuhumu nọ orọnikọ edhere ọnana ọvo ma rẹ rọ nyate ahwo kpobi hi. Fikiere re ma ‘ru odibọgba mai gbunu,’ ma rẹ rehọ idhere efa ruiruo—kugbe isẹri-ise ifonu evaọ eria nọ o jo w’iruo—rọ gwọlọ ahwo nọ a wọhọ igodẹ.—2 Tim. 4:5.

² Evaọ ikpẹwho jọ, ahwo a be rria iwou nọ a bi jo roiro egaga, iwou nọ iviuwou buobu e be rria, hayo ẹwho nọ o wo unuẹthẹ ulogbo nọ a diogba wariẹ họ, oria nọ o jẹ rọ ẹbẹbẹ re ma ru iruo n’ẹthẹ ruẹthẹ mai nọ ma rẹ rọ nyate ahwo oma na. Makọ evaọ ẹkwotọ nọ ma sae jọ nya n’uwou ruọ uwou, ahwo buobu a rẹ jọ uwou hu. Evaọ eria nọ ifonu e rrọ, iwhowho-uvie jọ a bi wo obokparọ obọdẹ evaọ ẹnyate ahwo nana ẹkwoma ifonu.

³ Kọ who wo ifonu? Kọ who wo ehoo re who fi isẹri-ise ifonu ba odibọgba ra? Oniọvo jọ ọ rọwo nọ: “Mẹ rẹ gwọlọ re ohwo o s’omẹ evaọ obọ uwou re ọ zẹ uvumọ oware k’omẹ hẹ, fikiere me te wo unoma kpahe oghẹrẹ isẹri-ise nana.” Rekọ, nọ o se imava evaọ ifonu no, ọ tẹ ta nọ: “O were omẹ! Me roro ẹdẹvo nọ oyena o sae via ha, rekọ o were omẹ! Ahwo a rẹ jọ ifonu bruoma ha, yọ eware kpobi nọ whọ gwọlọ e kẹle owhẹ oma. Onana u ghine w’iruo gaga!” O jọ oniọvo-ọmọtẹ jọ oma epọvo na re: “Me je ghine wo ọwhọ kpahe isẹri-ise ifonu hu. Re mẹ t’uzẹme na k’owhẹ, mẹ jẹ gwọlọ ru ei hi. Rekọ nọ mẹ dao riẹ mẹ tẹ ruẹ nọ u woma gaga. Me wo izihebro 37 no isẹri-ise ifonu ze je wo iwuhrẹ bu vi enọ mẹ rẹ sai ru!” Whọ tẹ gwọlọ dawo isẹri-ise ifonu, whọ rẹ sae kparobọ re.

⁴ Ekpako na a sai wo isiuru ọjaja evaọ iruo nana ẹkwoma ẹruẹrẹhọ kẹ ahwo nọ i wo eriariẹ evaọ isẹri-ise ifonu re a wuhrẹ amọfa, ẹsejọhọ ẹkwoma ọruẹrẹfihotọ Ekobaro A Re Fiobọhọ k’Amọfa na. N’oke ruoke—evaọ ikoko nọ onana u je fo—a sae rehọ ẹme ọ ẹgwọlọ ukoko evaọ Ewuhrẹ Odibọgba na rọ t’ẹme kpahe epanọ a re ro fi ẹnyaharo họ obokparọ abọ isẹri-ise ọnana.

⁵ Iroro-Ejẹ kẹ Obokparọ: Okenọ Jesu o vi ilele riẹ re a ta usiuwoma na, o “vi ai imimava.” (Luk 10:1) Fikieme? Ọ riẹ nọ ẹkwoma iruo iru kugbe a sai wuhrẹ mi jẹ tuduhọ ohwohwo awọ. Epọvo na o rọ kpahe isẹri-ise ifonu re. Ẹkwoma iruo i ru kugbe wọhọ egbẹnya, wha sai wuhrẹ mi ohwohwo, t’ẹme kpahe iyẹrẹ rai, jẹ kẹ iroro-ejẹ rọkẹ ẹmeọta-kugbe n’ọtha. Makọ evaọ etoke nọ a bi ro fonu na, wha sai fiobọhọ k’ohwohwo gwọlọ evuẹ nọ i fo.

⁶ Re whọ sai wo iroro gbe ẹrotọvi ovevẹ, keria oria nọ whọ rẹ sai fi ekwakwa isẹri-ise ra họ—Ebaibol, obe Reasoning na, ibroshọ Gwọlọ na, emagazini, gbe ebe efa—evaọ aro ra. Kere eme jọ nọ whọ rẹ ta via, je fi ae họ oria nọ whọ sae jọ rue rai. Ruẹrẹ oma họ re who kere evuẹ egbagba fihotọ, kugbe ideti gbe oke ẹdẹ na re whọ sae riẹ okenọ whọ rẹ rọ wariẹ fonu ohwo na.

⁷ Ahwo a rẹ yọrọ oma ẹsibuobu nọ a te bi yo uvo ohwo nọ a riẹ hẹ evaọ ifonu. Fikiere jọ sasasa, whẹtiẹwhẹtiẹ, avọ areghẹ. Uvo ra ọvo nọ ohwo nọ o wo uwou na o bi yo na ọ rẹ rọ riẹ uruemu gbe oruọzewọ ra. Kpomamu jẹ t’ẹme no udu ra ze. T’ẹme ẹrera, vevẹ avọ edo-ẹme nọ a re yo ziezi. Kuvẹ kẹ ọnọ o wo uwou na re ọ t’ẹme. Fodẹ odẹ ra, jẹ fodẹ nọ ẹwho na whọ be rria. Viukpenọ whọ rẹ ta nọ who bi se ahwo kpobi nọ e rọ uwou hayo ighẹ jọ, ta nọ ọye who bi se.

⁸ Ẹmeọta Ifonu: A rẹ sai nwene eme-emuhọ buobu nọ e rọ ẹwẹ-obe avọ 2-7 ọrọ omobe Ebaibol E rọ Jiroro na kiehọ kẹ isẹri-ise ifonu. Whọ sae ta nọ: “Me s’owhẹ evaọ ifonu keme mẹ sae nyaze te ruẹ owhẹ hẹ. Ẹjiroro nọ me ro s’owhẹ họ re mẹ nọ kpahe iroro ra kpahe onọ isiuru jọ.” Whọ vẹ nọ onọ na.

⁹ Whọ sae rehọ eme-emuhọ ọsosuọ nọ e rọ otọ uzoẹme na “Ethube/Ufuoma” ro ruiruo enẹ: “Do/Mẹrigwẹ. Odẹ mẹ _____. Ẹwho na mẹ be rria. Me bi s’owhẹ fiki ọdawẹ mẹ kpahe ẹme ufuoma omobọ ohwo. Ethube buobu ọ wariẹ omai họ, yọ o kpoma họ izuazọ mai. Who roro nọ oke o rẹ te tha nọ ahwo kpobi a te sae nya iyẹrẹ na evaọ aso ababọ ozọ? [Kuvẹ kẹ uyo.] Jo me se oware nọ Ọghẹnẹ ọ yaa nọ o ti ru.”

¹⁰ Re a rehọ ọnyaruọ ovavo ro muọ iwuhrẹ Ebaibol họ evaọ ifonu u wo emamọ iyẹrẹ no. A rẹ sai dhesẹ uwuhrẹ na evaọ umutho iminiti jọ. Ta nọ who ti weze bru ohwo na evaọ uwou riẹ re who ru uwuhrẹ na haro, hayo ohwo na o te wo ehoo, ru ọruẹrẹfihọ re who ru uwuhrẹ na haro evaọ ifonu eva ẹdẹ ọfa.

¹¹ Okenọ who te bi ku ẹmeọta họ, wo oware jọ họ iroro nọ u ti su kpohọ iweze ra bru ohwo na evaọ uwou riẹ hayo obe nọ who re vi sei. Otẹrọnọ ohwo na o sioma h’emu re ọ k’owhẹ adrẹse riẹ, ta nọ whọ te wariẹ fonu riẹ. Whọ sai fonu unuẹse buobu taure u te ti kiehọ iẹe oma re o zizie owhẹ ziọ uwou riẹ.

¹² Owojẹ Na: Oniọvo-ọmọtẹ ikpe 15 jọ o muọ usiuwoma ota ohiohiẹ riẹ họ ẹkwoma ifonu. O lele aye jọ t’ẹme ọnọ ọ rọwo nọ ọ te rehọ obe Eriariẹ. Okenọ oniọvo-ọmọtẹ na ọ rehọ obe na se aye na evaọ obọ uwou riẹ, aye na ọ tẹ gwọlọ riẹ epanọ uzoge ọmọtẹ na ọ rọ riẹ inọmba ifonu riẹ, nọ orọnọ a kere i rie he na. Ethobọ oniọvo-ọmọtẹ na o ro fonu riẹ! Aye na o dede uwuhrẹ na rehọ yọ enẹna ọ rọ owhowho-uvie nọ ọ te họ-ame he.

¹³ Nọ ọ rehọ inọmba ifonu ejọ no, oniọvo-ọmọtẹ jọ fiki ozọ o sioma-họ-emu re o muọ isẹri-ise ifonu họ evaọ eka jọ. Eme ọ kẹ riẹ aruọwha nọ o ro muhọ? Ọ kareghẹhọ uzoẹme jọ evaọ Awake! ọ January 22, 1997, nọ o ta nọ “When I Am Weak, Then I Am Powerful.” (Okenọ Me Whrehe, Ẹsiẹe Mẹ Ga.) O ta kpahe Osẹri jọ nọ ọ be ta usiuwoma na ẹkwoma ifonu ghelọ ẹyao. Oniọvo-ọmọtẹ na ọ ta nọ: “Mẹ lẹ se Jihova jẹ yare ogaga. Mẹ yare e riẹ re ọ k’omẹ emamọ eme nọ mẹ rẹ ta.” Eme họ iyẹrẹ ẹdẹ ọsosuọ riẹ ọrọ isẹri-ise ifonu? Ọ niyẹrẹ nọ: “Jihova ọ kuyo olẹ mẹ. Ahwo na a gaviezọ k’omẹ, me te ru ọruẹrẹfihọ kẹ izihebro.” Uwhremu na isẹri-ise ifonu riẹ e tẹ wha uwuhrẹ Ebaibol ze. O te ku ei họ nọ: “Jihova ọ wariẹ wuhrẹ omẹ no re me fi eva họ iẹe orọnikọ omobọ mẹ hẹ.”—Itẹ 3:5.

¹⁴ Ewhowho uzẹme na ẹkwoma ifonu o zihe ruọ edhere obokparọ ewhowho emamọ usi na no. Ruẹrẹ oma họ ziezi, re who w’obọ avọ unevaze. Udu u no owhẹ awọ họ otẹrọnọ ahwo nọ whọ kaki se a be gaviezọ họ. Lẹ kẹ ọkpọvio Jihova, jẹ kiẹ eware nọ who kere fihotọ kugbe amọfa nọ e be ta usiuwoma na evaọ edhere omosasọ ọnana. Avọ isiuru re ma nyate ahwo kpobi evaọ ẹkwotọ mai, joma romatotọ ru odibọgba mai avọ ọwhọ.—Rom 10:13, 14.