Epanọ A re ro Mu Ebe-Iwuhrẹ Ebaibol Họ Evaọ Unuẹthẹ gbe Ẹkwoma Ifonu
1 Nẹnẹ, ahwo a bi wo uvẹ tere he. Ghele na, ibuobu i wo isiuru kpahe eware abọ-ẹzi. Ẹvẹ ma sai ro fi obọ họ kẹ ai ru ẹgwọlọ abọ-ẹzi rai gba? (Mat. 5:3) Iwhowho-uvie buobu a be sai ru ebe-iwuhrẹ Ebaibol kugbe ahwo eva unuẹthẹ iwou ahwo na hayo ẹkwoma ifonu. Kọ whọ sae rọ edhere nana ru odibọgba ra kẹre?
2 Re ma sai mu ebe-iwuhrẹ Ebaibol họ, u fo nọ ma rẹ ruẹrẹ oma kpahe re ma sae to obe-uwuhrẹ Ebaibol họ evaọ uvẹ kpobi nọ u rovie fihọ. Oghẹrẹ vẹ gbe oria vẹ ma jẹ sai ru onana?
3 Eva Unuẹthẹ: Nọ whọ tẹ nyaku ohwo nọ u nevaze inọ who lele iei tẹme kpahe Ebaibol na, rovie kpohọ edhe-ẹme nọ whọ ruẹrẹ họ no vẹre, wọhọ edhe-ẹme ọsosuọ eva uwuhrẹ 1 ọrọ ibroshọ Gwọlọ na, whọ vẹ rọ ere mu ẹme họ ẹta no obe na ze. Se edhe-ẹme na, nọ onọ na, je se ikereakere ọvo hayo ivẹ evaọ usu enọ a fodẹ na. Eva ẹsibuobu, a rẹ sae rehọ iminiti isoi rite ikpe ro ru onana eva unuẹthẹ. Otẹrọnọ ẹme nọ wha ta na ọ were ohwo na, ru ọruẹrẹfihotọ nọ wha re ro wuhrẹ edhe-ẹme ọvo hayo ivẹ efa nọ e kẹle riẹ evaọ oke ofa.—A rẹ sae ruẹ iroro-ejẹ efa kpahe epanọ a rẹ rọ rehọ edhere nana mu ebe-iwuhrẹ Ebaibol họ eva Odibọgba Uvie Mai ọrọ January 2002, ẹwẹ. 6.
4 A rẹ sae rehọ oghẹrẹ edhere ọvona mu obe-uwuhrẹ Ebaibol họ nọ a te bi ru izihebro. Wọhọ oriruo, whọ sai dhesẹ ibroshọ Gwọlọ na jẹ ta kpahe odẹ Ọghẹnẹ, ẹkwoma uwuhrẹ avọ 2, edhe-ẹme 1-2 na nọ who re ro ruiruo. Eva iweze netha, whọ sae ta oware nọ Ebaibol i dhesẹ kpahe ekwakwa Jihova, ẹkwoma edhe-ẹme avọ 3-4 nọ who re ro ruiruo. Eva iweze nọ e kẹle riẹ, wha sai wuhrẹ edhe-ẹme avọ 5-6 jẹ ta kpahe uwoho nọ o rrọ ẹwẹ-obe avọ 5 na ro fielo họ epanọ ewuhrẹ Ebaibol na u re ro fi obọ họ kẹ omai riẹ Jihova. Ma rẹ sai ru enana kpobi nọ ma dikihẹ unuẹthẹ na.
5 Ẹkwoma Ifonu: O rẹ sai kiehọ ahwo jọ oma re a rehọ ẹkwoma ifonu wuhrẹ Ebaibol vi ẹsenọ a rẹ rẹriẹ ovao dhe ovao. Rri oriruo nọ ọ rrọ obotọ na: Nọ oniọvo-ọmọtẹ jọ ọ jẹ ta usiuwoma no uwou ruọ uwou, ọ nyaku uvovo-aye jọ nọ o wo emọ je wo iruo nọ e be lẹliẹe wo uvẹ hẹ. Nọ oniọvo-ọmọtẹ na ọ gbẹ be sae wariẹ di aye na họ uwou hu, ọ tẹ jiroro nọ ọ rẹ rehọ ifonu sei. Uvovo-aye na o te ru ei vẹ inọ o wo uvẹ nọ ọ rẹ rọ ginẹ keria re ọ tẹme kpahe Ebaibol ho. Oniọvo-ọmọtẹ na ọ tẹ ta nọ: “Whọ sae rehọ iminiti 10 hayo 15 ro wuhrẹ oware okpokpọ jọ, makọ eva ifonu dede.” Aye na ọ tẹ ta nọ: “Otẹrọnọ who re ru ei evaọ ifonu, mẹ rọwo.” U kri hi, a te mu obe-uwuhrẹ Ebaibol ẹsikpobi họ eva ifonu.
6 Kọ eva usu ahwo nọ who bi weze bru, u no ejọ eva ze re a rehọ ẹkwoma ifonu wuhrẹ Ebaibol na? Whọ sae dawo edhere nọ a nwani dhesẹ no na, hayo whọ sae ta nọ: “O tẹ were owhẹ, ma sae jọ ifonu tẹme kpahe Ebaibol na. Kọ oyena o mai ti kiehọ kẹ owhẹ?” Ẹkwoma omaa obe-uwuhrẹ Ebaibol mai nọ ma re nwene kiehọ iyero amọfa, ma rẹ sai fi obọ họ kẹ ae “ruẹ eriariẹ Ọghẹnẹ na.”—Itẹ 2:5; 1 Kọr. 9:23.
[Study Questions]
1, 2. Ẹvẹ ma sai ro nwene omaa obe-uwuhrẹ Ebaibol mai re ma sai fi obọ họ kẹ ahwo nọ a re wo uvẹ tere he?
3. Fikieme ma je dhesẹ epanọ ma re ru obe-uwuhrẹ Ebaibol eva iweze ọsosuọ, kọ ẹvẹ ma sai ro ru ei?
4. Ẹvẹ ma sai ro mu obe-uwuhrẹ Ebaibol họ eva unuẹthẹ nọ ma te bi ru izihebro?
5, 6. (a) Fikieme o jẹ were ahwo jọ re a jọ ifonu ru obe-uwuhrẹ Ebaibol? (b) Edhere vẹ ma sai ro ruiruo nọ ma tẹ be vuẹ ohwo inọ ma gwọlọ ru obe-uwuhrẹ Ebaibol kugbei evaọ ifonu?