Isẹri-Ise Ifonu E rẹ Sae Wha Emamọ Iyẹrẹ Ze
1 Fikieme ma je roro kpahe isẹri-ise ifonu evaọ odibọgba mai? Fikinọ yọ edhere ọfa jọ nọ ma sai ro fi obọ họ kẹ ahwo wo eriariẹ egbagba nọ e rẹ wha esiwo sai. (2 Pita 3:9) Dede nọ usiuwoma nuwou ruọ uwou na họ ugogo edhere nọ ma bi ro whowho emamọ usi Uvie Ọghẹnẹ, ma rẹ daoma re ma rọ idhere efa nyate ahwo nọ ma re dihọ uwou hu oma.—Mat. 24:14; Luk 10:1-7; Evia. 14:6.
2 Epanọ A re Ru Ọruẹrẹfihotọ Na: Wọhọ epanọ a re ru ọruẹrẹfihotọ kẹ usiuwoma nuwou ruọ uwou na, ere ọvona a rẹ ruẹrẹ ẹkwotọ fihọ kẹ iwhowho-uvie nọ a jẹ rehọ ifonu se isẹri. Owhowho-uvie ọvo ọ rẹ sai ru isẹri-ise ifonu hayo kugbe iwhowho-uvie ivẹ hayo esa. Oria nọ a re jo ru onana o rẹ jọ ababọ edo. Ahwo buobu a ruẹ no inọ o mai kiehọ re a keria aro emẹjẹ je fi ebe nọ a re ro ruiruo evaọ usiuwoma ota nuwou ruọ uwou na fihọ emẹjẹ na.
3 Epanọ A rẹ rọ Rehọ Ifonu Se Isẹri: Nọ ma tẹ be rehọ ifonu se isẹri, jọ ẹmeọta mai ọ jọ wọhọ epanọ imava e rẹ t’ẹme kugbe ohwohwo na. Iwhowho-uvie jọ nọ i bi mu onana họ obọ a sai se ẹme na no obe ze, rekọ evaọ edhere nọ ohwo ọdekọ ọ sae rọ kpahe fihọ ẹme na. Eme-emuhọ nọ e rrọ obe ọ Reasoning, Odibọgba Uvie Mai, gbe omobe-ovẹvẹ na Kọ Whọ Gwọlọ Riẹ Uzẹme Na? e rẹ sai fi obọ họ evaọ abọ nana. Nọ whọ tẹ be ruẹrẹ ẹme nọ whọ te ta kpahe, wo uzoẹme, ruẹrẹ onọ nọ whọ te nọ kpahe, jẹ ruẹrẹ oria Ikere nọ e k’uyo na họ. T’ẹme kpahe ebe nọ a bi fihọ ada evaọ amara yena kẹ ohwo na. Roro kpahe ekareghẹhọ nana: Whọ rẹ t’ẹme na kpata kpata ha. Dhesẹ adhẹẹ, odiri, jẹ jọ whẹtiẹ whẹtiẹ, keme ohwo nọ who bi lele t’ẹme na ọ rẹ sai vuhu onana mu. Gaviezọ nọ ohwo na ọ tẹ be kpahe ẹme, je yere iei kẹ ọkpahe-fihọ riẹ. Whọ rẹ fodẹ ọruẹrẹfihotọ azọhọ unevaze na ha, keme ohwo na ọ sai roro nọ onana yọ edhere nọ a be rọ yare igho evaọ ifonu.
4 O sae jọ nọ ohwo nọ whọ be t’ẹme kẹ evaọ ifonu na yọ ohwo nọ oma o ga tere he hayo nọ ẹyao o kru fihotọ hayo ohwo nọ a rẹ kaki dihọ uwou hu fiki iruo riẹ. Ahwo jọ a be rria ikegbe hayo iwou nọ a diogba wariẹ họ nọ a rẹ kẹ amọfa uvẹ rueva ha. Fikiere, re ma daoma ru odibọgba mai gba ziezi, roro kpahe epanọ whọ sae rọ rehọ ifonu se isẹri.
[Enọ Uwuhrẹ]
1. Fikieme isẹri-ise ifonu e sai ro fi obọ họ evaọ odibọgba mai?
2. Oghẹrẹ vẹ ọruẹrẹfihotọ isẹri-ise ifonu o rẹ jọ?
3. Eme ma re wo họ iroro nọ ma tẹ be rehọ ifonu se isẹri?
4. Eme isẹri-ise ifonu e sai fi obọ họ k’omai ru evaọ ekwotọ mai?