Epanọ Ma Sai ro Wo Onaa Ziezi Evaọ Usi Uwoma Ota​—Ifonu nọ A rẹ rọ Ta Usi Uwoma

OWARE NỌ U RO WUZOU: Ifonu nọ a rẹ rọ ta usi uwoma yọ obọdẹ edhere jọ nọ ma re ro “se isẹri ziezi kpahe usi uwoma” na. (Iru 20:24)a U re fiobọhọ kẹ omai sae ta usi uwoma kẹ amọfa otẹrọnọ o lọhọ re ma nya kpobọ iwou rai hi.

EPANỌ A RE RO RU EI:

• 

  Ruẹrẹ oma kpahe. Salọ uzoẹme nọ u kiehọ. Kẹsena who ve kere eme nọ whọ gwọlọ ta fihotọ. U te no ere no, whọ sae jẹ ruẹrẹ ẹme jọ fihọ kpẹkpẹe nọ o ta kpahe ẹjiroro nọ who ro se otẹrọnọ ifonu na ọvo o kpọ owhẹ unu nọ ohwo na ọ gbẹ riẹ hẹ. O rẹ mai woma re whọ keria aro emẹjẹ avọ ẹme nọ who kere fihotọ no na nọ o rrọ aro ra gbe eware efa nọ who ti kugbe rọ ta ẹme ra na wọhọ, ekọmputa hayo ifonu ra nọ who jo rovie JW Library^® hayo jw.org^® fihotọ no

• 

  Dhoma mu. Ta ẹme epanọ whọ rẹ ta ẹme. Ru unu ohwohwẹ je veghe abọ nọ whọ be ta ẹme na wọhọ epaọ ẹsenọ whọ be ruẹ ohwo na. Who dhizu ga hrọ họ. O rẹ mai woma re amọfa a jọ kugbe owhẹ. Otẹrọnọ ohwo na ọ nọ onọ jọ, wariẹ onọ na do via re ohwo nọ ọ rrọ kugbe owhẹ na o fiobọhọ kẹ owhẹ hae gwọlọ uyo na

• 

  Ru ọruẹrẹfihotọ kẹ ozihebro. Otẹrọnọ ohwo na o dhesẹ isiuru, whọ sae nọ onọ jọ fihotọ nọ wha te kẹ uyo riẹ oke ofa nọ who te se. Whọ sae jẹ ta kẹ ohwo na nọ whẹ ọvo whọ te rọ obe jọ sei hayo whọ te rọ e-mail vi obe na sei. Hayo whọ sae jẹ vuẹe nọ whọ te rehọ ifonu hayo e-mail vi ividio mai jọ hayo izoẹme jọ nọ e rrọ oria itanẹte mai sei. Nọ o tẹ lọhọ, vuẹe kpahe eware efa nọ ma wo evaọ oria itanẹte mai na