Epanọ Ma Sai ro Wo Onaa Ziezi Evaọ Usiuwoma Ota—Ta Ẹme na Jẹhọ re Whọ Sai Zihe Oke Ofa

Oware nọ U ro Wuzou: Ma tẹ ruẹ ohwo nọ o dhesẹ isiuru, ma re zihe bru ei re ma ku ame họ ibi uzẹme nọ ma kọ na. (1 Kọr. 3:6) Onana o gwọlọ nọ taure ma tẹ te nyavrẹ, ma rẹ nọ ohwo na oke nọ ma sai ro zihe bru ei. U te no ere no, u fo nọ ma rẹ nọ onọ jọ fihotọ nọ ma re zihe ze te kẹ uyo riẹ. Onana u ti ru nọ ohwo na o ti ro rẹro ra, yọ o te mae were iẹe otẹrọnọ uyo onọ na o rrọ obe nọ whọ kẹ riẹ na. Whọ tẹ ta ẹme na jẹhọ, u ti ru nọ whọ te rọ ruẹ ẹme ta nọ who ti zihe bru ei na keme wha ta ẹme na re he, yọ u ti je ru ohwo na riẹ oware nọ who ro zihe. Nọ ma te zihe bru ohwo na ma vẹ ta kẹe nọ ma nyaze re ma kẹ uyo onọ nọ ma nọ fihotọ na, kẹsena ma vẹ ruọ ẹme na.

Epanọ A re ro Ru Ei:

Whọ tẹ be ruẹrẹ oma kpahe kẹ ẹme nọ whọ te ta evaọ usiuwoma, ruẹrẹ onọ jọ họ nọ who ti gbolo fihotọ nọ u ti ru owhẹ zihe bru ohwo na oke ofa. O sae jọ onọ nọ o rrọ uzoẹme jọ evaọ obe nọ whọ te rọ kẹ ahwo evaọ ẹdẹ yena, hayo o sae jọ onọ jọ nọ a kẹ uyo riẹ evaọ obe mai jọ nọ ma bi ro wuhrẹ ahwo, who ve dhesẹ obe na kẹe nọ who te zihe.
Nọ who te bi ku ẹme họ kugbe ohwo nọ o dhesẹ isiuru, ta kẹe nọ o te were owhẹ re who zihe ze oke ofa, kẹsena whọ vẹ nọe onọ nọ whọ ruẹrẹ kpahe na. Evaọ eria jọ ahwo a rẹ kaki wo uvẹ hẹ, fikiere a rẹ kake rọwo nọ who zihe bru ai ze he. O tẹ rrọ ere, whọ sae ta nọ: “Kọ oke utionana whọ rẹ mae rọ jọ uwou? [Kuvẹ kẹ uyo.] Evaọ oka notha, mẹ te wẹriẹ re mẹ kẹ uyo onọ nana . . . Otẹrọnọ obọ ra o rrọ oware nọ mẹ tẹ nyaze, whọ sae j’omẹ riẹ.”
Otẹrọnọ whọ ta kẹ ohwo jọ nọ who ti zihe bru ei oke ofa, zihe evaọ uzedhe oke nọ wha rọwo fihọ na. (Mat. 5:37) Taure whọ tẹ te nyavrẹ evaọ ẹdẹ nọ who ro zihe na, ru ọruẹrẹfihotọ nọ whọ sai ro zihe oke ofa.

Dao Onana Evaọ Amara Na:

Whọ tẹ be ruẹrẹ oma kpahe kẹ ẹme nọ whọ te ta evaọ usiuwoma, ruẹrẹ onọ jọ họ nọ who ti gbolo fihotọ nọ u ti ru owhẹ zihe bru ohwo na oke ofa. Dhesẹ iẹe kẹ oniọvo nọ wha gbẹ rrọ usiuwoma.