Ta Usiuwoma na Evaọ Oria Kpobi

¹ Ileleikristi ọsosuọ a ta usiuwoma na evaọ oria kpobi. Ọwhọ rai ọ ga te epanọ evaọ udevie ikpe 30 nọ Jesu Kristi ọ rọ kparoma no, ovuẹ Uvie na o tẹ jọ onọ ‘a vuẹ rọ kẹ enọ a ma kpobi evaọ akpọ na no.’—Kọl. 1:23.

² Idibo ajọwha Jihova nẹnẹ a wo ẹjiroro ọvo na re—re a rehọ usiuwoma Uvie na ro te ahwo kpobi obọ. Eme ọ sai fiobọhọ k’omai le ute nana t’obọ? Ahwo nọ a bi ru iruo oke vọvọ a bi dhe ebuebuo yọ ẹsibuobu a rẹ jọ uwou ho. A gbe bi ruiruo ho, kiyọ a bi kperẹ, be dẹ eware, hayo a bi le oghẹrẹ arozaha jọ. Kọ ẹvẹ a be rọ rehọ ovuẹ Uvie na ro te enọ i te obọ?—Mat. 10:11.

³ A be nya te ejọ oma evaọ oria iruo rai. Makọ ewho ekakao i wo oria iruo nọ ahwo buobu a rẹ jọ unwenọ okikpo. Evaọ ikpewho, ahwo nọ i re ruiruo evaọ ekọpeni hayo iwou ọfisi nọ a bọ kpehru gbe enọ e be rria iwou nọ a be jọ rro-iro egaga a bi se isẹri na kẹ ae—ibuobu rai oye họ orọ ọsosuọ rai. Evaọ urere oka, ejọ nọ a t’ẹme kẹ okenọ a bi serihọ evaọ igege-eriosehọ, hayo eria arozaha, hayo okenọ a be hẹrẹ evaọ egareji hayo evaọ eria eki, a muẹrohọ ai no nọ a wọso usiuwoma na ha.

⁴ Unu iwhowho-uvie nọ u bi dhe ebuebuo a bi ru omodawọ obọdẹ re a se isẹri evaọ eria ẹgbede, eria kpobi nọ a jẹ sai duku ahwo. Oke ọsosuọ, Iseri enana a je sienẹ hemu yọ o dina jọ udubro kae fikinọ usiuwoma ota nọ o mae rọ uruemu o rerie rai obọ no, wọhọ orọ n’uwou r’uwou. Kọ ẹvẹ o rọ ae oma enẹna?

⁵ Oniọvo jọ nọ o wo ona usiuwoma ota ọ ta nọ: “U ru odibọgba mẹ kpokpọ no!” Oniọvo ọfa jọ o fibae nọ: “O lẹliẹ omẹ bi muẹrohọ otọ ẹsikpobi.” Ọkobaro jọ nọ ọ kpako no o muẹrohọ nọ: “O be hai ru omẹ kpokpọ evaọ iroro, ugboma, gbe evaọ ẹzi, . . . yọ mẹ gbẹ be rro haro.” Owhowho-uvie jọ o muẹrohọ nnọ enẹna ọ be nya te ahwo nọ a ti lele Isẹri Jihova t’ẹme vẹre he oma. Iruo nana o da ruọ izoge na oma no re. Enẹ uzoge jọ ọ ta: “O rọ oware omawere keme whọ rẹ t’ẹme kugbe ahwo buobu.” Ọfa jọ ọ ta nọ: “Me bi fi ebe họ ada vi epaọ ọsosuọ!” Enana kpobi e be via evaọ ekwotọ nọ a bi ru re kẹse kẹse.

⁶ Esẹro Ọnyawariẹ A be k’Obaro: Nọ a vuhumu nọ ‘eyero akpọ na u bi nwene’ na, Ukoko-Ulogbo o tẹ jiroro kẹle na re esẹro ọnyawariẹ a he nwene oma ọ usiuwoma ota rai k’oka k’oka re a sae rehọ usiuwoma na te ahwo buobu oma. (1 Kọr. 7:31) Evaọ ikpe buobu, esẹro okogho a ruẹrẹ ohiohiẹ edẹ ẹkpoka na họ no rọkẹ usiuwoma n’uwou r’uwou, yọ a ruẹrẹ oke uvo họ rọkẹ izihebro gbe iwuhrẹ Ebaibol. Evaọ eria jọ, oma yena o rẹ sai gbe w’iruo. Evaọ eria efa, umutho ọvo a rẹ sai ru evaọ usiuwoma n’uwou r’uwou eva ohiohiẹ edẹ ẹkpoka jọ. Evaọ eria itieye na, ọsẹro ọnyawariẹ ọ rẹ sai jiroro sọ u woma re a rehọ ohiohiẹ ta usiuwoma ọ n’uwou-eki ruọ uwou-eki hayo isẹri ise iyẹrẹ. Hayo ọ sai ru ọruẹrẹkpahe re umutho ahwo jọ a se isẹri evaọ iwou ọfisi nọ a bọ kpehru, iwou-eki, egareji, hayo eria ẹgbede efa. Ẹkwoma iwhowho-uvie nọ e rẹ rehọ oke rai ruiruo ziezi, a jẹ sae nya te ahwo buobu efa oma.

⁷ Iyẹrẹ i dhesẹ nọ te esẹro ọnyawariẹ te iwhowho-uvie a dede ọkpọvio ọnana rehọ no ziezi. Igboma ekpako buobu a zizie esẹro ọnyawariẹ no re a wuhrẹ umutho iwhowho-uvie jọ kpahe abọ sa-sa iruo na nọ e gwọlọ nọ a rẹriẹ aro ku. O be hai fiobọhọ kẹ iwhowho-uvie enana re a lele ọsẹro ọnyawariẹ evaọ oke nọ o te bi ru abọ iruo enana jọ. Ae omarai re, a wuhrẹ amọfa no. (2 Tim. 2:2) Fiki onana, a be rehọ usiuwoma na te ahwo buobu efa oma.

⁸ Evaọ uzẹme, u fo nọ whọ rẹ hẹrẹ iweze ọsẹro ọnyawariẹ tao re whọ tẹ dao idhere usiuwoma ota efa enana ha. Ẹjiroro jọ nọ e sai w’iruo evaọ ekwotọ ra ena:

⁹ Isẹri-Ise Iyẹrẹ: Nọ ma te weze te iwou nọ ahwo a be rria nọ e rọ rirẹ evaọ ohiohiẹ o rẹ sai gb’omai unu ẹsejọ inọ, ‘Kọ bovẹ ahwo na kpobi a rọ?’ Ma sae ruẹ nọ a vi otujọ uwou hayo a be dẹ eware, hayo kpohọ eki. Kọ whọ daoma no re whọ nya te ai oma ẹkwoma isẹri-ise iyẹrẹ? Nọ a tẹ riẹe ru, abọ odibọgba nana o rẹ sai w’ẹvi gaga. Ukpenọ ma rẹ rehọ emagazini dikihẹ oria ovo, o rẹ mai woma re ma bikẹle ahwo na je mu ẹme ọwhẹwhẹtiẹ họ kugbe ai. U du fo re a se isẹri kẹ ohwo kpobi nọ ọ be nya vrẹ hẹ. T’ẹme kẹ ahwo nọ a bi dhuoma ha, enọ e rọ evaọ imoto nọ e be dhẹ hẹ hayo ahwo nọ a be hẹrẹ imoto. Evaọ emuhọ, whọ sai yere iei sasasa whọ vẹ hẹrẹ uyo. Otẹrọnọ ohwo na ọ gwọlọ lele owhẹ t’ẹme, whọ sae nọe ẹjiroro nọ o wo kpahe uzoẹme nọ who roro nọ u ti siei urru.

¹⁰ Ọsẹro ọnyawariẹ jọ o zizie iwhowho-uvie ezeza jọ re a kuomagbei avọ aye riẹ evaọ isẹri-ise iyẹrẹ. Eme o no rie ze? Ọ n’iyẹrẹ nọ: “O jọ emamọ ohiohiẹ k’omai! Inoma ọ ma di ahwo họ uwou ho e jariẹ hẹ. Ma fi emagazini 80 gbe emebe-evẹvẹ buobu họ ada. Ma jọ eria buobu t’eme nọ e rẹ sasa oma. Oniọvo jọ evaọ usu na, ọnọ onana o jọ usiuwoma iyẹrẹ ọsosuọ riẹ, ọ ta via nọ: ‘Mẹ rọ ukoko na ikpe buobu no yọ me vuhu oware nọ o jẹ vrẹ omẹ na mu hu!’ Evaọ urere ẹkpoka na, emagazini ukoko na nọ i bu thomawa vẹre na i te kie kpotọ.”

¹¹ Nọ o je rri ukoko nọ o kẹle riẹ, ọsẹro ọnyawariẹ ọvo na o te muẹrohọ nọ iwhowho-uvie buobu a kpohọ isẹri-ise iyẹrẹ evaọ ohiohiẹ ẹdẹ jọ rekọ emamọ iyẹrẹ ọvo i no rie ze he. Imava ọvo oniọvo ọmọtẹ jọ ọ t’ẹme kẹ evaọ etoke usiuwoma na kpobi, keme ahwo kpobi nọ ọ nya ku a jẹ variẹ oma kpohọ iruo. Ọsẹro ọnyawariẹ na ọ tẹ jiroro nnọ ai kpobi a zihe kpohọ iyẹrẹ ọvo na nọ oke o tẹ dina kẹle abọ uvo no evaọ ohiohiẹ na. A te ru ere, a tẹ rria rite udevie uvo. Oniọvo ọmọtẹ nọ o lele imava ọvo t’ẹme eva ohiohiẹ ẹdẹ ọsosuọ na o te ru woma viere evaọ oke nọ o zihe kpozi. O fiọ emagazini 31 gbe ibroshọ 15 họ ada, ọ rehọ edẹ gbe adrẹse imahrẹ, je muọ obe uwuhrẹ Ebaibol ivẹ họ! Amọfa evaọ utu na a wo iyẹrẹ uduowha ovo na re.

¹² Nọ whọ tẹ nyaku ohwo nọ o dhesẹ isiuru, daoma re whọ rehọ odẹ, adrẹse, gbe inọmba ifonu ohwo na. Ukpenọ who rẹ nwane nọe ovavo, whọ sae ta nọ: “Ẹmeọta kugbe nana ọ were omẹ kẹhẹ. Edhere jọ ọ riẹ nọ ma sae gbẹ rọ tae haro evaọ oke ofa?” Hayo nọe nnọ: “Edhere jọ ọ riẹ nọ mẹ sae rọ ruẹ owhẹ evaọ obọ uwou?” Ibuobu nọ a t’ẹme kẹ evaọ edhere otiọna a rọwo nọ a zihe bru ai. Jọ u muowhẹ ẹro nọ who wo omobe uzizie nọ who re ro zizie ahwo nọ a sae gwọlọ nọ a re kpohọ iwuhrẹ.

¹³ Otẹrọnọ whọ t’ẹme kẹ ohwo nọ o wo isiuru nọ ọ be rria ẹkwotọ ukoko ọfa, who re kpeze odẹ gbe adrẹse na se ai re inievo nọ e rọ obei a lele isiuru na. Kọ isẹri-ise iyẹrẹ o rọ edhere nọ o rẹ jọ ẹkwotọ ra w’iruo evaọ ẹvaha usiuwoma na? Otẹrọ ere, whọ kiẹ uzoẹme ọ “Gwọlọ Enọ I Wo Isiuru Ẹkwoma Isẹri-Ise Iyẹrẹ nọ U w’Iruo” riwi evaọ ukere ọ July 1994 ọrọ Odibọgba Uvie Mai (ọrọ Oyibo). Kẹsena who ve ru ọruẹrẹfihọ re who ru isẹri-ise iyẹrẹ evaọ okenọ u fo nọ o rẹ sai fiobọhọ k’owhẹ nya te ahwo buobu oma.

¹⁴ Isẹri-Ise Evaọ Ofa Ẹgbede: Evaọ ohiohiẹ jọ unu ekobaro jọ a tẹ jiroro nọ a rẹ ta usiuwoma kẹ ahwo jọ nọ a jẹ hẹrẹ imoto kẹle ekọleji otẹwho na. Nọ eme nọ a jẹ ta i je siuru na, ẹbẹbẹ jọ ọ tẹ j’ariẹ. Evaọ okenọ usiuwoma na u te muhọ no, omoto ọ vẹ dhẹ ze, ẹme na o ve kuhọ idudhe. Ekobaro na a te dhugbe lele ai ro imoto na re a ta usiuwoma na haro rọkẹ ahwo nọ e rọ omoto na bẹsenọ omoto na o re te oka ẹwho na. Nọ omoto na o te te obọ oka no, ekobaro na a vẹ ro omoto na zihe ze, omoto na ọ be dhẹ yọ a be ta usiuwoma. Nọ a nya ziheze unuẹse jọ no, a te ku iyẹrẹ iruẹru rai kpobi kugbe: Emagazini nọ a fihọ ada i bu vi 200 yọ a muọ iwuhrẹ Ebaibol ezeza họ. Ahwo jọ nọ a jọ omoto na a rehọ unevaze rọ adrẹse gbe inọmba ifonu rai kẹ ae re a weze bru ai eva obọ uwou. Oka nọ u lele rie, ekobaro na a te zihe kpohọ oria nọ imoto i je serihọ na a te ru epọvo na. A te fi emagazini 164 họ ada je muọ uwuhrẹ Ebaibol ọvo ọfa họ. Ohwo jọ nọ ọ jọ oria jọ ro omoto na ọ tẹ keria akaba ọvo nọ o kiọkọ—kẹle ọkobaro jọ. Ọ tẹ kpaova rri oniọvo na ọ tẹ ta avọ oma-ehwẹ nọ: “Mẹ riẹ nọ whọ te k’omẹ Uwou-Eroro jọ.”

¹⁵ Iwhowho-uvie buobu a re se isẹri nọ u re w’iruo evaọ okenọ a tẹ ruọ imoto, itreni, hayo arupre bi kpohọ erẹ. Kọ ẹvẹ whọ sae ro muọ ẹmeọta họ kugbe ohwo nọ ọ keria kẹle owhẹ? Owhowho-uvie ikpe 12 jọ o muọ Awake! họ ese ọvo evaọ omoto, bi rẹro nọ ọ te kpare isiuru ọmọtẹ ikpe kpegbọ jọ nọ ọ keria kẹle iẹe. O tẹ ghinẹ via ere. Ọmọtẹ na ọ tẹ nọe kpahe oware nọ o bi se, uzoge na ọ tẹ kuyo nọ o bi se kpahe ifue ebẹbẹ nọ evrawha a be rẹriẹ ova dhe. O te fibae nọ o wo erere gaga no uzoẹme na ze no yọ o sai fiobọhọ kẹe re. Avọ evawere ọmọtẹ na ọ tẹ rehọ emagazini na. Evrawha ivẹ efa a te yo ẹme nọ a jẹ ta na, a tẹ ta nọ ọ kae emagazini re. Fiki onana, edraeva omoto na ọ tẹ dhẹ ruọ akotọ edhere na ọ tẹ nọ kpahe oware nọ emagazini na i je siuru t’ere. Nọ ọ riẹ no, ọye omariẹ ọ tẹ rehọ ejọ re. Evaọ uzẹme, onana kpobi o hae via ha o gbẹ rọ nọ owhowho-uvie ọmaha ọnana ọ wha unu emagazini buobu nọ ọ sae ghale kugbe ahwo kpobi nọ i wo isiuru hu!

¹⁶ Isẹri-Ise Evaọ Ogege Gbe Oria nọ Imoto E rẹ Kpahe: Isẹri-ise evaọ ogege-arozaha gbe oria nọ imoto e rẹ kpahe yọ obọdẹ edhere nọ a re ro te ahwo oma. Kọ whọ daoma se isẹri no evaọ eria nọ imoto e rẹ kpahe evaọ eria nọ a rẹ jọ dẹ eware? Ẹsikpobi hae rehọ umutho oke jọ ro muẹrohọ okegbe nọ whọ rọ. Gwọlọ ohwo jọ nọ ọ be varioma ha hayo ohwo nọ ọ rọ evaọ omoto be hẹrẹ, whọ vẹ daoma muọ ẹme ọwhẹwhẹtiẹ họ. Ẹme na ọ tẹ gbẹ nya haro, who ve muọ ovuẹ Uvie họ. Daoma re whẹ ọvo whọ jọ usu, rekinọ owhowho-uvie jọ ọ rẹ jọ okegbe yena. Whọ wha ẹkpa ologbo ho, ọgbẹgbẹdẹ hayo ru evaọ idhere efa nọ a je fiẹrohọ iruo ra. Wo areghẹ. O rẹ mai woma re a raha umutho oke ọvo evaọ egareji jọ whọ vẹ nya kpohọ ọfa. Otẹrọnọ ohwo jọ ọ rọwo nọ o re lele owhẹ t’ẹme he, rehọ oma uwowolẹ nya vrẹ re whọ gwọlọ omọfa nọ who re bigba. Oniọvo jọ nọ o ru enẹ o te fi emagazini 90 họ ada evaọ amara ọvo nọ o je se isẹri evaọ egareji.

¹⁷ Ahwo jọ a rẹ nyai serihọ evaọ obọ ogege; amọfa a re kpohọ obei nya e zaharo hayo nya e raha oke kugbe emọ rai. Ababọ awhaha nọ whọ rẹ wha fihọ iruẹru rai, gwọlọ idhere nọ who re ro se isẹri. Oniọvo ọmọzae jọ o mu ẹme họ kugbe ọnọ ọ rẹ sẹro ogege jọ ọ tẹ ruẹ nọ o bi roro kp̣ahe imu gbe obaro emọ riẹ. A te muọ obe uwuhrẹ Ebaibol họ nọ a jẹ hai wuhrẹ kẹse kẹse evaọ ogege na.

¹⁸ Isẹri-Ise Evaọ Eki: Okenọ who te bi yere ohwo, mu ẹme na họ evaọ edhere ọwhẹwhẹtiẹ. Otẹrọnọ ohwo na ọ kpahe ẹme, whọ vẹ nọe onọ, whọ vẹ gaviezọ ziezi evaọ okenọ ọ tẹ be ta oreva riẹ. Wo isiuru kpahe ẹme nọ ọ be ta na. Dhesẹ nọ wo rri ẹjiroro riẹ ghaghae. O tẹ lọhọ, rọwo kugbei.

¹⁹ Oniọvo ọmọtẹ jọ ọ t’ẹme ọ isiuru jọ kugbe ọkpọkuaye jọ kpahe epanọ uyere-akpọ o ga te. Aye na ọ tẹ nwane rọwo ẹme na, ẹme ọsasa o te noi ze. Oniọvo ọmọtẹ na ọ tẹ rehọ odẹ gbe adrẹse aye na, o te ru ozihebro evaọ oka ovo yena.

²⁰ Usiuwoma-Ota n’Uwou-Eki ruọ Uwou-Eki: Ikoko jọ a wo eria iwou-eki eva ẹkwotọ nọ a ghale kae. Oniọvo nọ ọ be sẹro ẹkwotọ na ọ rẹ sai ru obọdẹ ekade ẹkwotọ kẹ abọ nana nọ iwou-eki e rọ buobu na. Evaọ ẹkwotọ nọ iwou nọ a rẹ rria e jẹ gua kugbe iwou-eki, a re kpoka họ ekade ẹkwotọ rai ziezi ro dhesẹ nọ a re ru eria eki na kugbe ai hi. Evaọ ekwotọ efa, a rẹ sai ru iwou nọ a be rria na kugbe iwou-eki na. Ekpako ukoko na a sai zizie iwhowho-uvie nọ i te re a ru ẹkwotọ iwou-eki na kẹse kẹse re a siọ iruo n’uwou-eki ruọ uwou-eki ba e rri vo.

²¹ A te zizie owhẹ re who wo obọ evaọ iruo nana yọ who ti ruei vẹre he, emamọ edhere nọ whọ sae ro ‘wo udu’ họ who re ru iwou-eki esese tao; kẹsena, nọ who je wo udu no omojọ, who ve ru enọ e rẹ ruaro na. (1 Tẹs. 2:2) Nọ whọ tẹ be ta usiuwoma n’uwou-eki ruọ uwou-eki, gẹgọ wọhọ epanọ whọ rẹ gọ evaọ okenọ who bi kpohọ ewuhrẹ evaọ obọ Ọgwa Uvie. O tẹ lọhọ, rueva uwou-eki na evaọ okenọ ehreki nọ a rẹ zẹ eware kẹ e gbẹ riẹ hẹ. Mi uvẹ re who lele ọga-iruo hayo ohwo nọ o w’uzou na t’ẹme. Jọ sasasa, yọ maero, t’ẹme kpẹkpẹe. U du fo re who wounu hu. Eria eki buobu a rẹ whẹtiẹ ehreki h’oma fikiere o rẹ kẹ ai uye he otẹrọnọ ohwo ọ vẹ ro ai.

²² Who te yere ọzẹ-eki na no, whọ sae ta nọ: “Ma rẹ kaki di ethueki họ uwou ho fiki uvẹ nọ o gba rae họ, fikiere ma weze bru owhẹ ze obọ uwou-eki obonẹ re ma nya siọ uzoẹme iroro jọ ba k’owhẹ re who se.” Whọ vẹ ta umutho ẹme kpahe emagazini nọ who bi fihọ ada na.

²³ Hayo whọ sae dao onana nọ whọ tẹ be t’eme kẹ ọga-iruo na: “Ma muẹrohọ nọ ehreki a rẹ daoma re a riẹ kpahe eware nọ e be via. Uvitha okpokpọ Uwou-Eroro Na (hayo Awake!) o wha uzoẹme nọ u kpomahọ omai omomọvo.” Dhesẹ iẹ kẹe, who ve ku ẹme na họ nọ: “U mu omai ẹro nọ ese riẹ o te were owhẹ.” Who ve fiei họ ada evaọ unuigho riẹ.

²⁴ Otẹrọnọ emọ-iruo e riẹ, yọ u fo, whọ sae fibae nnọ: “Kọ o sae were owhẹ re mẹ ta umutho ẹme kpẹkpẹe kẹ emọ-iruo ra na?” Ọ tẹ kuvẹ, whọ vẹ kareghẹhọ nọ whọ yeyaa nọ whọ te t’ẹme kpẹkpẹe, yọ ọga-iruo na o ti rẹro nọ who ti koko eyaa ra re. Otẹrọnọ emọ-iruo na jọ a gwọlọ t’ẹme thethei, o rẹ mai woma re ma nya bru ai kpobọ uwou rai.

²⁵ Kẹle na, umutho iwhowho-uvie jọ evaọ ẹwho ọkakao jọ a kuomagbe ọsẹro ọnyawariẹ evaọ usiuwoma n’uwou-eki ruọ uwou-eki. Iwhowho-uvie na jọ a jẹ dhozọ evaọ oke ọsosuọ, fikinọ a ti ruei ẹdẹvo ho; rekọ u lehie he a te dhoma mu jẹ reawere riẹ. Kawo vi auwa ọvo, a t’ẹme kẹ ahwo 37 je fi emagazini 24 gbe ibroshọ 4 họ ada. Oniọvo ọmọzae jọ o muẹrohọ nọ vẹre ahwo nọ a ruẹ t’ẹme kẹ evaọ umutho oke n’uwou-eki ruọ uwou-eki na i bu vi ahwo nọ a rẹ ruẹ t’ẹme kẹ eva usiuwoma n’uwou ruọ uwou evaọ amara soso.

²⁶ Ru re Uvẹ Usiuwoma-Ota u Rovie: Jesu o ru usiuwoma ota riẹ nya mu oke nọ ọ ruẹre oma họ kẹ usiwoma-ota ọvo ho. Ọ vaha usiuwoma na kẹ ahwo evaọ oke nọ u fo kpobi. (Mat. 9:9; Luk 19:1-10; Jọn 4:6-15) Muẹrohọ oghẹrẹ nọ iwhowho-uvie jọ a bi ro ru uvẹ kẹ usiuwoma.

²⁷ Otujọ a fi riei họ uruemu no re a se isẹri kẹ eyewọ nọ e be jọ unuighẹ isukulu hẹrẹ emọ rai. Nọ eyewọ buobu a re te obei iminiti 20 no re isukulu e tẹ te fa na, oke o rẹ j’ariẹ nọ a re ro lele ai t’ẹme nọ o rẹ kpare isiuru no uzoẹme Ikereakere jọ ze.

²⁸ Ekobaro buobu a bi muẹrohọ epanọ a rẹ rọ nya te ahwo nọ a wo obọdẹ isiuru kpahe ugogo uzoẹme jọ nọ a jọ emagazini mai t’ẹme te. Wọhọ oriruo, a dede oniọvo ọmọtẹ jọ rehọ ziezi evaọ okenọ ọ rehọ uzoẹme ọ “Ozighi ọ Isukulu” nọ o roma via evaọ Awake! ọ December 22, 1995, ro se isukulu ezeza nọ e rọ ẹkwotọ ukoko riẹ. Ọ rehọ emagazini nọ e t’ẹme kpahe uzuazọ uviuwou gbe olahiẹ emọ ro se otu ẹruọsa uviuwou a te ziziei nọ ẹsikpobi ọ hae rehọ ukere kpobi nọ o t’ẹme kpahe izoẹme itieye se ai. Odederehọ nọ a dhesẹ kẹe evaọ obọ ọfisi ọ ẹruọsa enọ i w’iruo ho kpahe Awake! ọ March 8, 1996, nọ o t’ẹme kpahe ababọ-iruo na, o dhesẹ i rie nọ “o rro thesiwa.”

²⁹ Ọsẹro ubrotọ jọ ọ n’iyẹrẹ nọ ọye omariẹ avọ aye riẹ a rẹ ta usiuwoma ọnyakuo kẹse kẹse evaọ oke nọ a tẹ be dẹ eware emuore rai. A rẹ nya e dẹ eware evaọ okenọ ahwo a gbẹ ruoma rọ uwou-eki na ha, nọ ehreki na e be nyaze godogodo. A n’iyẹrẹ emamọ usiuwoma nọ a ta buobu.

³⁰ Evaọ ikogho jọ, a kẹ iwhowho-uvie nọ i te ziezi udu no re a se isẹri evaọ igege-erupre. Ẹsejọ, a wo oghọghọ isẹri-ise kẹ ahwo erẹwho efa nọ e be rria erẹwho nọ ahwo Jihova a jọ bu hu no. Oria nọ a je duku isiuru, a rehọ omobe-ovẹvẹ hayo emagazini na rọ kẹ ahwo no.

³¹ A gbẹ k’uvẹ re ohwo ọ nya e ta usiuwoma kẹ enọ erọ iwou hayo etegu nọ irro-egaga e rọ eva evaọ ẹkwotọ ukoko na ha, otujọ a rehọ ẹghẹ ta usiuwoma na no rọ kẹ enọ i bi roiro na hayo rọkẹ ega-iruo evaọ ọfisi nọ a jẹ hwosa uwou. A rehọ edhere ọvo na ro ruiruo no evaọ iwou ahwo nọ a di ogba wariẹhọ. Ọsẹro ọnyawariẹ jọ avọ umutho iwhowho-uvie jọ a weze kpohọ ighẹ-logbo ihrẹ erọ uyie-ibruwou evaọ edhere nana. Evaọ ighẹ ọvuọvo, a ta kẹ ọsẹro ighẹ na nọ dedenọ a kẹ rae uvẹ re a weze ziọ uyie-ibruwou na evaọ edhere rai hi, a gwọlọ nọ eme nọ e rọ ebe kpokpọ rai na i vru mi ei hi. Esẹro ighe-logbo na kpobi a rọ evawere rehọ emagazini na a tẹ jẹ n’ekpẹ ukere n’otha re! Enọ e be rria ighẹ-logbo itieyena kọ ifonu a rọ t’ẹme kae.

³² Daoma re Whọ Ta Usiuwoma na Evaọ Eria Kpobi: Re ma rria te omarọkẹ mai u kugbe ovẹrẹ nọ ma rẹ rọ vuẹ ovuẹ Uvie na. Re ma nya te ahwo na oma evaọ oke nọ u kiehọ ae oma, o gwọlọ re ma fiọ ẹgwọlọ omobọ mai họ akotọ re ma “ruẹse siwi ahwo jọ.” Idibo Jihova kpobi nọ e roma kẹ no a rẹ gwọlọ re a sae ta, wọhọ epanọ Pọl ukọ na ọ ta nọ: “Fiki usiuwoma na me ro ru eware enana kpobi re mẹ sai ru ẹkẹ abọ mẹ eva eva riẹ.”—1 Kọr. 9:22, 23.

³³ Pọl o gbe kere nọ: “Fikiere mẹ rẹ dhigbẹ yoma okuako mẹ viere, re ogaga Kristi o jọ omẹ oma. . . . Keme nọ omẹ rẹ kuako, kpakiyọ ẹsiẹe mẹ gae.” (2 Kọr. 12:9, 10) Ẹme na họ, mai ọvuọvo ọ sai ru iruo nana evaọ ẹgba obọmai hi. O gwọlọ nọ ma rẹ lẹ se Jihova rọkẹ ẹzi ọfuafo ọgaga riẹ. Ma tẹ lẹ se Ọghẹnẹ rọkẹ ẹgba, ma rẹ sai fiudu họ nnọ ọ te k’uyo elẹ mai. Kẹsena uyoyou mai rọkẹ ahwo o vẹ w’omai re ma gwọlọ uvẹ nọ ma rẹ rọ vuẹ ae usiuwoma na, evaọ oria kpobi nọ a je duku ai. Evaọ oka nọ o be tha na, kọ eme whọ gbẹ dawo ẹjirro ọvo jọ evaọ enọ e rọ uko obeva onana riwi hi?