Epanọ A rẹ rọ Ta Usiuwoma Evaọ Ẹkwotọ Ekiọthuọ
1 Kọ o rẹ were owhẹ re whọ ta usiuwoma evaọ ẹkwotọ nọ ahwo a rẹ jọ dede erara rehọ gbe oria nọ a je di ahwo họ uwou? Ẹsejọhọ oria jọ o rrọ ẹkwotọ ukoko ra nọ whọ jẹ sae ruẹ onana. Oghẹrẹ vẹ? Ẹkwoma eweze kpohọ iwou ekiọthuọ nọ e rrọ etẹe. Iwhowho-uvie nọ e rẹ ta usiuwoma no uwou-eki ruọ uwou-eki a rẹ reawere emamọ iyẹrẹ ẹsibuobu.
2 Ekwotọ ekiọthuọ e rrọ usu ekwotọ nọ a ghale kẹ ikoko jọ. Oniọvo nọ ọ be rọ ẹro te ẹkwotọ na ọ rẹ sae ruẹrẹ obọdẹ ekade omaa-udhesẹ ẹkwotọ fihọ kẹ ofẹ nana nọ eria ekiọthuọ e vọ gaga na. Ekade omaa-udhesẹ ẹkwotọ nọ a be rria kpobi nọ o kẹre te eria ekiọthuọ, a re dhesẹ iẹe vevẹ inọ a re ru eria ekiọthuọ na kugbe ẹkwotọ nọ ahwo a be rria na ha. Evaọ ekwotọ efa, a rẹ sai ru eria ekiọthuọ na kugbe iwou nọ ahwo a be rria. Otẹrọnọ whọ re jọ ẹkwotọ ekiọthuọ ta usiuwoma vẹre he, muhọ ẹkwoma iwou-eki esese jọ nọ whọ rẹ jọ ta usiuwoma.
3 Rehọ Edhere Ọlọlọhọ Nya bru Ahwo: Nọ whọ tẹ be ta usiuwoma no uwou-eki ruọ uwou-eki, o roja re whọ gọ ẹgọ wọhọ epanọ whọ rẹ gọ ẹgọ kpohọ ewuhrẹ evaọ Ọgwa Uvie. U re je woma re whọ salọ oke nọ uwou-eki na u re ro zurie he. O tẹ lọhọ, ro eva uwou-eki na evaọ okenọ ohwo ọvo nọ ọ be dẹ oware ọ rrọ uwou-eki na ha. Nọ onọ ohwo nọ o wuzou uwou-eki na hayo ohwo nọ ọ be rọ ẹro te uwou-eki na re who lele iei ta ẹme. Ta ugogo-ẹme nọ whọ wha nya, je ru ẹme na kpẹkpẹe. Eme whọ rẹ sae ta?
4 Whọ tẹ be ta usiuwoma kẹ ohwo nọ ọ be zẹ evaọ uwou-eki hayo ọnọ o wuzou uwou-eki na, whọ sae ta ẹme wọhọ: “Ahwo nọ a rẹ zẹ eki a re wo uvẹ hẹ, yọ o rẹ bẹbẹ re ma di ai họ uwou, fikioye ma je weze bru owhẹ ze evaọ oria iruo ra. Emagazini mai e rẹ ta kpahe eware nọ e be via ẹsikpobi wariẹ akpọ-soso họ.” Kẹsena who ve dhesẹ owọ-ẹme jọ kpẹkpẹe no emagazini na ze.
5 Hayo whọ sae dawo edhere ọlọlọhọ nana: “Ahwo buobu a gwọlọ riẹ kpahe Ebaibol na viere rekọ a wo oke tere he. Omobe-ovẹvẹ nana u dhesẹ omaa uwuhrẹ ọvọvẹ nọ a rẹ sae k’owhẹ nọ u ti fi obọ họ kẹ owhẹ ruẹ iyo kẹ enọ ra kpahe Ebaibol na.” Kẹsena who ve dhesẹ kpohọ ẹwẹ-obe avọ 4-5 ọrọ omobe-ovẹvẹ na Kọ Whọ Gwọlọ Riẹ Kpahe Ebaibol na Viere?
6 Otẹrọnọ ọnọ o wuzou uwou-eki na o wo uvẹ hẹ, whọ sai fi omobe-ovẹvẹ họ ada kẹe whọ vẹ ta nọ: “Mẹ te wariẹ zihe ze evaọ okenọ who te wo umuvẹ jọ. Mẹ te gwọlọ riẹ oware nọ who roro kpahe omobe-ovẹvẹ nana.”
7 Ẹbọga Isiuru nọ A Dhesẹ: Whọ sai tube ru obe-uwuhrẹ Ebaibol evaọ ẹkwotọ ekiọthuọ dede. Ọkobaro obọdẹ jọ ọ jẹ hae rehọ emagazini se ọthueki jọ ẹsikpobi. Nọ ọzae na o dhesẹ ovuhumuo kẹ oware nọ o je se, ọkobaro na o te dhesẹ oghẹrẹ nọ ma re ru obe-uwuhrẹ Ebaibol kẹe, ẹkwoma ibroshọ Gwọlọ na. A tuọ obe-uwuhrẹ na họ ẹsiẹsiẹe evaọ oria iruo ọzae na. Nọ ọkobaro na o wo eyero na fihọ iroro, o te ru oke uwuhrẹ na kpẹre fihọ iminiti 10 rite 15 evaọ oke kpobi nọ a bi ru uwuhrẹ na. Jọ mai oma mai ma ruabọhọ ẹgwọlọ enọ i te ẹkwoma usiuwoma nọ ma rẹ ta evaọ ẹkwotọ ekiọthuọ.
[Study Questions]
1. Irere jọ vẹ e rrọ usiuwoma nọ a rẹ ta evaọ ẹkwotọ ekiọthuọ?
2. Ẹvẹ a sai ro ru ọruẹrẹfihotọ usiuwoma ota evaọ ẹkwotọ ekiọthuọ?
3. Eme o ti fi obọ họ kẹ omai nọ usiuwoma ota mai u je w’iruo nọ ma tẹ be ta no uwou-eki ruọ uwou-eki?
4-6. Eme ma rẹ sae ta nọ ma tẹ be ta usiuwoma kẹ ohwo nọ ọ be zẹ eware evaọ uwou-eki hayo ọnọ o wuzou uwou-eki na?
7. Ẹvẹ ma sae rọ bọ isiuru nọ ma duku evaọ ẹkwotọ ekiọthuọ?