Ẹkpẹti Onọ

◼ Ẹvẹ ohwo ọ sai ro wo Uwou-Eroro Na gbe Awake! kẹ omobọ riẹ?

Nọ a si ọruẹrẹfihotọ ọkparedẹ Uwou-Eroro Na gbe Awake! gbe enọ a kporo fihọ ekasẹte itepu notọ evaọ evẹrẹ kpobi anwọ oke jọ ze na, iwhowho-uvie kpobi a rẹ jọ ukoko rai rehọ emagazini kẹ omobọ rai. Onọ onana u kpomahọ emagazini gbe ekasẹte itepu ọ Braille, enọ a rẹ rọ ẹkwoma ipostọfisi vi se ahwo nọ a te, ababọ ugho nọ ipostọfisi na i re mi. Iviena muẹrohọ nnọ ukoko kpobi o sae rehọ efọmo ọ Congregation Requests (M-202) na rọ yare emagazini. A rẹ sae rehọ efọmo nana yare erọ ẹvẹrẹ-ọfa gbe erọ ibiẹme ikpokpoko re.

Otẹrọnọ ohwo jọ evaọ ẹkwotọ rai ọ yare inọ a hae rehọ emagazini sei ẹsikpobi, iviena muẹrohọ nọ whọ rẹ rehọ emagazini na sei ẹsikpobi re uvitha jọ o se iẹe ba evo. Ahwo nọ a si no ukoko a rẹ sae rehọ emagazini hayo ebe efa kẹ oma rai evaọ oria nọ a rẹ rehọ ebe dhe evaọ Ọgwa Uvie na. Iwhowho-uvie a rẹ rehọ emagazini se ohwo nọ a si no ukoko wọhọ ejẹ emagazini vievie he.

Ọkparedẹ nọ uwou ogha na o te gbẹ jẹ rehọ ọvo họ erọ ahwo nọ owhowho-uvie ukoko ọ rẹ sai ro ru ejẹ emagazini hi. Otẹrọnọ Ogbẹgwae Iruo Ukoko na u bi vi ayare ọkparedẹ kẹ ohwo jọ nọ ọ rẹ sai wo emagazini na evaọ edhere ọfa ha fiki oware jọ, okere-obe na o re kere omobe kugbei nọ u re dhesẹ inọ Ogbẹgwae Iruo Ukoko na o kiẹ ọkparedẹ nana riwi je kuenu kẹe no.

Onana u dhesẹ inọ iwhowho-uvie a re kere se uwou ogha nọ a gwọlọ ọkparedẹ kẹ omobọ rai hi. Ọkparedẹ otiọye na nọ iwhowho-uvie hayo ohwo nọ o wo isiuru o ru kpobi, ma ti vi obe ayare na zihe se ukoko na.

◼ Ẹvẹ emagazini e sai ro te ohwo nọ ọ rrọ uwou-odi obọ?

Otẹrọnọ ukoko nọ o be rọ ẹro te iruo usiuwoma ota na evaọ ẹkwotọ nọ uwou-odi o rrọ a sae rọ emagazini se ahwo nọ a mu fihọ uwou-odi evaọ oria na, koyehọ ohwo nọ ọ rrọ uwou-odi ọ rẹ sai wo emagazini Uwou-Eroro Na gbe Awake! kẹ oma riẹ ẹkwoma iwhowho-uvie nọ i bi weze nya na. Otẹrọnọ onana o gbẹ lọhọ họ, ohwo uwou-odi na ọ rẹ sai ru ayare ọkparedẹ ẹkwoma uwou-ogha na nọ o re kere se. Iviena muẹrohọ inọ ohwo nọ a si no ukoko nọ ọ rrọ uwou-odi a rẹ sae kẹe emagazini na wọhọ epanọ a dhesẹ fihọ edhe-ẹme nana.