Gbẹ Hai Wo Erere no Uwou-Eroro Na gbe Awake! Ze

Enẹna nọ a be dobọ ọkparedẹ ọ emagazini Uwou-Eroro gbe Awake! ji na, o gwọlọ nọ ma rẹ daoma re uvumọ uvitha o siọ omai gbe ahwo nọ ma be ta usiuwoma kẹ ba evo.

Erọ Obọmai: Nọ ọkparedẹ ra o te reno, ru unu nọ whọ be rehọ evaọ oria emagazini na bu. Esẹgbini a re vi emagazini buobu re ohwo kpobi evaọ uviuwou na o wo ọrọ obọriẹ. Odẹ ra nọ who re kere fihọ ọra u re ru nọ whọ gbẹ rọ ọthobọ fi ei họ ada no evaọ usiuwoma ha. Okenọ ebe i te kpozi, inievo nọ e be rẹrote ae na a rẹ nwane rehọ uvitha kpobi via k’ahwo evaọ obọ Ọgwa Uvie na.

Ejẹ Emagazini: Iwhowho-uvie e rẹ daoma wo ejẹ emagazini kugbe ahwo nọ a wo isiuru kpobi nọ e gwọlọ wo uvitha kpobi. Emagazini na nọ a rẹ rọ obọ wha se ahwo otiọye na o rẹ kẹ uvẹ nọ a rẹ rọ bọ isiuru nọ a dhesẹ na je muọ iwuhrẹ Ebaibol họ.—Rri Odibọgba Uvie Mai, October 1998, ẹwẹ-obe avọ 8.

Enọ I Wo Ẹgwọlọ Obọdẹ: Otẹrọnọ ohwo jọ o dhesẹ uvi isiuru rekiyọ ọ be rria ẹkwotọ nọ a ghale kẹ uvumọ ukoko ho, a rẹ sae kuvẹ re ọ hai wo emagazini na ẹkwoma ọkparedẹ nọ a re vi se ei ẹkwoma adrẹse riẹ. Otẹrọnọ ohwo jọ nọ ọ be rria evaọ ẹkwotọ ukoko na ọ rẹ sai wo emagazini na ẹkwoma ejẹ emagazini hi rekiyọ o ghine wo uvi isiuru re o wo emagazini na, t’ẹme na kugbe Ogbẹgwae Iruo Ukoko na. Otẹrọnọ a kuenu kẹe, a rẹ sai vi obe ọkparedẹ rọkẹ ohwo nọ o wo isiuru na. A rẹ sae rehọ efọmo ọkparedẹ na (M-1 gbe M-101) ro ru onana.

Ma rẹ sai fievahọ nnọ Jihova ọ te gbẹ ghale omodawọ mai kpobi re ma whowho Uvie na ẹkwoma Uwou-Eroro Na gbe Awake!