Iviuwou nọ E Rrọ Gaga Evaọ Abọ-Ẹzi—Oghẹrẹ Vẹ?
1 Ujiro u te iviuwou Ileleikristi fiki ‘edhesẹ omarọkẹ Ọghẹnẹ evaọ iviuwou rai.’ (1 Tim. 5:4) Dede na, fiki okpomahọ oyoma buobu nọ ọ wariẹ omai họ nọ ọ rẹ sai whrehe ẹrọwọ mai, o r’oja re iviuwou i ruiruo gaga re a jọ gaga evaọ abọ-ẹzi. Kọ ẹvẹ onana o sae rọ lọhọ?
2 Dhesẹ Oghẹrẹ Uzou-Uwo Kristi: O gwọlọ re enọ i w’uzou uviuwou a rọ aro kele Jesu Kristi evaọ edhere nọ a rẹ rọ wọ owha-iruo rai re a bọ iviuwou rai ga. U te no edhesẹvia ẹsiẹvo ọrọ uyoyou riẹ k’omai ẹkwoma uwhu idheidhe riẹ no, Jesu ọ be ‘ko jẹ sẹro’ ukoko na. (Ẹf. 5:25-29) Esẹgbini iyoyou i re lele oriruo ẹruọsa ọnana ẹkwoma ẹnyate ẹgwọlọ abọ-ẹzi ikẹdẹ kẹdẹ ọrọ iviuwou rai. Onana o kẹre te eruo uwuhrẹ Ebaibol uviuwou k’oka k’oka, obọdẹ ẹmeọta-kugbe ọrọ abọ-ẹzi evaọ oke kpobi nọ o lọhọ, gbe aro-ọrẹriẹ-ku ebẹbẹ evaọ okenọ e tẹ romavia.—Izie. 6:6, 7.
3 Evaọ Iruo Odibọgba Na: Ahwo uviuwou na kpobi a re vuhumu nọ isẹri-ise kẹ amọfa kpahe Jihova gbe ẹjiroro riẹ yọ abọjọ egagọ rai nọ o w’uzou. (Aiz. 43:10-12) Otẹrọnọ whai esẹgbini wha gwọlọ re emọ rai e jọ Isẹri Jihova nọ i dikihẹ gaga, wha rẹ kaki muhọ ẹkwoma udu rai nọ wha rẹ ruẹrẹhọ kẹ odibọgba na. Ta eware nọ e wha riẹ ze nọ o jẹ gwọlọ nọ a rẹ rọ oma mudhe ziezi evaọ iruo na jẹ jariẹ w’obọ k’oka k’oka. (Mat. 22:37-39) Kẹsena wha ve ru ọruẹrẹfihotọ kẹ ae re a w’obọ kugbe owhẹ evaọ iruo odibọgba na.
4 Bọ ovuhumuo kẹ iruo usiuwoma ota na ẹkwoma oke nọ whọ rẹ ruẹrẹhọ evaọ etoke uwuhrẹ ẹkpoka uviuwou na nọ wha rẹ rọ ruẹrẹ oma kpahe kẹ je wuhrẹ edhere ẹmeọta jọ. Wuhrẹ emọ ra unọjutọjọ evaọ odibọgba na, fiobọhọ kẹ ae re a wo ẹnyaharo wọhọ epanọ ikpe gbe ẹgba rai o te. Nọ wha tẹ raha oke jọ kugbe no evaọ usiuwoma ota, ta kpahe epanọ a rọ ruẹ ewoma Jihova k’omarai no. Gbiku eware nọ a ruẹ nọ e rẹ bọ ẹrọwọ ga. Epanọ iviuwou e “jawo uyoyou-ọriẹruo Ọnowo na” te, ere a re sikẹle Jihova te, onọ u re fiobọhọ bọ ae ga re a za “uruemu uyoma kpobi” dhe.—1 Pita 2:1-3.
5 Eva Obọ Iwuhrẹ: Ẹvẹ u re woma te nọ ahwo uviuwou a te bi fiobọhọ kẹ ohwohwo kpohọ iwuhrẹ ukoko kpobi, maero otẹrọnọ o wọhọ nọ oma o rrọ omọvo rai jọ no, udu riẹ u whrehe, hayo eware i bi dhe ei ọvẹ! Oniọvo-ọmọtẹ uzoge jọ ọ ta nọ: “Okenọ ọsẹ mẹ o te no iruo ze, yọ oma o rrọ riẹ no. Rekọ me ve lele iei t’ẹme kpahe emamọ ẹme jọ nọ a te ta kpahe evaọ obọ ewuhrẹ owọwọ yena, o vẹ tuduhọ iẹe awọ re ọ nya. Okenọ oma o tẹ rrọ omẹ, ọ vẹ tuduhọ omẹ awọ re mẹ nya.”—Hib. 10:24, 25.
6 Eware I Ru Kugbe: U fo re iviuwou i ru eware kugbe, wọhọ obufihọ evaọ iruo uwou na. A re je fi oke họ kẹ aroza nọ a salọ ziezi. Erẹ ughe-urio, aroza, gbe erẹ iweze bru imoni hayo egbẹnyusu o rẹ sae kẹ etoke evawere nọ a rẹ kareghẹhọ avọ omawere evaọ obaro.—Ọtausi. 3:4.
7 Iviuwou Ileleikristi nọ e rrọ gaga i re fi use-abọ abọ-ẹzi erọ ikẹdẹ kẹdẹ rai kparobọ. Ẹkwoma Jihova nọ a re sikẹle viere, a rẹ ruẹ ogaga nọ ọ rẹ kẹ.—Ẹf. 6:10.