Enọ I w’Uzou Uviuwou—Wha Yọrọ Emamọ Omaa Abọ-Ẹzi
1 Dede nọ ọ rria ikpe buobu evaọ udevie edhọgọ gbe ogbekuo ọ Babilọn, a riẹ Daniẹl wọhọ ọnọ ọ gọ Jihova “ẹsikpobi.” (Dan. 6:16, 20) Ẹvẹ ọ rọ yọrọ edikihẹ abọ-ẹzi riẹ? Okerefihotọ Ebaibol na o dhesẹ nnọ o wo omaa-iruo okpakpatiẹ nọ o re ro ru iruo nọ i w’obọ kpahe egagọ uzẹme. Wọhọ oriruo, o jọ uruemu riẹ re ọ lẹ isiasa okpẹdẹ evaọ ubruwou obọ ehru uwou riẹ. (Dan. 6:10) Ababọ avro, o wo omaa eware abọ-ẹzi efa re, wọhọ isase Uzi na. Fikiere, okenọ ọ rẹriẹ aro dhe odawọ nọ o rẹ sae rehọ uzuazọ riẹ, Daniẹl o nuhu evaọ omarọkẹ Jihova riẹ hẹ, a te siwi ei evaọ edhere igbunu.—Dan. 6:4-22.
2 Epọvo na nẹnẹ re, ma rẹ daoma gaga re ma hai ‘rroro avọ oriori kpobi.’ (Ẹf. 6:18) Akpọ nọ ma be rria na ọ rrọ obọ “ogaga oyoma na.” (1 Jọn 5:19) Ọwọsuọ hayo edawọ e rẹ sae rọ oma via idudhe nọ e rẹ dawo ẹrọwọ mai. Evaọ etoke uye ulogbo na, Gọg ọrọ Magọg ọ te wọ ohọre nọ o mae rro kpobi bru idibo Ọghẹnẹ, onọ o te wọhọ nọ a rẹ sae dhẹ no ho. Onana o te gwọlọ eva nọ a re fihọ Jihova vọvọ.—Izik. 38:14-16.
3 “Oware obufihọ ulogbo jọ họ emamọ isase Ebaibol, uwuhrẹ [Ebaibol], gbe ẹmeọta-kugbe [Ebaibol] uviuwou nọ a re ru fihọ edhere uzuazọ.” Ere ẹme-emuhọ edrama ọ okokohọ ubrotọ 1998 nọ uzoẹme riẹ o ta nnọ “Iviuwou—Wha Ru Isase Ebaibol Ekẹdẹ Kẹdẹ Họ Edhere Uzuazọ Rai!” na o ta. O ta haro nnọ: “Okenọ iviuwou i te lele ọruẹrẹfihotọ otiọye na ẹsikpobi gbe evaọ edhere nọ [o] re ru Ebaibol na jọ uzuazọ, uruemu isiuru kẹ Ebaibol nana o rẹ sai kpomahọ uviuwou na ziezi. O rẹ bọ eriariẹ mai ga. O rẹ bọ ẹrọwọ mai ga. [Yọ] o rẹ k’omai iriruo nọ ma re lele—ezae gbe eyae nọ i wo ẹrọwọ gaga evaọ oke anwae—enọ i re kpomahọ omai, enọ i re ru omai dikihẹ kẹ [uzẹme] na.” Nọ ma be te ta kpahe abọ sa-sa ọrọ emamọ omaa-iruo abọ-ẹzi na, enọ i w’uzou uviuwou a rẹ gwọlọ edhere ọvo hayo ivẹ jọ nọ a re ro ru omaa abọ-ẹzi uviuwou rai woma viere.
4 Roro Kpahe Ẹme Ọghẹnẹ Kẹdẹ Kẹdẹ: “Okenọ Uvie Ọghẹnẹ u te muhọ esu ababọ awhaha no nọ a te jọ otọakpọ ru oreva riẹ wọhọ epanọ a rrọ obọ odhiwu ru na, uvumọ ohwo-akpọ ugbarugba—makọ erao dede—a te ‘nwaoma hayo ekpe he.’ (Aiz. 11:9; Mat. 6:9, 10)” Eme eyena e roma via evaọ Ẹkiẹriwo Ikereakere na Kẹdẹ Kẹdẹ—2001 evaọ ẹkpahefihọ ọrọ oria ikere kẹ September 11 na. Ẹvẹ ekareghẹhọ nana e kẹ omosasọ te! Wọhọ ọnọ o w’uzou uviuwou, kọ who wo uruemu ọ isase ikere Ebaibol gbe ọkpahefihọ na kugbe uviuwou ra kẹdẹ kẹdẹ? Onana o rẹ kẹ erere gaga. O gbẹ lọhọ re wha kuomagbe evaọ ohiohiẹ hẹ, ẹsejọhọ wha sai ru ere oke ofa evaọ okpẹdẹ na. Ọsẹ jọ ọ ta nnọ: “Emuore owọwọ na họ emamọ oke k’omai nọ ma rẹ rọ t’ẹme kpahe ikere Ebaibol okpẹdẹ na.”
5 Ma jiri owhẹ, otẹrọnọ who wo emamọ omaa nọ uviuwou na u re ro se ikere okpẹdẹ na kugbe no. Ẹsejọhọ whọ sai gbe fiba onana ẹkwoma ese abọjọ Ebaibol na evaọ oke ovona. Ahwo jọ a wo uruemu nọ a re ro se uzou nọ ekere okpẹdẹ na o no ze na kpobi. Amọfa a re ru isase unọjọ utọjọ, rehọ ẹmẹrera se obe Ebaibol jọ nọ a salọ. Isase Ebaibol ikẹdẹ kẹdẹ i re fi obọ họ kẹ uviuwou ra bọ emamọ ozodhẹ orọ eva nọ a re ru dha Jihova, yọ u re ru isiuru rai re a ru oreva riẹ diwi viere.—Izie. 17:18-20.
6 Ọruẹrẹfihọ isase Ebaibol uviuwou ra gbe ese ikere okpẹdẹ na e te kẹ erere viere otẹrọnọ wha rẹ sae rehọ umutho iminiti jọ rọ ta kpahe aghare ovuẹ na. Obe-ewuhrẹ orọ Isukulu Odibọgba na, ẹwẹ-obe avọ 60, o jẹ iroro nana: “Whọ rẹ sae salọ awọ jọ evaọ eria Ebaibol nọ a ma fihọ kẹ oka na, t’ẹme kpahe otofa rai, whọ vẹ nọ enọ wọhọ enana: ‘Ẹvẹ onana o rọ k’omai ọkpọvio? Ẹvẹ ma sai ro fi awọ Ebaibol enana h’iruo evaọ odibọgba na? Eme i dhesẹ kpahe Jihova gbe edhere nọ o bi ro ru eware, kọ ẹvẹ oyena o rẹ rọ bọ ovuhumuo mai kẹe?’ ” Oghẹrẹ ẹmeọta-kugbe abọ-ẹzi otiọye na o ti fi obọ họ kẹ ahwo uviuwou ra kpobi re a “riẹ [oware nọ] oreva Ọnowo na o rọ.”—Ẹf. 5:17.
7 Uwuhrẹ Uviuwou: Re a ru uwuhrẹ uviuwou na k’oka k’oka yọ obọdẹ edhere nọ enọ i w’uzou uviuwou a re ro dhesẹ kẹ emọ rai nnọ eware abọ-ẹzi a rẹ rọ karo. Ọmoha jọ ọ kareghẹhọ nnọ: “Ẹsejọ oma o rẹ rrọ Ọsẹ mẹ no iruo ze te epanọ o rẹ rọ jọ bẹbẹ re ọ jaja aro vi, rekọ ma re ru uwuhrẹ na ghele, yọ onana u fi obọ họ k’omai wo ovuhumuo epanọ u w’uzou te.” Emọ e rẹ sae zọhọ fihọ obokparọ ọruẹrẹfihotọ na re. Uviuwou emọ izii jọ a rẹ kparoma evaọ ighọjọ isoi re a ru uwuhrẹ uviuwou keme o lọhọ họ re a ru ei evaọ oke ofa.
8 Re uwuhrẹ uviuwou na ọ ruẹsi woma, ọnọ o w’uzou uviuwou na ọ rẹ ‘sẹro uwuhrẹ riẹ’ hrọ. (1 Tim. 4:16) Obe-ewuhrẹ orọ Isukulu Odibọgba na, ẹwẹ-obe avọ 32, o ta nnọ: “A rẹ sae tae nọ re who te ru emamọ uwuhrẹ uviuwou, whọ rẹ kaki wuhrẹ kpahe uviuwou ra tao. Ẹvẹ ahwo uviuwou ra a be nyaharo te evaọ abọ-ẹzi? . . . Okenọ whẹ avọ emọ ra wha tẹ rọ usiuwoma, kọ a be rọ ọwhọ dhesẹ kẹ ehwa rai nọ Isẹri Jihova a rọ? Kọ a be reawere omaa isase gbe uwuhrẹ Ebaibol uviuwou ra? Kọ a bi ghine ru edhere Jihova fihọ edhere uzuazọ rai? Ẹromuhotọ ziezi o re dhesẹ oware nọ whẹ, wọhọ ọnọ o w’uzou uviuwou na, o re ru re ọ bọ ekwakwa abọ-ẹzi họ omomọvo uviuwou na.”
9 Iwuhrẹ Ukoko: Oma-oruẹrẹhọ kẹ gbe ekpohọ iwuhrẹ ukoko o rẹ jọ abọ nọ o w’uzou evaọ omaa ẹkpoka ra. (Hib. 10:24, 25) Ẹsejọ, wha rẹ sae ruẹrẹ oma kpahe kẹ iwuhrẹ jọ wọhọ uviuwou. Ukpenọ wha hẹrẹ bẹsenọ oke o rẹ dina v’abọ no, kọ wha sae ruẹrẹ oma kpahe ziezi re oke u te ti te? Omaa okpakpatiẹ evaọ abọ nana u ti ru oma-oruẹrẹhọ rai gbe irere nọ wha re wo no iwuhrẹ na ze woma viere.—Itẹ 21:5.
10 Ọriẹruo gbe erueruo yọ eka nọ a re ro vuhu emamọ omaa abọ-ẹzi. Kọ ẹvẹ otẹrọnọ iyero rai i ru rie bẹbẹ k’owhai re wha ruẹrẹ oma kpahe kẹ iwuhrẹ na kpobi? Obe-ewuhrẹ orọ Isukulu Odibọgba na, ẹwẹ-obe avọ 31, o jẹ iroro nana: “Whaha agbefẹ ẹhọrọ vrẹ ebe na re o jọ thakpinọ who se rai no hayo, tubọ mai yoma dede, re whọ nwane siọ omojọ ba ese fikinọ whọ sai ti se ai kpobi hi. Ukpoye, [jiroro] utho nọ [wha] rẹ sai se, re [wha se eyena ziezi]. Ru ere k’oka k’oka. Oke o be nyaharo na, daoma ru epọvo na kpahe iwuhrẹ efa.”
11 Iviuwou e tẹ be kaki te obọ iwuhrẹ, u re fi obọ họ ruẹrẹ iroro rai họ re a jiri Jihova je wo erere no ithubro nọ ọ be kẹ ze. Kọ uviuwou ra u wo uruemu nana? O gwọlọ emamọ omaa gbe ọrọwokugbe ohwo kpobi nọ ọ rrọ uviuwou na. Otẹrọnọ ẹsibuobu whọ rẹ ruẹ nnọ uviuwou ra u re bruoma avọ eware buobu nọ i bi tunyẹ evaọ edẹ iwuhrẹ, kọ wha sai ru enwene evaọ omaa rai? Kọ eware jọ e riẹ nnọ a rẹ sae kake ruẹrẹhọ no re oke u te te? Kọ otẹrọnọ uye o be bẹ ohwo uviuwou na jọ fikinọ eware i bu rie abọ, kọ amọfa a sai fi obọ họ? Kọ u ti ru ugidi na kpotọ otẹrọnọ ohwo kpobi ọ rẹ rehọ iminiti jọ ruẹrẹ oma kpahe vẹrẹ vi epaọ anwẹdẹ kẹ ekpohọ obọ ewuhrẹ na? Emamọ omaa u re fiba ẹzi udhedhẹ evaọ uviuwou na gbe evaọ ukoko na soso.—1 Kọr. 14:33, 40.
12 Usiuwoma Ota: Oke nọ who re fihọ nọ wha re ro w’obọ evaọ odibọgba na yọ abọ ọfa jọ ọrọ emamọ omaa abọ-ẹzi. Ọmoha jọ nọ a re se Jayson ọ kareghẹhọ nnọ: “Evaọ uviuwou mai, a fi ohiohiẹ Ẹdẹ-Ọmaha kpobi họ kẹ usiuwoma ota. Onana u woma k’omẹ keme epanọ me kpohọ usiuwoma te, ere mẹ ruẹ ewoma riẹ te, yọ ere mẹ reawere riẹ te.” Ibuobu nọ a yọrọ evaọ iviuwou Isẹri a mu ẹro họ no re inọ oke nọ a re fihọ kẹ odibọgba na k’oka k’oka u fi obọ họ kẹ ae nya haro wọhọ egbodibo Ileleikristi.
13 Omaa okpakpatiẹ o rẹ sai je fi obọ họ ru oke nọ uviuwou ra o rẹ raha evaọ usiuwoma ota na were oma jẹ kẹ erere viere. Ẹvẹ a sai ro ru onana? Uwou-Eroro ọ July 1, 1999, ẹwẹ-obe avọ 27, o jẹ iroro nana: “Kọ wha be rehọ okejọ eva ewuhrẹ uviuwou rai fiobọhọ kẹ ahwo uviuwou ra ruẹrẹ oma kpahe kẹ usiuwoma ota ẹkpoka na? Ere oruo o rẹ kẹ erere gaga. (2 Timoti 2:15) O sai fiobọhọ ru usiuwoma ota rai wo otofa je wo ẹvi viere. Evaọ ẹsejọ, whọ sae rehọ oke ewuhrẹ na kpobi ru ọruẹrẹfihọ otiọye na. Kẹse kẹse, wha rẹ sae ta kpahe abọ jọ odibọgba na kpẹkpẹe evaọ ekuhọ ewuhrẹ uviuwou na hayo eva etoke ọfa evaọ ẹkpoka na.” Kọ uviuwou ra o dawo onana no?
14 Gbẹ Hai Ru Ẹnyaharo: Ro no ẹme nana nọ ma ta na ze, kọ who mu ẹro họ abọ jọ nọ uviuwou ra o be jọ ru ziezi? Jiri ai, re wha daoma gbe ru ẹnyaharo evaọ abọ nana. Otẹrọnọ whọ ruẹ abọ jọ buobu nọ e gwọlọ nọ a rẹ jọ ru ẹnyaharo, kake salọ ọvo hayo ivẹ jọ nọ a re ruiruo kpahe tao. Nọ enana i te zihe ruọ abọjọ omaa abọ-ẹzi rai no, who ve ruiruo kpahe ọvo hayo ivẹ efa. Wo irẹro ewoma je dhesẹ iroro. (Fil. 4:4, 5) Emamọ omaa abọ-ẹzi nọ whọ rẹ ruẹrẹ fihọ kẹ uviuwou ra o rẹ gwọlọ omodawọ ogaga, rekọ erere na ọ rro te omodawọ na, keme Jihova ọ k’omai imuẹro nnọ: “Ọnọ ọ nya edhere nọ okiẹrẹe, me re ti dhesẹ usiwo Ọghẹnẹ na rọ kẹ e!”—Ol. 50:23.