Epanọ Ahwo Uviuwou A rẹ rọ Rọwokugbe re A w’Abọ Vọvọ—Evaọ Uwuhrẹ Ebaibol
1 Uzẹme na u fiba uzedhe otofa gbe ẹjiroro uzuazọ uviuwou, rekọ obokparọ evaọ egagọ Jihova o rẹ roma via idudhe he. O rẹ rehọ oke gbe omodawọ re a bọ uviuwou ogaga orọ abọ-ẹzi. Ẹgwọlọ ologbo ọ rrọ kẹ ahwo uviuwou re a ruiruo kugbe evaọ omodawọ onana. Uzoẹme ọsosuọ nana evaọ ọruẹrẹfihọ abasa o te tova rri epanọ iviuwou e sae rọ rọwokugbe evaọ ẹbọ emamọ uruemu uwuhrẹ.
2 Ẹkwoma Ese Ebaibol na Kẹdẹ Kẹdẹ: Itẹ 24:5 o ta nọ “ohwo eriariẹ o vi ọgba.” Eriariẹ nọ a re wo no isase Ẹme Ọghẹnẹ ze kẹse kẹse e rẹ kẹ ohwo ẹgba obeva nọ o gwọlọ re ọ za ohọre Setan mukpahe abọ-ẹzi riẹ dhe. (Ol. 1:1, 2) Kọ wha re se Ebaibol na kugbe kẹdẹ kẹdẹ wọhọ uviuwou? Omaa ọ Isukulu Odibọgba Ọghẹnẹ na o wo “Omaa ọ Ofiba Isase Ebaibol” rọkẹ oka kpobi evaọ ukpe na. Elele riẹ o gwọlọ umutho wọhọ iminiti ikpe ọvo no oke uviuwou na ze kẹdẹ kẹdẹ. Salọ oke nọ u kiehọ, wọhọ epaọ oke emu-ohiohiẹ, a tẹ re emu owọwọ no, hayo taure a te ti kiẹzẹ, re wha se Ebaibol na je se ikere okpẹdẹ na no Ẹkiẹriwi Ikereakere Na ze. Ru onana fihọ abọ iruo ikẹdẹ kẹdẹ ọ uviuwou ra.
3 Ẹkwoma Ewuhrẹ Kugbe k’Oka k’Oka: Uwuhrẹ Ebaibol uviuwou na o rẹ jọ abọ ologbo ẹkpoka ọ uviuwou. U fo re ohwo uviuwou na kpobi ọ thae uke ẹkwoma ajọwha nọ o re ro w’obọ evaọ uwuhrẹ na. Ọnowuzou uviuwou na o re roro kpahe ẹgwọlọ uviuwou na evaọ okenọ ọ tẹ be salọ ebe nọ a re wuhrẹ gbe ẹdẹ na, oke, gbe epanọ uwuhrẹ na u ti lehie te. Rọ uwuhrẹ uviuwou na k’aro evaọ omaa ọ ẹkpoka na. Whọ kuvẹ re eware nọ e r’oja te uwuhrẹ na ha e whaha iẹ hẹ.—Fil. 1:10, 11.
4 Ọsẹ jọ nọ a re se use-iruo evaọ uwou riẹ o re wolo ufi ifonu na no evaọ etoke uwuhrẹ uviuwou na. Ehreki e tẹ ziọ uwou na, o re zizie ai re a kuomagbe uwuhrẹ na hayo ọ vẹ ta kẹ ae nọ a hẹrẹ bẹsenọ uwuhrẹ na u re kuhọ no. Ọsẹ na ọ gba riẹ mu nọ uvumọ oware o rẹ whaha uwuhrẹ uviuwou na ha. Onana u kpomahọ emọ na gaga, yọ rọkẹ akiruo riẹ, o nyaharo ziezi.
5 Ẹvẹ u re siuru te evaọ okenọ ahwo uviuwou na a te bi ruiruo kugbe evaọ iruẹru abọ-ẹzi! Ẹrọwọ evaọ omodawọ mai re ma w’abọ vọvọ evaọ uwuhrẹ Ebaibol uviuwou o te wha eghale Jihova ze.—Ol. 1:3.