Omaa Uviuwou—Ewuhrẹ Uviuwou Na
1 Okẹ nọ o mae rro nọ whẹ wọhọ ọsẹ hayo oni Oleleikristi whọ rẹ sae ghale kugbe emọ ra họ uyoyou ra kẹ Jihova. Etoke jọ nọ onana o jẹ mai woma họ okenọ ‘wha keria uwou rai’ kẹ ewuhrẹ Ebaibol ẹkpoka ọrọ uviuwou rai. (Izie. 6:5-7) Whọ tẹ maki wo ọrivẹ orọo nọ ọ rrọ ukoko na ha, whọ be rria uwou nọ a jẹ rrọ ọvuọ egagọ riẹ, hayo whẹ yọ ọyewọ-ọvo, whọ rẹ sai fiobọhọ kẹ emọ ra re a si kẹle owhẹ, je si kẹle Jihova ẹkwoma ewuhrẹ uviuwou nọ wha re ru ẹsikpobi.
2 Emuhọ: Owojẹ ọsosuọ họ ẹtohọ uruemu uwuhrẹ nọ a re ru wọhọ uviuwou. Otẹrọnọ whọ gbẹ nwane riẹ okenọ wha re fi uwuhrẹ rai họ họ, kọ wha gbẹ jiroro onana kugbe wọhọ uviuwou? (Itẹ 15:22) Who te wo emaha esese, o sai kiehọ re wha hai ru uwuhrẹ na fihọ kpẹkpẹe, je ru ei vrẹ ẹsiẹvo evaọ ẹkpoka. Jiroro onọ o mai kiehọ kẹ uviuwou ra. Fi ugogo oke jọ họ kẹ uwuhrẹ na eva omaa uviuwou ra, jẹ gbaemu re wha nya lele iei.
3 Eme wha rẹ sai wuhrẹ? Ahwo jọ a rẹ rehọ oria nọ a ti wuhrẹ evaọ Uwuhrẹ Obe Ukoko hayo Uwuhrẹ Uwou-Eroro na ro ru uwuhrẹ rai. Ahwo jọ a rẹ rehọ ebe nọ a kere mae rọ kẹ emaha na ro ru uwuhrẹ na. Ọsẹ ọmọzae gbe ọmọtẹ ọmaha jọ ọ ta nọ: “Oware jọ nọ o rẹ lẹliẹ uwuhrẹ mai jọ oware nọ o rẹ mae were emọ na evaọ ẹkpoka kpobi họ ma re ru edrama no Obe Ikuigbe Ebaibol Mẹ ze. Oghẹrẹ nọ onana u bi duobọte udu emọ na je ru ai wo otoriẹ uwuhrẹ na te u wuzou vi unu idhe-eme nọ ma bi wuhrẹ.”
4 Wha Ru Uwuhrẹ Evaọ Ẹkpoka Kpobi: A re ru uwuhrẹ uviuwou na ẹsikpobi, yọ u fo nọ ahwo uviuwou na kpobi a rẹ rọ oghọghọ rẹro riẹ. A rẹ sai nwene ẹdẹ gbe oke nọ a re ro ru uwuhrẹ na ẹsejọ re a sae rọ ẹro te eware idudhe nọ e roma via. Iyero jọ e jẹ sae jariẹ nọ a je ru inwene evaọ uzoẹme nọ a bi ti wuhrẹ. Rekọ enwene kpobi nọ a ru o rẹ jọ onọ o rẹ jọ thethei nọ u re nwene omaa uwuhrẹ uviuwou nọ a fihọ no na ha. Evaọ uviuwou jọ, ọmọtẹ rai ọ ta nọ: Otẹrọnọ oke uwuhrẹ uviuwou mai u nwene, ọsẹ mẹ o re kere oke nọ ma ti ro ru uwuhrẹ na fihọ obe, o ve fi ei họ oria nọ mai kpobi ma jẹ rueriẹ.” Oma nọ a rẹ dawo ere re a ruẹsi ru uwuhrẹ uviuwou ẹsikpobi u kiehọ kẹhẹ! Nọ whọ be ruabọhọ wuhrẹ emọ ra ‘re a yoẹme je bi wuhrẹ ai orọ Ọnowo na,’ yọ who bi dhesẹ uyoyou ra kẹ ae jẹ rọ kẹ Ọsẹ obọ odhiwu mai.—Ẹf. 6:4.