Ẹkpẹti Onọ

◼ Kọ a rẹ niyẹrẹ uwuhrẹ Ebaibol uviuwou kẹ ukoko na?

Otẹrọnọ ọsẹ hayo oni Oleleikristi o bi ru uwuhrẹ Ebaibol uviuwou yọ emaha nọ e re họ-ame he a rrọ uwuhrẹ na, ọsẹ hayo oni na ọ sae niyẹrẹ bu vi auwa ọvo evaọ ẹkpoka ha, ozihebro ọvo ẹkpoka, gbe uwuhrẹ Ebaibol ọvo evaọ amara. Enẹ o rẹ jọ o tẹ make rrọ nọ uwuhrẹ na o vrẹ auwa ọvo, a ru rie vrẹ ẹsiẹvo ẹkpoka, hayo a ru rie kugbe emọ na omomọvo.—Rri obe ọ Our Ministry na, ẹwẹ. 104.

Otẹrọnọ enọ e rrọ uwou na kpobi yọ Isẹri nọ e họ-ame no, a rẹ niyẹrẹ oke hayo uwuhrẹ na wọhọ usiuwoma ota ha (ajokpanọ ọmọ na jọ o gbe bi wuhrẹ obe avivẹ nọ ọ họ-ame no). Onana o rrọ ere keme iyẹrẹ usiuwoma ota ukoko na u re dhesẹ iruo nọ inievo na a bi ru evaọ ewhowho emamọ usi na gbe uzẹme Ebaibol nọ a re ro wuhrẹ enọ i ri zihe ruọ idibo Jihova nọ e roma mudhe jẹ họ-ame no ho. (Mat. 24:14; 28:19, 20) Dede na, orọnikọ onana u dhesẹ nọ a re rolo obọ evaọ osegboja nọ a re ro ru uwuhrẹ yena kẹse kẹse he.

O rrọ owha-iruo esẹgbini Ileleikristi re a wuhrẹ emọ rai. Enọ e gwọlọ obufihọ re a mu uwuhrẹ uviuwou rai họ hayo re a ru uwuhrẹ na woma viere a rẹ sae yare obufihọ mi ekpako na. Otẹrọnọ iyero jọ i re ru ei kiehọ re owhowho-uvie ọfa o ru uwuhrẹ Ebaibol kugbe ọmọ nọ ọ re họ-ame he nọ o no uviuwou Ileleikristi nọ e rrọ ukoko na ze, a rẹ ta ẹme nana kugbe ọsẹro ukoko na hayo ọsẹro usiuwoma ota na. A te kuenu kẹ uwuhrẹ utioye na, ọnọ o bi ru uwuhrẹ na ọ rẹ niyẹrẹ riẹ wọhọ epanọ ọ rẹ niyẹrẹ ebe-uwuhrẹ Ebaibol efa.

Re a wuhrẹ emọ idhere Jihova o gwọlọ oke gbe omodawọ vi onọ ma rẹ n’iyẹrẹ evaọ iyẹrẹ usiuwoma ota na. (Izie. 6:6-9; Itẹ 22:6) A re jiri esẹgbini Ileleikristi kẹ omodawọ nọ a be rọ rehọ ẹro te owha-iruo ulogbo rai nọ a be rọ yọrọ emọ, ‘ru ai yo ẹme je wuhrẹ ai orọ Ọnowo na.’—Ẹf. 6:4.