Obufihọ kẹ Iviuwou
1. Oghẹrẹ vẹ ẹdijala na ọ rọ kẹ iviuwou emọ Izrẹl erere?
1 Ẹdẹ ẹdijala na yọ ọruẹrẹfihotọ nọ u no obọ Jihova ze nọ o kẹ iviuwou erere. Ẹdẹ yena emọ Izrẹl a re ru uvumọ iruo ho rekọ a re roro kpahe ewoma Jihova gbe usu rai kugbei. Esẹgbini a rẹ rọ uvẹ yena wuhrẹ emọ rai Uzi na. (Izie. 6:6, 7) Ahwo Jihova a jẹ hae rehọ ẹdẹ ẹdijala na roro kpahe edikihẹ abọ-ẹzi rai koka koka.
2. Eme uzi ẹdijala na u wuhrẹ omai kpahe Jihova?
2 Ekoko ẹdijala o gbẹ rọ oware nọ Jihova ọ gwọlọ mi iviuwou ho. Rekọ, uzi yena u wuhrẹ omai oware jọ kpahe Ọghẹnẹ. O wo isiuru gaga kpahe edikihẹ abọ-ẹzi ahwo rie. (Aiz. 48:17, 18) Nẹnẹ, edhere jọ nọ Jihova o ro dhesẹ onana họ ẹkwoma ọruẹrẹfihotọ Uwuhrẹ Ebaibol Uviuwou nọ a re ru evaọ owọwọ.
3. Eme họ ẹjiroro Uwuhrẹ Ebaibol Uviuwou nọ a re ru evaọ owọwọ?
3 Eme họ Ẹjiroro Uwuhrẹ Ebaibol Uviuwou nọ A re Ru Evaọ Owọwọ? January 2009 ma ro mu Uwuhrẹ Obe Ukoko na họ eru evaọ owọwọ ovona kugbe Isukulu Odibọgba Esuo-Ọghẹnẹ gbe Ewuhrẹ Odibọgba na. Ẹjiroro inwene nana jọ họ re iviuwou a wo oke nọ a rẹ rọ bọ edikihẹ abọ-ẹzi rai ga ẹkwoma owọwọ ovo jọ nọ a re fihọ kẹ uwuhrẹ uviuwou koka koka. A tuduhọ uviuwou kpobi awọ inọ o tẹ lọhọ, jọ a nwene oke uwuhrẹ uviuwou rai kpohọ owọwọ nọ a jẹ hai ro ru Uwuhrẹ Obe Ukoko vẹre na. Yọ a rẹ rehọ oke nana ru uwuhrẹ Ebaibol nọ a rẹ jọ họoma ha, jẹ kpọ uwuhrẹ na rri ẹgwọlọ uviuwou na.
4. Kọ o rrọ ọgbahọ inọ auwa ọvo a re ro ru uwuhrẹ uviuwou? Ru ei vẹ.
4 Okenọ ma jẹ hai kpohọ Uwuhrẹ Obe Ukoko na, ma jẹ hae raha oke gẹgọ, kpohọ oria na, je ru eware efa. Oke nọ mai ibuobu ma jẹ hae raha ro ru eware nana o jẹ hai bu viọ uzedhe oke uwuhrẹ na. Rekọ a ru enwene nana re uviuwou o rehọ owọwọ yena kuomagbe gọ Jihova. Fikiere, ma rẹ sae raha oke vrẹ auwa ro ru Uwuhrẹ Uviuwou na. U fo re ma roro kpahe ẹgwọlọ uviuwou mai je fi oke họ nọ u re te omai ta kpahe ẹgwọlọ na.
5. Kọ o rrọ ọgbahọ inọ a rẹ rehọ oke na kpobi ru uwuhrẹ kugbe? Ru ei vẹ.
5 Kọ O Rrọ Ọgbahọ Inọ A rẹ Rehọ Oke na Kpobi Ru Uwuhrẹ Kugbe? Nọ ọzae avọ aye, hayo iviuwou nọ emọ e rrọ a te bi kuomagbe ru uwuhrẹ Ebaibol, a rẹ rọ ere tuduhọ ohwohwo awọ. (Rom 1:12) U re si ahwo uviuwou na kẹle ohwohwo. Fikiere, eme nọ i no Ikereakere ze eye a rẹ mae ta kpahe evaọ uwuhrẹ uviuwou. Rekọ, a rẹ sae nyase omoke jọ ba nọ omomọvo uviuwou na o re ro ru uwuhrẹ omobọ riẹ. Wọhọ oriruo, nọ a te ru abọ ẹmeọta kugbe na no, uviuwou na o rẹ sae gbẹ jọ kugbe, omomọvo o ve ru uwuhrẹ obọ riẹ, o sae jọ omaruẹrẹhọ kẹ ewuhrẹ, hayo ese emagazini. Iviuwou jọ a re fi etehe-ughe họ họ evaọ owọwọ yena soso.
6. Oghẹrẹ vẹ a re ru uwuhrẹ na?
6 Oghẹrẹ Vẹ A re Ru Uwuhrẹ Na? Orọnikọ enọ gbe iyo ọvo a re ro ru uwuhrẹ na ẹsikpobi hi. Re Uwuhrẹ Uviuwou na o sae jọ sasasa jẹ were, iviuwou buobu a re ru orai wọhọ epanọ ma re ru ewuhrẹ isukulu na hayo orọ odibọgba na. A rẹ ghale ẹmeọta rai fihọ abọ sa-sa, jẹ rehọ idhere sa-sa ru ai. Wọhọ oriruo, a rẹ sai se Ebaibol na kugbe, ruẹrẹ abọjọ iwuhrẹ mai kpahe, je ru odhesẹvia epanọ a rẹ ta usiuwoma. Ẹwẹ-obe avọ 6 o dhesẹ idhere jọ.
7. Eme esẹgbini a re ru re uviuwou na o sae reawere uwuhrẹ na?
7 Eme Esẹgbini A re Ru re Uviuwou Rai A Sae Reawere Uwuhrẹ Na? Uviuwou ra o te mai wo erere no uwuhrẹ na ze, nọ ẹkeriotọ na ọ tẹ rrọ whẹtiẹ whẹtiẹ. Wha rẹ sae jọ otafe ru uwuhrẹ na ẹsejọ nọ oso hayo ekpahe e gbẹ riẹ hẹ. Nọ o tẹ gwọlọ nọ wha rẹ rehọ omoke jọ serihọ evaọ oke uwuhrẹ na wha sai ru ere. Iviuwou jọ a rẹ re enuawere kugbe nọ a te ku uwuhrẹ na họ no. Dede nọ esẹgbini a rẹ rehọ oke uwuhrẹ na kẹ ọwhọkuo ho, a rẹ sae rehọ omoke jọ ta kpahe ebẹbẹ hayo uruemu jọ nọ u fo ho nọ o rrọ uviuwou na. Rekọ, otẹrọnọ who muẹrohọ inọ ọmọ jọ o ru oware othọthọ jọ nọ u kpomahọ iẹe ọvo, o rẹ mai woma re who lele iei ta ẹme oke ofa re whọ siọ omovuọ ba ekpehọ iẹe oma evaọ iraro inievo riẹ. U fo ho re Uwuhrẹ Uviuwou na o jọ dokpo dokpo, rekọ jọ u dhesẹ via inọ Ọghẹnẹ evawere na ma be gọ.—1 Tim. 1:11.
8, 9. Ẹvẹ enọ i wuzou uviuwou a rẹ rọ ruẹrẹ oma kpahe?
8 Ẹvẹ Ọnọ O Wuzou Uviuwou Ọ Sae rọ Ruẹrẹ Oma Kpahe? Otẹrọnọ ọnọ o wuzou uviuwou na ọ rẹ salọ oware nọ a ti wuhrẹ koka koka gbe epanọ a ti ro wuhrẹ iẹe, ẹsiẹe uviuwou na o te mai wo erere. (Itẹ 21:5) U re woma re ọzae ọ nọ aye riẹ nọ o te bi ru onana. (Itẹ 15:22) Enọ i wuzou iviuwou, kọ wha gbẹ hae nọ emọ rai ẹsejọ re a fodẹ eware jọ nọ wha sae ta ẹme kpahe? Who te ru ere, whọ te riẹ eware nọ e rẹ were ae jẹ rrọ ọdawẹ kẹ ae.
9 U du gwọlọ họ inọ oka kpobi ọnọ o wuzou uviuwou na ọ rẹ raha oke thethei rọ ruẹrẹ oma kpahe. Ẹsejọhọ, o te were uviuwou na re a wo eware jọ nọ a re ru evaọ uwuhrẹ na koka koka, fikiere orọnikọ oke kpobi ọnọ o wuzou uviuwou na o ti ru ọruẹrẹfihotọ ọkpokpọ họ. O rẹ sai fi obọ họ nọ ọ tẹ ruẹrẹ oma kpahe kẹ uwuhrẹ oka ofa nọ a tẹ nwani ku ọjọ họ no, keme oke oyena ẹgwọlọ abọ-ẹzi uviuwou riẹ o gbẹ riẹe iroro. Ahwo jọ a re kere eware nọ a te jọ uwuhrẹ na ta kpahe fihọ ẹwẹ-obe, a vẹ tae mu oria nọ ohwo kpobi ọ rẹ jọ rue riẹ, wọhọ ẹthẹ ifriji. Onana o rẹ lẹliẹ uviuwou na rẹro oware nọ a ti wuhrẹ jẹ ruẹrẹ oma kpahe.
10. Ẹvẹ enọ ae ọvo a rrọ uwou hayo nọ ae ọvo a rrọ ukoko na a sae rehọ ọruẹrẹfihotọ Uwuhrẹ Uviuwou na ruiruo?
10 Kọ Otẹrọnọ Mẹ Ọvo Mẹ Rrọ Uwou Hayo Mẹ Ọvo Mẹ Rrọ Ukoko Evaọ Uviuwou Mẹ? Enọ ae ọvo a rrọ a sae rehọ oke Uwuhrẹ Uviuwou nọ a re ru evaọ owọwọ na ro ru uwuhrẹ omobọ rai. Emamọ omaa uwuhrẹ omobọ ohwo u re kugbe isase Ebaibol, omaruẹrẹhọ kẹ iwuhrẹ, ese Uwou-Eroro gbe Awake! Inievo jọ a rẹ jẹ rehọ omoke jọ wuhrẹ kpahe eware efa. Evaọ ẹsejọ, a re zizie owhowho-uvie ọfa hayo uviuwou ọfa re u kuomagbe ae evaọ uwuhrẹ rai.
11, 12. Irere jọ vẹ i re noi ze nọ ma te bi ru uwuhrẹ uviuwou mai kẹse kẹse?
11 Didi Irere I re Noi Ze nọ Ma te Bi Ru Uwuhrẹ Uviuwou Mai Kẹse Kẹse? Enọ e be rọ eva rai kpobi gọ Jihova a re wo usu okpekpe kugbei. Ofariẹ, iviuwou nọ i re wuhrẹ Ẹme Ọghẹnẹ kugbe a re wo okugbe. Ọzae jọ avọ aye riẹ a kere inọ: “Wọhọ ekobaro nọ i wo emọ họ, ma re rẹro oke Uwuhrẹ Uviuwou mai nọ ma re ru evaọ owọwọ. Ma ruẹ nọ u bi si omai kẹle ohwohwo gbe Ọsẹ obọ odhiwu mai vi epaọ anwẹdẹ. Enẹna nọ ma tẹ rọwo ze evaọ ohiohiẹ ẹdẹ nọ ma re ru uwuhrẹ na, ma rẹ kareghẹhọ ohwohwo nọ: ‘Owọwọ inẹnẹ họ, Uwuhrẹ Uviuwou mai!’”
12 Ọruẹrẹfihotọ nọ a re ro ru uwuhrẹ uviuwou evaọ owọwọ na u re je fi obọ họ kẹ iviuwou nọ i re wo uvẹ hẹ. Oni jọ nọ ọyọvo ọ be yọrọ emezae ivẹ riẹ jẹ rrọ ọkobaro oke-kpobi o kere nọ: “Evaọ oke nọ u kpemu, ma je wo uvẹ ru uwuhrẹ uviuwou mai hi. Otiẹse ma jẹ hai ru ei fikinọ oma o rẹ rrọ omẹ no. Mẹ rẹ gbẹ riẹ onọ me re ru hu. Fikiere, me bi yere owhai gaga rọkẹ ọruẹrẹfihotọ Uwuhrẹ Uviuwou nọ a re ru evaọ owọwọ na. Enẹna ma be sai ru uwuhrẹ uviuwou mai kẹse kẹse je bi wo irere noi ze.”
13. Eme u re fi obọ họ kẹ uviuwou ra wo erere no ọruẹrẹfihotọ nana ze?
13 Wọhọ ẹdijala na, ọruẹrẹfihotọ Uwuhrẹ Uviuwou evaọ owọwọ na yọ okẹ nọ u no obọ Jihova ze rọkẹ iviuwou. (Jem. 1:17) Epanọ emọ Izrẹl a ru eware abọ-ẹzi nọ a gwọlọ mi ai te evaọ ẹdẹ ẹdijala na, ere u re fi obọ họ kẹ ae bọ usu rai kugbe Jihova ga te. Epọvo na re, epanọ ma rehọ owọwọ nọ ma fihọ kẹ uwuhrẹ uviuwou mai ruiruo woma te, ere o rẹ kẹ uviuwou mai erere te. (2 Kọr. 9:6; Gal. 6:7, 8; Kọl. 3:23, 24) Wha te ru uwuhrẹ uviuwou rai wọhọ epanọ o gwọlọ, wha te sae ta wọhọ ọso-ilezi na inọ: “Rekọ uwoma kẹ omẹ re me sikẹle Ọghẹnẹ; me ru Ọnowo ỌGHẸNẸ mẹ họ adhẹzọ mẹ.”—Ol. 73:28.
[Ẹme nọ a fi ẹgba họ nọ ọ rrọ ẹwẹ-obe avọ 5]
U fo ho re Uwuhrẹ Uviuwou na o jọ dokpo dokpo, rekọ jọ u dhesẹ via inọ Ọghẹnẹ evawere na ma be gọ
[Ẹkpẹti nọ ọ rrọ ẹwẹ-obe avọ 6]
RAWO IẸE
Eware Jọ nọ A rẹ Sai Ru Evaọ Uwuhrẹ Ebaibol Uviuwou nọ A re Ru Evaọ Owọwọ Na
Ebaibol:
• Wha se abọjọ isase Ebaibol ẹkpoka na kugbe. Oria nọ wha bi se na o tẹ rrọ oria nọ ohwo ọ sai jo se wọhọ ogbiku, ohwo jọ o re ru ere, amọfa a ve se eme ahwo sa-sa nọ a bi se kpahe na.
• Wha rehọ abọjọ isase Ebaibol na ru edrama.
• Dhe uzou ovuovo kẹ omomọvo uviuwou na evaọ ẹruoke, o ve kere onọ ọvo hayo ivẹ jọ nọ o wo kpahe oria nọ o se na fihotọ. Kẹsena wha ve kuomagbe ru ekiakiẹ kpahe enọ ahwo na kpobi.
• Koka koka kere eme owọ Ebaibol jọ fihọ ẹmẹwẹ-ekade, whọ vẹ daoma sei fihọ uzou jẹ f’otọ riẹ. Kere ai buobu ere, jẹ kiẹ ai riwi koka koka re whọ riẹ unu ikere nọ whọ kareghẹhọ.
• Gaviezọ kẹ ikporakporo isase Ebaibol na yọ wha bi rri Ebaibol rai.
Iwuhrẹ:
• Wha ruẹrẹ abọjọ iwuhrẹ ẹkpoka na họ kugbe.
• Wha wuhrẹ ile nọ a fihọ kẹ iwuhrẹ oka yena.
• Otẹrọnọ ohwo jọ o wo ẹme evaọ Isukulu Odibọgba Esuo-Ọghẹnẹ hayo odhesẹvia evaọ Ewuhrẹ Odibọgba na, wha ta kpahe epanọ ọ sai ro ru ei, hayo jọ o ru ei via evaọ iraro ahwo na kpobi.
Ẹgwọlọ Uviuwou Na:
• Wha rehọ eme no ebe ọ Young People Ask hayo Wuhrẹ Mi Owuhrẹ Ologbo Na ze.
• Ru odhesẹvia oware nọ emọ na a rẹ sai ru evaọ otọ uyero jọ nọ o rẹ sae romavia evaọ obọ isukulu.
• Wha ru odhesẹvia nọ emọ a rẹ jọ rehọ ẹta ọsẹgboni. Emọ na a rẹ sae kiẹ kpahe ẹme jọ a vẹ rehọ iẹe lele ọsẹgboni rai ta ẹme.
Odibọgba Na:
• Wha ru odhesẹvia nọ wha rẹ sae jọ ruẹrẹ oma kpahe kẹ usiuwoma ota evaọ urere oka na.
• Ta kpahe itee nọ e rẹ sai fi obọ họ kẹ omomọvo uviuwou na fiba oke usiuwoma ota rai evaọ ezi Ekareghẹhọ na hayo oke ehọlide.
• Kẹ ahwo uviuwou na kpobi iminiti jọ re a kiẹ kpahe ọvuọ onọ riẹ nọ ahwo a rẹ sae nọ evaọ usiuwoma, kẹsena wha vẹ rehọ enana ru idhesẹvia.
Idhere Efa:
• Wha jọ emagazini nọ i kpozi obọ se uzoẹme jọ kugbe.
• Jọ omomọvo uviuwou na ọ jọ emagazini nọ i kpozi obọ se uzoẹme jọ nọ o were riẹ, kẹsena ọ vẹ ta ẹme kpahe iẹe.
• Evaọ otiẹse wha zizie owhowho-uvie ọfa hayo ọzae avọ aye jọ kugbe Uwuhrẹ Uviuwou owọwọ rai, wha vẹ kiẹ ae riwi.
• Wha rri ividio mai jọ jẹ ta ẹme kpahe iẹe.
• Wha jọ Awake! se jẹ ta ẹme kpahe izoẹme wọhọ “Young People Ask” hayo “For Family Review” kugbe.
• Wha jọ Uwou-Eroro Na se jẹ ta ẹme kpahe izoẹme wọhọ “Wuhrẹ Emọ Ra” hayo “Rọkẹ Izoge Na” kugbe.
• Wha se oria jọ evaọ Yearbook ọkpokpọ hayo obe nọ a jọ okokohọ ubrotọ n’ukpo siobọno jẹ ta ẹme kpahe iẹe.
• Nọ wha te no okokohọ kpozi, wha ta ẹme kpahe eme nọ wha yo.
• Roma totọ rri omama Jihova jọ, wha vẹ ta kpahe oware nọ u wuhrẹ omai kpahe Jihova.
• Wha kuomagbe ku hayo drọ oware jọ, wọhọ uwoho oware hayo ohwo jọ, emapo.