Epanọ Ma Sai ro Wo Onaa Ziezi Evaọ Usiuwoma Ota—Ta Usiuwoma Evaọ Oria nọ Ahwo A je bi Ru Iruo

Oware nọ U ro Wuzou: Nọ orọnọ ahwo buobu a re ru iruo okikpo na, oria nọ o mai kiehọ nọ ma sae jọ ta usiuwoma Uvie na kẹ ae họ oria iruo rai. Usiuwoma ota evaọ oria nọ ahwo a bi jo ru iruo o rẹ were oma jẹ wha emamọ iyẹrẹ ze, keme a re di ahwo na họ, yọ a re je dede ohwo rehọ ziezi wọhọ ẹsenọ ọ gwọlọ dẹ oware mi ai hayo wha iruo se ai. Re owhowho-uvie ọ sae ta usiuwoma ziezi evaọ oria utionana, o re wo ororokẹ jẹ gọ ẹgọ nọ ọ rrọ kpatiẹ. (2 Kọr. 6:3) Fiki onana, o gwọlọ nọ ọsẹro usiuwoma ota o re muẹrohọ oghẹrẹ nọ a be jọ oria nọ a bi jo ru iruo ta usiuwoma kiti te gbe inievo nọ i bi kpohọ iẹe.

Epanọ A re ro Ru Ei:

Ruẹrẹ ẹme kpẹkpẹe nọ whọ te ta fihọ. Whọ tẹ raha oke ohwo na gahrọ, a gbẹ te kẹ omai uvẹ ta usiuwoma evaọ etẹe oke ọfa ha.
Nya evaọ okenọ eware i ri bu ahwo na aro gahrọ họ, wọhọ okenọ a te rovie obọ.
Daoma kaki lele ohwo nọ o wuzou oria na ta ẹme. Lele iei ta ẹme wọhọ ogbẹnyusu jẹ jọ sasasa. Whọ sae ta nọ: “Ma be rehọ omoke jọ lele ahwo ta ẹme evaọ oria iruo rai keme ma be kaki di ai họ uwou hu.” Ta usiuwoma kẹe kpẹkpẹe, jẹ rehọ omobe-ovẹvẹ, emagazini, hayo obe ọfa kẹe. Re a siọ omai ba erri wọhọ ahwo nọ a be zẹ eki, u du gwọlọ nọ ma fodẹ unevaze he ajokpanọ ohwo na ọvo ọ nọ omai.
Otẹrọnọ ohwo nọ o wuzou oria na ọ kẹ owhẹ ovao, mi ei uvẹ re who lele amọfa nọ a be jọ etẹe ru iruo ta ẹme kpẹkpẹe. Evaọ eria iruo jọ, whọ sai mi uvẹ re whọ nyasiọ ebe ba oria nọ iruiruo na a rẹ jọ re emu hayo serihọ.
Wo ororokẹ je nwene lele uyero ohwo na. Wọhọ oriruo, otẹrọnọ ohwo na o bi lele ọhreki riẹ ta ẹme hayo obọ riẹ o rrọ oware, hẹrẹ bẹsenọ o re ru no.

Dao Onana Evaọ Amara Na:

Evaọ Egagọ Uviuwou rai n’otha, wuhrẹ edhere ọkpẹkpẹe nọ whọ sae rọ ta usiuwoma otẹrọnọ who kpohọ oria nọ a bi jo ru iruo nyae ta usiuwoma.