Idhere Ekpokpọ nọ Ma rẹ rọ Ta Usiuwoma Ẹgbede
1. Didi oriruo Ileleikristi ikpe-udhusoi ọsosuọ a fihọ otọ?
1 Ileleikristi ikpe-udhusoi ọsosuọ a jẹ ta usiuwoma n’uwou ruọ uwou. U te no ere no, a jẹ ta usiuwoma na evaọ ẹgbẹdẹ re. (Iruẹru 20:20) Wọhọ oriruo, a kpohọ etẹmpol na nyae ta usiuwoma keme a riẹ nọ ahwo buobu a re kpohọ etẹe. (Iruẹru 5:42) Nọ Pọl ukọ na ọ jọ Athẹns, ọ jẹ ta usiuwoma kẹ ohwo kpobi nọ ọ ruẹ evaọ obọ eki. (Iruẹru 17:17) Oghẹrẹ nọ ma be mae rọ ta usiuwoma na nẹnẹ họ, ma re no uwou ruọ uwou. Ghele na, ma rẹ jẹ ta usiuwoma evaọ eria nọ a rẹ dhẹ imoto fihọ, iwou-eki, eria ugheriwo, idhere nọ i re zurie, gbe eria efa sa-sa nọ a rẹ jọ ruẹ ahwo. Ma tuduhọ owhowho-uvie kpobi awọ re ọ hae ta usiuwoma evaọ ẹgbede. Ghele na, inievo buobu a ti w’obọ evaọ idhere ekpokpọ ivẹ nọ ma te rọ ta usiuwoma evaọ ẹgbede na.
2. Oghẹrẹ usiuwoma ota vẹ a muhọ evaọ November 2011?
2 Usiuwoma Ota Obọdẹ Evaọ Ikpewho: Wọhọ epanọ a niyẹrẹ riẹ fihọ Yearbook ọ 2013 evaọ ẹwẹ-obe avọ 16 gbe 17 na, inievo jọ a muọ oghẹrẹ usiuwoma ota jọ họ evaọ November 2011 evaọ obọ New York City. A fi emẹjẹ gbe eware efa nọ a re ghelie nọ a nabi ru wowoma họ eria sa-sa nọ ahwo a rẹ jọ zurie evaọ okpẹwho na. A te fi ebe ukoko na erọ evẹrẹ sa-sa họ ehru emẹjẹ na. Ahwo a rẹ jọ eria nana zurie kẹdẹ kẹdẹ, te enọ Isẹri Jihova a rẹ sae ro uwou rai hi gbe enọ a re dihọ uwou hu. Ahwo nọ a rehọ ebe mai evaọ eria nana a jọ buobu. Evaọ amara jọ kẹle na, emagazini nọ ahwo a rehọ i bu te 3,797, yọ ebe nọ a rehọ i bu te 7,986. Ahwo nana jọ buobu a ta nọ a gwọlọ nọ a wuhrẹ Ebaibol na kugbe ai. Ẹjiroro usiuwoma ota nana họ re a mu uwuhrẹ Ebaibol họ kugbe ahwo, fikiere ohwo nọ o dhesẹ isiuru ọ tẹ kẹ inievo na adrẹse riẹ, a ve vi adrẹse na se ukoko nọ o rrọ oria nọ ohwo na ọ be rria.
3. Eme ma be te jọ ikpewho sa-sa ru?
3 Fiki emamọ iyẹrẹ nọ i no usiuwoma ota nana ze no, ma gwọlọ nọ a rẹ jọ ikpewho sa-sa ru epọvo na re. Uwou ogha nọ o rrọ orẹwho na o te salọ ewho nọ a sae jọ ru onana. Ewho na i re wo eria nọ ahwo buobu a rẹ jọ ruọ imoto, hayo eria nọ ifisi gbe iwou buobu e rrọ. Uwou ogha u ve kere ileta se ukoko nọ o be te roma kẹ oghẹrẹ usiuwoma ota nana, jẹ kẹ ae ithubro efa. Ekobaro obọdẹ gbe erọ oke-kpobi a ti ru onana, rekọ evaọ eria jọ a sae salọ ekobaro obufihọ.
4. Ẹvẹ a te rọ ta usiuwoma ẹgbede ọkpokpọ na?
4 Oghẹrẹ nọ A te rọ Ta Usiuwoma Na: Inievo nọ i ti w’obọ evaọ oghẹrẹ usiuwoma ota ẹgbede nana a re dikihẹ gba emẹjẹ ebe na. Nọ ohwo jọ ọ tẹ nya bru rai, a vẹ ta kẹ ohwo na re ọ rehọ obe kpobi nọ o were riẹ. Otẹrọnọ ohwo na ọ nọ onọ jọ, ekobaro na a vẹ rọ Ebaibol na k’uyo onọ na. Nọ ohwo na ọ tẹ rehọ obe, a rẹ ta kẹe kpahe ugho unevaze he. Rekọ otẹrọnọ ohwo na ọ nọ kpahe epanọ ma be rọ ruẹ ugho ru ebe mai, a rẹ sae vuẹe nọ ohwo nọ ọ gwọlọ ru unevaze ọ sai vi ei kpohọ adrẹse nọ ọ rrọ obe na. O tẹ lọhọ, a sae nọ ohwo na nọ: “Kọ whọ gwọlọ nọ ohwo jọ ọ nya bru owhẹ ze ti wuhrẹ Ebaibol kugbe owhẹ?” hayo “Kọ whọ riẹ nọ ma re wuhrẹ Ebaibol kugbe ahwo ọvọvẹ?”
5. Erere vẹ ọzae avọ aye jọ a wo no evaọ usiuwoma ota ọkpokpọ na?
5 Emamọ iyẹrẹ buobu i no oghẹrẹ usiuwoma ota nana ze no. Oniọvo jọ avọ aye riẹ a kere nọ: “Nọ ma bi dikihẹ kẹle emẹjẹ na jẹ be ruẹ ahwo buobu nọ a be nya oyena vrẹ kẹdẹ kẹdẹ na, o lẹliẹ omai vuhumu nọ okolo iruo ukoko na u bi ru hu re a sae ta usiuwoma na evaọ akpọ na soso. Nọ ma be ruẹ ogbotu ahwo nana kẹdẹ kẹdẹ je bi roro te ọdawẹ nọ Jihova o wo kẹ ae omomọvo na, onana u ru nọ ma rọ gbaemu nọ ma rẹ rọ usiuwoma ota na karo evaọ uzuazọ. O wọhọ ẹsenọ ma be ruẹ Jihova nọ ọ be kiẹ idu ahwo nọ a be nya vrẹ na riwi, be gwọlọ ahwo nọ e gwọlọ gọe. Onana u si omai kẹle ikọ-odhiwu nọ ma gbe bi ru iruo na.”
6. (a) Oghẹrẹ usiuwoma ota vẹ a be te jọ ikoko buobu ru, kọ ẹvẹ u ro wo ohẹriẹ no orọ obọdẹ nọ a ti ru evaọ ikpewho na? (b) Ẹvẹ ikoko sa-sa a sai ro ru eware kpobi kpatiẹ evaọ usiuwoma ota ẹgbede na?
6 Usiuwoma Ota Ẹgbede nọ Ukoko O rẹ jọ Ẹkwotọ Rai Ru: U te no usiuwoma ota obọdẹ nọ a ti ru evaọ ikpewho na no, ma wo omaa okpokpọ ofa nọ ekpako ukoko a ti fi obọ họ kẹ ukoko rai ru evaọ ẹkwotọ rai. Iwhowho-uvie a te wọ emẹjẹ gbe eware efa nọ a re ghelie fihọ eria nọ ahwo a rẹ vọ evaọ ẹkwotọ usiuwoma ota ukoko rai. Omaa nana u wo ohẹriẹ no onọ a rẹ jọ salọ iwhowho-uvie no ikoko sa-sa ze re a ta usiuwoma evaọ ikpewho nọ uwou ogha o salọ.—Rri ẹkpẹti na “Wha Ru Eware Kpobi Kpatiẹ.”
7. Otẹrọnọ usiuwoma ota ẹgbede na u kiehọ kẹ ukoko rai, ẹvẹ ekpako na a ti ro fi obọ họ kẹ ukoko rai ru ei?
7 Ekpako na a re rri sọ a jọ ẹkwotọ usiuwoma ota rai wo eria nọ ahwo a rẹ jọ zurie nọ a rẹ sae jọ ta usiuwoma ẹgbede utiona. A rẹ sae wọ emẹjẹ gbe eware efa nọ a re ghelie na fihọ eria nọ a rẹ mae dhẹ imoto fihọ, eria nọ ahwo a rẹ vọ ẹsikpobi, eria ugheriwo, iyẹrẹ nọ ahwo a rẹ jọ zurie, iwou-eki ilogbo, isukulu ikpehru, eria nọ irupre e rẹ kpahe, eria nọ itreni e rẹ kpahe, gbe eria nọ ahwo a re kokohọ kẹ ehaa ẹsiẹvo ẹgbukpe. O rẹ mai woma otẹrọnọ wha rẹ hae wọ emẹjẹ na fihọ oria ovona evaọ ẹdẹ gbe oke ovona. Ma ruẹ nọ ahwo a rẹ mae rehọ ebe mai nọ a te fi ai họ ehru emẹjẹ evaọ uwou ulogbo nọ ibriwou eki sa-sa e rrọ, viukpenọ e rẹ jọ aro uwou-eki ulogbo ovo jọ, keme ahwo nọ a bi kpohọ etẹe a rẹ tẹrovi oware nọ a be nyae dẹ. U re woma re a wọ emẹjẹ nọ e rrọ kakao fihọ akotọ edhere nọ ahwo a rẹ nya nọ u re zurie. Ma ru iwoho Uwou-Eroro Na avọ Awake! gbe obe ọ Ebaibol Wuhrẹ na, enọ a rẹ tamu oria nọ a ti fi ebe mai họ evaọ usiuwoma ota nana. Ekpako ukoko a rẹ sae rehọ iwoho nana evaọ Oria evuẹ itanẹte mai na. Inievo na a ti ru iruo na wọhọ epanọ a ti ru orọ obọdẹ evaọ ikpewho na, yọ a ti ru lele ekpọvio nọ ọsẹro usiuwoma ota ọ te kẹ ae. Otẹrọnọ ohwo jọ ọ kẹ inievo na adrẹse riẹ yọ ohwo na ọ rrọ ẹkwotọ usiuwoma ota rai hi, a ve kere eme fihọ efọmo Please Follow Up (S-43) na rọkẹ okere-obe ukoko rai.
8. Otẹrọnọ idhere ekpokpọ ivẹ nọ ma fodẹ na i kiehọ kẹ ukoko rai hi, eria vẹ whọ sae jọ ta usiuwoma ẹgbede?
8 Usiuwoma Ota Ẹgbede nọ Whọ rẹ Sai Ru: Ikoko jọ a wo eria nọ ahwo a rẹ jọ zurie he nọ a sae jọ ta usiuwoma utiona. Ghele na, ma tuduhọ iwhowho-uvie nọ e rrọ ikoko itieye na awọ re a hae daoma ta usiuwoma evaọ ẹgbede. Kọ uwou-eki jọ o rrọ ẹkwotọ rai nọ ahwo a re kpohọ, hayo eria ilogbo nọ a rẹ jọ thueki nọ e rrọ akotọ edhere? Kọ oria ugheriwo jọ o riẹ nọ ahwo a re kuku? Kọ u wo aruọzaha jọ nọ a re ru koke koke evaọ ẹkwotọ rai? Otẹrọ ere, whọ rẹ sae ta usiuwoma ẹgbede evaọ eria itieye na.
9. Fikieme ma rẹ rọ ta usiuwoma kẹ ahwo evaọ oria kpobi nọ a rrọ?
9 Jihova ọ gwọlọ nọ “ahwo kpobi a wo usiwo, re a ze te riẹ uzẹme na.” (1 Tim. 2:4) Fikiere ma be daoma re ma ta usiuwoma Uvie na kẹ ohwo kpobi taure urere na u te ti te. (Mat. 24:14) O rrọ bẹbẹ re a di ahwo họ uwou evaọ eria buobu. Ghele na, ma rẹ sae ta usiuwoma kẹ ae evaọ ẹgbede. Usiuwoma ota ẹgbede ọvo họ edhere nọ ahwo jọ a te sai ro yo usiuwoma na. Fikiere, joma ta usiuwoma na kẹ ahwo evaọ oria kpobi nọ a rrọ re ma rọ ere ru iruo mai gbunu.—2 Tim. 4:5.
[Ẹkpẹti nọ o rrọ ẹwẹ-obe avọ 5]
Wha Ru Eware Kpobi Kpatiẹ
Ma yo nọ ẹsejọ iwhowho-uvie nọ i no ikoko nọ e kẹloma ze a rẹ ta usiuwoma ẹgbede evaọ iyẹrẹ evona, eria nọ a rẹ jọ ruọ imoto, gbe eria iwou-eki evona. Inievo ikoko sa-sa a kpohọ oria nọ a rẹ jọ ruọ imoto, oria ugheriwo gbe oria eki ọvona nyae ta usiuwoma jẹ rọ emagazini kẹ ahwo na evaọ ẹdẹ ọvona. Onana o dina lẹliẹ eva dha ahwo nọ a ta usiuwoma kẹ na, dede nọ inievo na a nya evaọ oke ovona ha. Fikiere, o mai woma re wha jọ ẹkwotọ ukoko rai ọvo ta usiuwoma ẹgbede.
Otẹrọnọ iwhowho-uvie a gwọlọ jọ ẹkwotọ ukoko nọ o kẹle rai ta usiuwoma, a rẹ vuẹ ọsẹro usiuwoma ota ukoko rai tao. O ve mi ọsẹro usiuwoma ota ukoko yena uvẹ taure iwhowho-uvie ukoko riẹ a te ti kpohọ ẹkwotọ yena. Otẹrọnọ ikoko evẹrẹ sa-sa a rẹ jọ ẹkwotọ ọvona ta usiuwoma, esẹro usiuwoma ota ikoko yena a re wo emamọ ọruẹrẹfihotọ, a gbe ru eva dha ahwo nọ a be ta usiuwoma kẹ na ha. Nọ ma te wo emamọ omaa, ma ti “ru eware kpobi ziezi gba kiete.”—1 Kọr. 14:40.
[Uwoho nọ o rrọ ẹwẹ-obe avọ 6]
[Uwoho nọ o rrọ ẹwẹ-obe avọ 6]