Edhere Obọdẹ Ọkpokpọ nọ Ma be rọ Ta Usiuwoma Ẹgbede
1. Eme a tuduhọ ikoko nọ i wo oria nọ i bi zurie awọ nọ a ru?
1 Ikoko nọ i wo eria nọ i re zurie a tuduhọ ae awọ re a mu usiuwoma ota ẹgbede họ onọ a re ro fi ebe họ ehru emẹjẹ hayo eware nọ a re ghelie no oria ruọ oria. Otẹrọnọ oware nọ a re ghelie wha fihọ oria na, o tẹ kawo owhowho-uvie jọ o re dikihẹ hayo keria kele iẹe. Rekọ, iwhowho-uvie ivẹ e rẹ jọ oria na otẹrọnọ emẹjẹ a fi ebe na họ. Inievo nọ e rẹ jọ oria na a rẹ whẹtiẹ ahwo họ oma avọ ovao nọ o rrọ ohwohwẹ, je dhesẹ emamọ uruemu. Otẹrọnọ ohwo jọ ọ wẹriẹ bi rri ebe na, owhowho-uvie nọ o dikihẹ gba ebe na ọ sae rọ enẹ mu ẹme họ kugbe ohwo na, “Kọ whọ riẹ oware nọ Ebaibol na ọ ta kpahe uzoẹme nana?” Oniọvo jọ hayo ivẹ efa a rẹ sae jọ akotọ oria na ta usiuwoma kẹ ohwo nọ ọ be nyavrẹ.
2. Gbiku jọ nọ u dhesẹ epanọ usiuwoma ota ẹgbede u woma te.
2 Edhere ọkpokpọ nana o lẹliẹ ahwo buobu jẹ obe-uwuhrẹ Ebaibol rehọ no. Nọ ọmọtẹ ekọleji jọ o je ru ekiakiẹ re o kere kpahe Isẹri Jihova, ọ tẹ jẹ gwọlọ Ọgwa Uvie rekọ ọ ruẹ hẹ. Oka nọ u lele i rie ọ tẹ ruẹ emẹjẹ nọ a fi ebe mai họ evaọ isukulu riẹ. A te mu obe-uwuhrẹ họ kugbei, obọnana ọmọ na ọ họ-ame no yọ o bi w’obọ evaọ oghẹrẹ usiuwoma ota nana re.
3. Ẹvẹ inievo jọ a rri usiuwoma ota ẹgbede ọkpokpọ na?
3 Oniọvo-ọmọtẹ jọ nọ o w’obọ evaọ usiuwoma ẹgbede no ọ ta nọ: “Ahwo jọ a rẹ wẹriẹ re a rehọ emagazini ekpokpọ nọ e riẹ. Ejọ i ri yo kpahe Isẹri Jihova ẹdẹvo ho. Oghẹrẹ usiuwoma ota nana u bi ru nọ ahwo buobu a bi ro yo kpahe emamọ usi na.” Oniọvo-ọmọtẹ ọfa ọ ta nọ, “Onana yọ edhere obọdẹ ọkpokpọ nọ ma be rọ ta usiuwoma na keme ahwo na ọvo a rẹ nyabru owhẹ ze, a gbẹ make gwọlọ rehọ obe he, a gwọlọ riẹ oware nọ ma bi ru.”
4. Fikieme u ro woma re a hae wọ emẹjẹ na fihọ oria ovona ẹsikpobi evaọ koka koka?
4 O rẹ mai woma otẹrọnọ a rẹ hae wọ emẹjẹ na fihọ oria ovona evaọ ẹdẹ gbe oke ovona, evaọ oka kpobi. A tẹ be hai ru ere, o te reria ahwo na oma a vẹ te wẹriẹ ẹsikpobi nọ a gwọlọ obe jọ hayo nọ a te wo onọ jọ. Kọ ukoko ra u mu usiuwoma ota ẹgbede họ no? O tẹ rrọ ere, daoma w’obọ evaọ oghẹrẹ usiuwoma ota nana nọ emamọ iyẹrẹ i bi no ze na, nọ o rrọ uvi edhere jọ nọ ma be rọ “vuẹ ovuẹ uvie Ọghẹnẹ” na.—Luk 9:60.