Epanọ Ma Sai ro Ru Ziezi Evaọ Isẹri-Ise Iyẹrẹ

1. Edhere jọ vẹ ma sae rọ rehọ aro kele Jesu?

¹ Evaọ oke iruo odibọgba riẹ evaọ otọakpọ, Jesu ọ dhomovuọ họ re ọ ta usiuwoma kẹ ahwo nọ ọ jẹ nyaku evaọ edhere hayo evaọ eria ẹgbede efa. (Luk 9:57-61; Jọn 4:7) Ọ gwọlọ nọ ọ rẹ vuẹ ahwo kpobi ovuẹ riẹ nọ u wuzou. Nẹnẹ, isẹri-ise evaọ iyẹrẹ yọ obọdẹ edhere nọ ma re ro fi obọ họ kẹ ahwo wuhrẹ areghẹ nọ o n’obọ Ọghẹnẹ ze. (Itẹ 1:20) Ma ti wo emamọ iyẹrẹ ziezi nọ mai ọvo ma tẹ be nyabru ahwo, jẹ rọ areghẹ ru ere.

2. Ẹvẹ ma sae rọ nyabru ahwo nọ ma tẹ rrọ isẹri-ise iyẹrẹ?

² Rehọ Eva Obọra Nya Bru Ohwo: O rẹ mai woma re whọ nyabru ahwo viukpenọ who re dikihẹ oria ọvo re ahwo nọ a be nyavrẹ a nya bru owhẹ ze. Rri ohwo na ovao avọ unu ra nọ o rrọ ohwohwẹ, jẹ ta ẹme kẹe wowolẹ wọhọ ogbẹnyusu. Otẹrọnọ whẹ avọ iwhowho-uvie efa wha rrọ usu, o rẹ mai woma re ọvuọvo ohwo riẹ ọ nyabru. Ohwo jọ o te dhesẹ isiuru, whọ rẹ jẹ daoma epanọ whọ rẹ rọ wariẹ lele iei ta ẹme. O tẹ lọhọ, evaọ obọ ekuhọ ẹme rai, nọ ohwo na epanọ whọ sae rọ wariẹ rue riẹ. Iwhowho-uvie jọ a rẹ jọ iyẹrẹ ọvona ta usiuwoma kẹse kẹse, onọ u bi ru ei lọhọ nọ a bi ro lele ahwo ọvona ta ẹme ẹsibuobu jẹ bọ isiuru rai kẹ uzẹme na ga.

3. Nọ ma te bi se isẹri evaọ iyẹrẹ, ẹvẹ ma sai ro ru ei avọ areghẹ?

³ Rehọ Areghẹ Ru Ei: Rehọ areghẹ salọ oria nọ who re dikihẹ evaọ iyẹrẹ na gbe oghẹrẹ ohwo nọ whọ rẹ nyabru. O nwane rọnọ ohwo kpobi nọ ọ be nyavrẹ whọ rẹ ta usiuwoma kẹ hẹ. Muẹrohotọ. Wọhọ oriruo, otẹrọnọ ohwo o bi siawọ, o rẹ mai woma re whọ kẹe uvẹ. Whọ tẹ rrọ aro oria ekiọthuọ, yọroma re whọ siọ eva ba erudha ọzeki na. O rẹ mai woma re whọ ta ẹme kẹ ahwo na nọ a te no uwou eki na ze no viukpọ okenọ a be rọ ruẹe eva. Nyabru ahwo evaọ oghẹrẹ nọ ozọ u re ro mu ai hi. Ofariẹ, fiẹrohotọ nọ who te bi fi obe họ ada. Ohwo o te dhesẹ umutho isiuru, whọ sae kẹe omobe-ovẹvẹ viukpọ emagazini.

4. Fikieme isẹri-ise iyẹrẹ o jẹ rọ onọ o rẹ kẹ erere jẹ were oma?

⁴ Isẹri-ise evaọ iyẹrẹ u re fi obọ họ kẹ omai vaha ibi uzẹme na buobu evaọ omoke kakao. (Ọtausi. 11:6) O sae jọnọ ahwo jọ nọ ma te nyaku a te jọ enọ ma ruẹ hẹ evaọ usiuwoma n’uwou ruọ uwou. Kọ whọ gbẹ daoma epanọ who re ro w’obọ evaọ obọdẹ edhere usiuwoma ota nana nọ a re se isẹri-ise iyẹrẹ na?