Ona nọ A rẹ rọ Ta Usiuwoma Evaọ Eria Ẹgbede
1 Wọhọ ilele ọsosuọ Jesu, Ileleikristi inẹnẹ a be daoma vuẹ ahwo emamọ usi na evaọ oria kpobi nọ a jẹ sai duku ai. (Iruẹru 16:13; 17:17; 20:20, 21) Fiki oma nọ a be dawo re a ta usiuwoma evaọ eria ẹgbede, a be ruẹ ahwo nọ a wo isiuru nọ a hae sae ruẹ vẹre evaọ usiuwoma ota nuwou ruọ uwou hu.
2 O gwọlọ areghẹ hayo orimuo nọ a tẹ be ta usiuwoma evaọ eria ẹgbede. Wọhọ epanọ o rẹ jọ, u fo ho re a du-usuhọ. Wọhọ oriruo, otẹrọnọ iwhowho-uvie buobu a be jọ oria ovona ta usiuwoma, hayo weze kpohọ oria iruo ovona, o rẹ sai tu ahwo jọ oma. Onana u re si adhẹwẹ no iruo mai je tube ru nọ ahwo a gbẹ kezọ kẹ omai ziezi hi. Kọ eme ma rẹ sai ru nọ onana o gbẹ via ha? Ikoko jọ nọ i wo eria buobu nọ a jẹ ta usiuwoma ẹgbede a ruẹ nọ u kiehọ re a ghale eria nana fihọ ẹkwotọ sa-sa. (1 Kọr. 14:40) Ofariẹ re, ma rẹ sae zọhọ fihọ ọruẹrẹfihotọ ọkpakpatiẹ ẹkwoma umuo ẹkwotọ nọ a ghale kẹ ukoko mai ọvo nọ ma rẹ jọ ta usiuwoma, ajokpanọ Ogbẹgwae Iruo Ukoko na u ru ugogo ọruẹrẹfihotọ jọ nọ ma re ro fiobọhọ kẹ ukoko ofa.—Rri Odibọgba Uvie Mai ọrọ November 1998, ẹwẹ. 6, edhe. 18-19.
3 Epanọ A re ro Mu Ẹme họ Kugbe Ahwo: Nọ Jesu o lele aye jọ tẹme eva akotọ ozae jọ, omoware jọ kakao o ro mu ẹme na họ, jẹ rọ ẹmẹrera ru ẹme na rro nọ isiuru aye na i bi dhesẹ oma via na. (Jọn 4:7-26) Edhere nana o bi wiruo nẹnẹ re evaọ iyero jọ. Iwhowho-uvie jọ e ruẹ nọ re odibọgba ẹgbede rai ọ sai wiruo ziezi, u re fiobọhọ re a rehọ umutho iminiti jọ yere ahwo je dhesẹ isiuru nọ a wo kpahe ahwo na kẹ ae taure a tẹ te ta ovuẹ Uvie na kẹ ae. Iwhowho-uvie na a rẹ ta ẹme kpahe eware nọ i re si ahwo oborai urru, yọ ẹsibuobu onana u su kpohọ usiuwoma ota. Nọ amọfa a tẹ be ta eware nọ e rrọ ọdawẹ kẹ ae, a rẹ gaviezọ ziezi. A vẹ rọ ere ta eme omosasọ no Ẹme Ọghẹnẹ ze kẹ ae.—Rom 15:4.
4 Ẹbọga Isiuru: Oke kpobi nọ ma tẹ ta ẹme kugbe ohwo ziezi, ma rẹ daoma re ma ru ọruẹrẹfihotọ nọ ma rẹ rọ bọ isiuru na ga. Ẹvẹ ma sai ro ru onana? Nọ ẹme na ọ tẹ be kẹle ekuhọ no, whọ sae tọlọ omobe nọ who re kere eware fihọ lahwe whọ vẹ ta nọ: “Eva e were omẹ gaga nọ mẹ sai ro lele owhẹ tẹme. Kọ edhere jọ ọ riẹ nọ ma sae rọ ta ẹme na haro eva oke ofa?” Hayo ta nọ: “Mẹ te gwọlọ nọ who se uzoẹme jọ nọ mẹ riẹ nọ o te ginẹ were owhẹ. Kọ mẹ sae rehọ iẹe ze obọ uwou ra hayo oria iruo ra?” Iwhowho-uvie jọ e rẹ nọ inọ: “Kọ whọ sae k’omẹ inọmba ifonu ra?” Ẹsibuobu onana o rẹ wha emamọ uyo ze.
5 Ahwo buobu nọ a kake ta ẹme kẹ evaọ eria ẹgbede a jẹ obe-uwuhrẹ Ebaibol rehọ no. A rẹ sai ru uwuhrẹ utioye na evaọ obọ uwou ohwo na, oria iruo riẹ, oria ẹgbede nọ u kiehọ, hayo ẹkwoma ifonu. Jọ ma ru ei fihọ ute mai re ma to ebe-uwuhrẹ Ebaibol họ nọ ma be ta usiuwoma ziezi evaọ eria ẹgbede na.
[Study Questions]
1. Evaọ aro oro kele Ileleikristi ikpe udhusoi ọsosuọ na, ẹvẹ Ileleikristi inẹnẹ a be rọ ta usiuwoma ziezi evaọ eria ẹgbede, kọ didi iyẹrẹ i no rie ze no?
2. Fikieme o jẹ gwọlọ areghẹ hayo orimuo evaọ okenọ ma be ta usiuwoma evaọ eria ẹgbede, kọ ẹvẹ ma sae rọ zọhọ fihọ ọruẹrẹfihotọ ọkpakpatiẹ?
3. Edhere vẹ iwhowho-uvie jọ e ruẹ nọ o kiehọ eva okenọ a be ta usiuwoma evaọ eria ẹgbede?
4. Ẹvẹ ma sae rọ bọ isiuru nọ ma ruẹ ga?
5. Ute vẹ ma re wo nọ ma tẹ be ta usiuwoma evaọ eria ẹgbede?