Epanọ A rẹ rọ Rehọ Eware nọ A Fi Ebe Họ Ta Usiuwoma

Ebe nọ a re fihọ emẹjẹ hayo oware nọ a re ghelie i bi ru nọ ma be sae rọ ta usiuwoma kẹ ahwo buobu nọ i wo evezi kpahe uzẹme na. (Jọn 6:44) Nọ o rrọ ere na, a gwọlọ nọ ekpako ukoko a ru ọruẹrẹfihotọ usiuwoma ota ẹgbede evaọ eria nọ i re zurie evaọ ẹkwotọ ukoko rai. Nọ orọnọ ma rẹ nyasiọ ebe mai ba etẹe hẹ na, u du gwọlọ nọ ma re mi utu egọmeti uvẹ tao re ma tẹ te wọ ai fihọ họ. Inievo vẹ e rẹ sae jọ oghẹrẹ usiuwoma ota nana w’obọ? Iwhowho-uvie nọ i wo orimuo, nọ osẹ rai o rẹ jọ kpatiẹ nọ i wo emamọ uruemu, gbe enọ i wo onaa ẹmeọta ziezi. Ma jọ obotọ na fodẹ eware jọ nọ a re ru gbe enọ a re ru hu nọ i re fiobọhọ kẹ iwhowho-uvie.

Ru enana:

Whẹtiẹ ahwo họ oma jẹ fialoma via re who fiobọhọ kẹ ohwo nọ ọ be nyavrẹ. Iwhowho-uvie jọ a re ru unu ohwohwẹ je gbolo uyere se ohwo nọ ọ be nyavrẹ. Otẹrọnọ ohwo jọ nọ ọ be nyavrẹ ọ jẹlẹ ẹro rri ebe na, whọ sae ta nọ, “Whọ sae rehọ ọnọ o je owhẹ.”
Who dikihẹ thabọ no oria nọ ebe na e rrọ họ. Evaọ eria jọ, iwhowho-uvie a re dikihẹ dina kẹle ebe na, yọ a ruẹ nọ onana u re fiobọhọ. Inievo efa a ruẹ nọ onana u bi ru ahwo nọ a hae gwọlọ wẹriẹ nyavrẹ ovavo, fikiere a rẹ dina dikihẹ thabọ no ebe na bẹsenọ ohwo jọ ọ rẹ wẹriẹ. Nọ ohwo jọ ọ tẹ wẹriẹ, daoma mu ẹme họ kugbei. Whọ sae nọe nọ, “Kọ who roro kpahe onọ yena no ẹdẹjọ?”
Daoma se oria Ebaibol jọ kẹ ohwo na.
Fodẹ epanọ ma re ru uwuhrẹ Ebaibol kẹ ohwo kpobi nọ ọ rehọ obe jọ nọ ma re ro wuhrẹ ahwo, wọhọ obe Ebaibol Wuhrẹ na. Kporo ividio Fikieme Who re ro Wuhrẹ Ebaibol Na? kẹe.
Ohwo jọ o te dhesẹ isiuru, nọe oria nọ ọ be rria. Otẹrọnọ ọ be rria ẹkwotọ ra ha, kere odẹ gbe adrẹse riẹ fihọ efọmo Please Follow Up (S-43) na re whọ rehọ iẹe kẹ okere-obe ukoko ra ababọ oke oraha.