Dhesẹ Odẹ gbe Iruẹru Jihova Via

¹ “Wha rehọ uyere kẹ ỌNOWO, wha se odẹ riẹ, wha dhesẹ iruo riẹ rọ kẹ ahwo na! . . . Ru re eva enọ e be gwọlọ ỌNOWO e ghọghọ!” (Ol. 105:1, 3) Ọso-ilezi nọ o kere eme eyena ọ ruẹ oghọghọ ulogbo evaọ ẹta kẹ amọfa kpahe Jihova gbe “iruo” riẹ. Oghẹrẹ iruo vẹ? Ababọ avro iruo nọ i w’obọ kugbe ọkwa-ovie oruaro Ọghẹnẹ jegbe “eme usiwo riẹ.”—Ol. 96:2, 3; 145:11, 12.

² Nọ ma sikẹle ezi ehaa Ekareghẹhọ 2001 no na, ma wo ẹjiroro buobu nọ ma rẹ rọ ghọghọ fiki iruẹru Jihova k’omai. Evaọ oghẹrẹ vẹ? Ababọ avro, Emu Owọwọ Olori na họ ehaa nọ e mae rro kpobi evaọ ukpe na rọkẹ Ileleikristi uzẹme kpobi. Ehaa efa e wọhọ e riẹ hẹ evaọ epanọ u wuzou te, evaọ ẹjiroro, hayo oghẹrẹ nọ a re ru ei. Onana yọ oke nọ mai kpobi ma rẹ rọ kareghẹhọ oware nọ Jihova gbe Jesu a ru no re a ruẹrẹ edhere esiwo họ k’omai. Agbẹta nọ evaọ etoke ehaa Ekareghẹhọ na, ma je rẹro ẹvi evaọ iruẹru usiuwoma ota na, nọ ma bi dhesẹ “eme usiwo” na via na!

³ Kọ Who Ti Ru Iruo Ọkobaro Obufihọ? April ukpe n’ukpo ahwo 22,714 a kere odẹ fihotọ wọhọ ekobaro obufihọ. Evaọ ukpe nana, kọ ma sai ru March gbe April fihọ emerae obọdẹ erọ erubu iruo evaọ odibọgba na? March o wo Ẹdẹ-Ọmaha isoi, yọ April o wo Ẹdoka isoi. Ẹkwoma omaa oma kẹ usiuwoma ota ẹdẹ okikpo evaọ urere-eka na, iwhowho-uvie buobu nọ i bi ru iruo oke-kpobi a ruẹ no nọ iruo ọkobaro obufihọ na yọ oware nọ a rẹ sai ru. Re ọ sae nyate ute euwa 50 na evaọ amara, ọkobaro obufihọ ọ gwọlọ oware wọhọ euwa 12 evaọ ẹkpoka. Roro ziezi kpahe omaa iriruo nọ e rọ ẹkpẹti na evaọ ẹwẹ-obe avọ 4 na. Kọ ọvo enana jọ o ti kiehọ uyero ra? O gbe kiehọ họ, ẹsejọhọ whọ sae ruẹrẹ omaa obọ ra họ kẹ iruo ọkobaro obufihọ na evaọ March gbe April nana.

⁴ Jọ ekpako na a muọ ajọwha gbe ukeotha họ ẹbọ enẹna kẹ erubu iruo usiuwoma na. Ukpe n’ukpo evaọ ukoko jọ nọ ekpako gbe idibo iruiruo na kpobi a jo kere odẹ fihotọ wọhọ ekobaro obufihọ, iwhowho-uvie 64 evaọ 121 a ru iruo ọkobaro evaọ April! Ukoko na o tẹ jẹ ghọghọ nọ a ruẹ iwhowho-uvie ezeza nọ e te họ-ame he nọ i muọ iyẹrẹ họ ẹnẹ evaọ March gbe April. Evaọ uzẹme, o rọ oke nọ o mai woma kẹ emọ gbe ahwo ọkpokpọ re a nọ ekpako na sọ a te, re a muọ obọ họ ewo evaọ iruẹru isẹri-ise ẹgbede na.

⁵ Omodawọ Ofiba O rẹ Wha Eghale Ze: Ikoko nọ i fi itee obọdẹ họ je ru omodawọ ofa a rẹ reawere eghale buobu. Ikoko jọ e rẹ sai fi ẹgba họ eruo ẹkwotọ nọ a rẹ jọ ta usiuwoma tere he, be tẹrovi eghẹrẹ idhere isẹri-ise jọ, hayo fi ẹgba họ isẹri-ise ifonu—edhere obọdẹ nọ a rẹ rọ nyate ahwo nọ a rọ uwou hu gbe eria nọ a sae nyate he.

⁶ Kọ u fo re ẹyao hayo owho o ghinẹ whaha ohwo re ọ se obọ ba ewo ziezi evaọ usiuwoma ota na? Orọnikọ ẹsikpobi hi. Wọhọ oriruo, oniọvo-ọmọtẹ ikpe 86 jọ nọ o wo ẹyao-ọta o ru iruo ọkobaro obufihọ evaọ April ghelọ awọ riẹ nọ o fu. Isẹri-ise ifonu i ru rie lọhọ kẹe re o w’obọ vọvọ evaọ usiuwoma ota na, nọ u ru ujiro riẹ kẹ Jihova viharo viere. Onana o kẹ riẹ gbe ukoko na ọwhọ gaga.

⁷ Ruẹrẹ Oma Kpahe Ziezi kẹ Ekareghẹhọ Na: Evaọ ukpe onana ehaa Ekareghẹhọ na o kie fihọ April 8. Nọ ẹdẹ na ọ rọ Ẹdoka na, o re lọlọhọ re ibuobu e jariẹ. Ma ti wo unu ahwo nọ o mai bu kpobi otẹrọnọ ma ru ẹkẹ-abọ mai ẹkwoma (1) etẹe nọ ma rẹ jọ gbe (2) amọfa nọ ma re zizie re a kuomagbe omai evaọ ehaa Ekareghẹhọ na. Amono ma re zizie?

⁸ Rri obe okerefihotọ usiuwoma ota ra re whọ gwọlọ edẹ ahwo nọ a dhesẹ isiuru kpahe uzẹme na no, o tẹ make rọnọ who bi weze bru ae ẹsikpobi hi. Eka ivẹ hayo esa taure ehaa Ekareghẹhọ na i te ti te, tẹrovi eweze bru ahwo nana kpobi avọ obe-uzizie Ekareghẹhọ na. Otẹrọnọ uyero ra o k’owhẹ uvẹ, ruẹrẹ ugho ofa họ kẹ enọ e te gwọlọ nya.

⁹ Evaọ ikoko jọ, a rẹ rehọ ebe-uzizie Ekareghẹhọ nọ a kporo na kpobi ro ruiruo ho. U re mu ikere-obe ukoko na ẹro nọ ebe-uzizie na e riẹ evaọ ẹruoke rọkẹ ahwo kpobi re a ghale. Whọ sai kere oke gbe oria ehaa Ekareghẹhọ na fihọ obotọ obe-uzizie na. Hayo whọ sai ku obe-uzizie nọ u dhesẹ adrẹse Ọgwa Uvie na kugbei otẹrọnọ etẹe a ti jo ru ehaa Ekareghẹhọ rai. Wọhọ ekareghẹhọ, evaọ ẹsibuobu u fo nọ whọ rẹ rọ obọ ra rehọ ebe-uzizie Ekareghẹhọ na kẹ ọnọ o wo uwou na.

¹⁰ Kareghẹhọ Enọ E Se Iruo Uvie Ba No: O rọ oware oghọghọ nọ ọmọ-uwuhrẹ Ebaibol ọ tẹ rehọ omariẹ mudhe kẹ Jihova je dhesẹ onana via ẹkwoma ame-ọhọ. Ghele na, k’ukpe k’ukpe ejọ evaọ udevie mai a re sioma no usu mai, yọ a re s’obọ họ evaọ ẹta kẹ amọfa kpahe odẹ gbe iruẹru Jihova. Onana o rọ ọdawẹ k’omai. Dede nọ ibuobu nọ e se iruo uvie ba no a te nyasiọ uzẹme na ba ha, ẹsejọhọ a s’obọ usiuwoma ota họ fiki ababọ-ajọwha, ebẹbẹ omobọ ohwo, hayo fiki awa-ọruọ uzuazọ efa. (Mat. 13:20-22) Enọ e rọ uyero ewhrehe abọ-ẹzi a gwọlọ obufihọ re a zihe ziọ ukoko na taure uyero Setan u te ti mu ai lọ. (1 Pita 5:8) Evaọ ezi ehaa Ekareghẹhọ nana ma gwọlọ ru omodawọ obọdẹ re ma fiobọhọ kẹ enọ e se iruo uvie ba no nọ i te re a wariẹ w’obọ evaọ ewhowho emamọ usi na.

¹¹ Okere-obe ukoko na ọ rẹ ta kẹ iwuhrẹ ọ uwuhrẹ obe ukoko kpahe ohwo kpobi evaọ utu rai nọ ọ se iruo uvie ba no. Ogbẹgwae Iruo Ukoko na o rẹ kobaro evaọ ọruẹrẹfihotọ re a ru iweze ẹruorote bru enọ e se iruo uvie ba no. A te vuhumu nọ ohwo na o ti wo erere no uwuhrẹ Ebaibol ze, ọsẹro usiuwoma ota na o ve ru ọruẹrẹfihotọ rọkẹ obufihọ, nọ o te lele ahwo ogbẹgwae iruo ukoko na nọ i kiọkọ jiroro no kpahe ohwo nọ ọ mai fo nọ o re ru uwuhrẹ na. Dede nọ o te gwọlọ re a ru uwuhrẹ na evaọ oke krẹkri hi, ọnọ a ro mu re o ru uwuhrẹ na ọ rẹ sae niyẹrẹ oke, izihebro, gbe uwuhrẹ Ebaibol na.

¹² April ukpe n’ukpo na oniọvo-ọmọtẹ jọ nọ o je ru iruo n’uwou ruọ uwou ọ kẹ ọmoha jọ emagazini evaọ iyẹrẹ na. Ọmoha na ọ tẹ ta via nọ aye riẹ yọ Osẹri nọ ọ se iruo uvie ba no. Ọ tẹ nọ kpahe oria nọ Ọgwa Uvie na ọ rrọ je zizie oniọvo-ọmọtẹ na re o weze bru ei avọ aye riẹ. Fikiere, imava-orọo na a te kpohọ ewuhrẹ nọ o lele i rie jẹ rọwo uwuhrẹ Ebaibol.

¹³ Ruẹrẹ Oma Kpahe kẹ Erubu Iruo! Ọso-ilezi na nọ o whowho nọ ma dhesẹ odẹ gbe iruẹru Jihova via na o fibae nọ: “Wha so kẹ e, wha suile ejiro kẹ e, gbiku iruo urirẹ riẹ kpobi! Oruaro o jọ kẹ odẹ ẹri riẹ.” (Ol. 105:2, 3) Joma dhesẹ ọdawẹ mai kẹ odẹ oruaro gbe “iruo urirẹ” Jihova ẹkwoma oma nọ ma rẹ dawo viere evaọ odibọgba na, re ma ru onana fihọ ezi Ekareghẹhọ nọ ọ mae rro kpobi!

[Box on page 4]

Idhere Sa-Sa nọ A rẹ rọ m’Omaa Euwa 12 Evaọ Ẹkpoka kẹ Iruo Ọkobaro Obufihọ

Ẹdẹ Euwa

Ẹdọvo-Oka 1 2 − −

Edivẹ-Oka 1 − 3 −

Edesa-Oka 1 2 − 5

Edene-Oka 1 − 3 −

Edisoi-Oka 1 2 − −

Ẹdẹ-Ọmaha 5 4 3 5

Ẹdoka 2 2 3 2

Aikpobi: 12 12 12 12

Kọ omaa ovojọ evaọ enana u ti kiehọ k’owhẹ? U gbe kiehọ họ, kemejabọ whọ gbẹ ma omaa obọ ra ha?