OBUFIHỌ RỌKẸ UVIUWOU | ỌMỌ-ỌYỌRỌ
Emaha na gbe Ifonu nọ A rẹ rọ Ruọ Itanẹte—Abọ avọ 2: Wuhrẹ Ọmọ Ra re O Rri Otọ Mu nọ O te Wo Ifonu nọ A rẹ rọ Ruọ Itanẹte
Ifonu nọ a rẹ rọ ruọ itanẹte ọ wọhọ amagha. A rẹ rehọ iẹe ru emamọ oware, rekọ a gbẹ riẹe ru hu, o rẹ sae biẹ ohwo. Ẹvẹ who re ro wuhrẹ ọmọ ra re o rri otọ mu nọ o te wo ifonu nọ a rẹ rọ ruọ itanẹte? Kọ ẹvẹ u fo nọ ọmọ na ọ rẹ nẹ ifonu na kri te?
Oware nọ u fo nọ whọ rẹ riẹ
Ifonu nọ a rẹ rọ ruọ itanẹte o rẹ sae lẹliẹ ohwo kie ruọ ẹta. Uzoẹme na “Emaha na gbe Ifonu nọ A rẹ rọ Ruọ Itanẹte—Abọ 1: Kọ U Fo re Ọmọ Mẹ O Wo Ifonu nọ A rẹ rọ Ruọ Itanẹte?” o ta nọ ohwo o te wo ifonu otiọye na u re ru nọ ọ rẹ rọ jọ itanẹte ruẹ emamọ eware gbe eware nọ i fo ho.
“Ẹsejọ ma rẹ gbẹ kareghẹhọ họ inọ ifonu nọ a rẹ rọ ruọ itanẹte o rẹ sae lẹliẹ emọ mai kie ruọ ẹta ikpehre ahwo evaọ itanẹte je wuhrẹ eware nọ i fo ho.”—Brenda.
U fo nọ esẹgbini a re wuhrẹ emọ rai. Uzẹme riẹ họ, emọ ọgbọna a riẹ kpahe ifonu nọ a rẹ rọ ruọ itanẹte gaga. Ekpako buobu a riẹ kpahe ae tere he. Rekọ oyena o nwani dhesẹ nọ ekpako na yọ igbori koikoi hi evaọ ẹme ifonu nọ a rẹ rọ ruọ itanẹte. Yọ u dhesẹ gbe he inọ emọ na họ ahwo nọ a mae riẹ oghẹrẹ nọ u fo nọ a rẹ nẹ ifonu otiọye na gbe epanọ a rẹ raha oke fihọ iẹe kri te.
O sae jọ nọ emọ ra a riẹ kpahe ifonu nọ a rẹ rọ ruọ itanẹte vi owhẹ. Rekọ oyena o nwani dhesẹ hẹ inọ emọ na a wo areghẹ nọ a rẹ rọ nẹ ifonu na evaọ oghẹrẹ nọ u fo. Makọ emọ nọ e riẹ kpahe ifonu otiọye na gaga, o gwọlọ nọ esẹgbini rai a re wuhrẹ ae re a gbẹ rọ ifonu na ru ugberuo ho.
“Ohwo ọ tẹ dẹ ifonu nọ a rẹ rọ ruọ itanẹte kẹ ọmọ riẹ yọ o wuhrẹ i rie epanọ u fo nọ o re ru hu, o wọhọ ẹsenọ ọ kẹe usiavẹ omoto jẹ rehọ iẹe keria agbara edraeva. Ọ tẹ vaha omoto na kẹe jẹ vuẹe nọ ‘Mọmẹ dhẹ ẹrera’ rekọ o ri wuhrẹ iẹe epanọ a rẹ dhẹ omoto ho.”—Seth.
Oware nọ whọ rẹ sai ru
Daoma riẹ kpahe ifonu ọmọ ra ziezi. Eware jọ e riẹ nọ whọ rẹ sai ru fihọ ifonu na nọ ọmọ ra ọ gbẹ rọ rehọ iẹe ru ugberuo ho. Daoma riẹ ae ziezi. Wọhọ oriruo:
Eware nọ whọ rẹ rọ whaha iẹe nọ o gbe ro kpohọ eria itanẹte jọ họ hayo nọ ọ gbẹ rọ nẹ ifonu na kri ga hrọ họ e riẹ. Kọ whọ riẹ rai?
Otẹrọnọ whọ riẹ rai, kọ whọ riẹ re inọ eware nọ whọ rẹ rọ whaha iẹe re o gbe kpohọ ekpehre oria evaọ itanẹte he i re ruiruo ẹsejọ họ?
Whọ tẹ riẹ oghẹrẹ nọ ifonu ọmọ ra nọ a rẹ rọ ruọ itanẹte ọ rrọ ziezi, ẹsiẹe whọ te sai ro fiobọhọ kẹe re ọ gbẹ rehọ iẹe ru ugberuo ho.
Ohrẹ Ebaibol: “Ẹkwoma eriariẹ, ohwo o re ro ru ogaga riẹ vihọ.”—Itẹ 24:5.
Fi izi họ. Fodẹ oware nọ whọ te kuvẹ riẹ, gbe onọ whọ te kuvẹ riẹ hẹ. Wọhọ oriruo:
Kọ whọ te kuvẹ re ọmọ ra ọ hae nẹ ifonu riẹ nọ wha tẹ be re emu hayo nọ wha te weze bru ahwo?
Kọ whọ te kuvẹ re ifonu emọ ra e jọ kugbe ai asohẹrioke?
Oghẹrẹ okwakwa hayo aplikeshọno vẹ whọ te rọwo nọ ọ jọ ifonu rai?
Ẹvẹ u fo nọ ọmọ ra ọ rẹ nẹ ifonu na kri te?
Kọ who ti fi uzi họ kẹ emọ ra kpahe umuo oke nọ a rẹ raha fihọ ifonu evaọ okpẹdẹ?
Ru re a riẹ uzi kpobi nọ who fihọ vevẹ, re whọ jẹ ginẹ whọku ai nọ a tẹ thọ uzi jọ.
Ohrẹ Ebaibol: “Whọ siọ ọmọ ba ẹwhọkuo ho.”—Itẹ 23:13.
Hai rri ifonu rai. Riẹ epaswọdo ọmọ ra, eware nọ e rrọ ifonu riẹ, te iwou nọ o bi vi se ahwo gbe enọ a bi vi sei. Ere ọvo ho, whọ rẹ jẹ riẹ ekwakwa hayo aplikeshọno nọ e rrọ ifonu na, te iwoho gbe eria itanẹte nọ ọ be hai kpohọ.
“Ma vuẹ ọmọtẹ mai nọ ma te hai rri ifonu riẹ evaọ oke nọ o rẹro riẹ hẹ. Yọ ma tẹ ruẹ nọ ọ be hae rọ ifonu na ru eware jọ nọ i fo ho, ma ti mi ei hayo fi izi efa họ kẹe.”—Lorraine.
Ọsẹ hayo oni o wo udu nọ ọ rẹ rọ riẹ oware kpobi nọ ọmọ riẹ ọ be rọ ifonu ru.
Ohrẹ Ebaibol: “Makọ ọmaha dede, a rẹ rọ eware nọ o bi ru rọ riẹe, sọ uruemu riẹ o rrọ ziezi je kiehọ.”—Itẹ 20:11.
Wuhrẹ emọ ra re a wo emamọ uruemu. Wuhrẹ emọ ra evaọ oghẹrẹ nọ o rẹ rọ were ae re a ru oware nọ u woma. Fikieme onana u ro wuzou? U wuzou keme whọ tẹ be make whaha emọ jọ oware nọ u fo ho, o tẹ rrọ udu rai nọ a re ru ei, a rẹ gwọlọ edhere kpobi nọ a re ro ru oware na.a
Fikiere, wuhrẹ emọ ra re a hae ta uzẹme ẹsikpobi, re a daoma whaha eware nọ i fo ho nọ a re rri gbe ifonu nọ a rẹ nẹ kri ga hrọ, a vẹ jẹ rọ uzou rai whae nọ uye u te no oware jọ nọ a ru ze. Ọmọ o te wo emamọ uruemu, ẹsiẹe ọ te rọ rehọ ifonu riẹ ru oware nọ u fo ẹsikpobi.
Ohrẹ Ebaibol: “Emu ọgaga ọ rrọ kẹ ahwo nọ a kpako, enọ i wuhrẹ ẹgba orimuo rai no . . . re a sai vuhu oware uwoma gbe uyoma.”—Ahwo Hibru 5:14.
a U wo oware jọ nọ emọ jọ a danlodu fihọ ifonu rai. A tẹ gwọlọ nọ ọsẹgboni rai a ruẹ eware jọ nọ e rrọ ifonu rai hi, oware yena a rẹ rọ ko ae dhere.